शी जिनपिंग यांच्या तब्येतीबाबत सोशल मीडियावर दावे, ब्रिक्स परिषदेनंतर चर्चांना उधाण

चीनचे राष्ट्राध्यक्ष शी जिनपिंग यांच्या तब्येतीबाबत आंतरराष्ट्रीय पातळीवर आणि सोशल मीडियावर पुन्हा एकदा वेगवेगळ्या चर्चा सुरू झाल्या आहेत. भारतात झालेल्या १८ व्या ब्रिक्स शिखर परिषदेत सहभागी झाल्यानंतर आणि बीजिंगला परतल्यावर जिनपिंग यांची तब्येत खूप बिघडल्याचा दावा चायनीज डेमोक्रॅटिक पार्टीचे (सीडीपी) अध्यक्ष जी वानजुन यांनी केला आहे.

जी वानजुन यांच्या दाव्यानुसार, बीजिंग विमानतळावर उतरताच जिनपिंग यांना लष्करी हेलिकॉप्टरमधून थेट बीजिंग ३०१ मिलिटरी हॉस्पिटलमध्ये (पीएलए जनरल हॉस्पिटल) नेण्यात आले, जिथे त्यांच्यावर तातडीने उपचार सुरू करण्यात आले. कथित प्रत्यक्षदर्शींच्या हवाल्याने वानजुन यांनी सांगितले की, जिनपिंग परदेश दौऱ्यावरून परततात तेव्हा विमानतळावर अधिकाऱ्यांची मोठी गर्दी आणि रेड कार्पेटसह औपचारिक स्वागत होते. मात्र यावेळी विमानतळावर कोणताही औपचारिक कार्यक्रम झाला नाही किंवा वरिष्ठ अधिकारी उपस्थित नव्हते. जिनपिंग यांना अत्यंत गुप्तपणे थेट रुग्णालयात नेण्यात आल्याने त्यांची तब्येत चिंताजनक असल्याचे संकेत मिळत असल्याचे वानजुन यांचे म्हणणे आहे.

नवी दिल्लीत झालेल्या ब्रिक्स परिषदेच्या पहिल्या सत्रात जिनपिंग अस्वस्थ असल्याचे अनेकांच्या लक्षात आले होते. आपले भाषण सुरू असताना पंतप्रधान नरेंद्र मोदी यांनी काही सेकंद थांबून जिनपिंग यांच्या अस्वस्थतेची दखल घेतली आणि त्यांच्यासोबतच्या भाषांतरकाराला "ते ठीक आहेत का" असे विचारले. या प्रसंगाचा व्हिडिओ सोशल मीडियावर मोठ्या प्रमाणात व्हायरल झाला असून त्यात एक चिनी अधिकारी जिनपिंग यांच्याजवळ जाऊन त्यांना काहीतरी देताना दिसतो. काही भारतीय माध्यमांनी हे मायक्रोफोन किंवा ट्रान्सलेशन उपकरणाशी संबंधित असू शकते असे म्हटले, तर आंतरराष्ट्रीय विश्लेषकांनी मात्र जिनपिंग यांच्या तब्येतीवर प्रश्न उपस्थित केले आहेत.

ब्रिक्स परिषदेदरम्यान मोदी आणि जिनपिंग यांच्यात महत्त्वाची द्विपक्षीय चर्चा झाली होती. मात्र परिषदेच्या पहिल्या दिवशी संध्याकाळी मोदींनी सर्व जागतिक नेत्यांसाठी आयोजित केलेल्या गाला डिनरला जिनपिंग उपस्थित राहिले नाहीत. चिनी शिष्टमंडळाने याचे कोणतेही अधिकृत कारण जाहीर केले नाही, पण सूत्रांच्या माहितीनुसार थकवा आणि तब्येत बरी नसल्यामुळे त्यांनी हॉटेलमध्ये आराम करणे पसंत केले. विमानाच्या पायऱ्या चढताना त्यांचा डावा भाग कमकुवत वाटत होता आणि तोल जात असल्याचे काही फोटो आणि व्हिडिओंमध्ये दिसून आले.

जी वानजुन आणि विरोधी गटांनी केलेल्या या दाव्यांची अद्याप स्वतंत्र पडताळणी झालेली नाही. चीन सरकार, कम्युनिस्ट पार्टी किंवा बीजिंग ३०१ रुग्णालयाकडून जिनपिंग यांच्या तब्येतीबाबत कोणतीही अधिकृत माहिती किंवा प्रतिक्रिया अद्याप देण्यात आलेली नाही. चीनमध्ये राष्ट्राध्यक्षांच्या वैयक्तिक आयुष्याबाबत आणि तब्येतीबाबत कमालीची गुप्तता पाळली जात असल्याने या दाव्यांमधील सत्यता पडताळणे कठीण बनले आहे.