बॉक्स ऑफिसवर धुमाकूळ घातल्यानंतर 'देऊळ बंद 2' आता ओटीटीवर, घरबसल्या बघता येणार सिनेमा
प्रवीण तरडेंच्या 'देऊळ बंद 2' या सिनेमाने थिएटरमध्ये 100 कोटीपेक्षा जास्त कमाई केल्यानंतर आता हा सिनेमा अमेझॉन प्राइम व्हिडिओवर स्ट्रीमिंगसाठी उपलब्ध होणार आहे.
छायाचित्रे सत्यापित केलेली नाहीत
थिएटरमध्ये धुमाकूळ घातलेला प्रवीण तरडेंचा सिनेमा 'देऊळ बंद 2' आता तुमच्या मोबाईलवर बघता येणार आहे. हा सिनेमा आज रात्री 12 नंतर अमेझॉन प्राइम व्हिडिओवर स्ट्रीमिंगसाठी उपलब्ध होणार आहे. ज्यांना थिएटरमध्ये जाऊन हा सिनेमा बघायला जमलं नव्हतं, त्यांच्यासाठी घरबसल्या हा सिनेमा बघण्याची ही एक चांगली संधी आहे.
'देऊळ बंद 2' 21 मे रोजी रिलीज झाला होता. रिलीज झाल्यापासून महाराष्ट्रातच नाही तर महाराष्ट्राबाहेरही या सिनेमाला प्रचंड प्रतिसाद मिळाला. तब्बल 50 दिवसांपेक्षा जास्त काळ थिएटर हाऊसफुल्ल होते. रात्रीच्या शेवटच्या शोपासून ते सकाळच्या पहिल्या शोपर्यंत थिएटरबाहेर हाऊसफुलचे बोर्ड लागलेले दिसत होते. मराठी सिनेमाच्या बाबतीत असं क्वचितच घडतं. या सिनेमाने 100 कोटीपेक्षा जास्त कमाई करत एक वेगळा विक्रम केला आहे.
सिनेमा ओटीटीवर येणार असल्याची बातमी खुद्द प्रवीण तरडेंनी इन्स्टाग्रामवर पोस्ट टाकून दिली. पोस्टमध्ये त्यांनी लिहिलं, "आपला 'देऊळ बंद 2' आता Amazon Prime वर बघता येणार आहे. ज्यांनी अजून बघितला नाही त्यांनी नक्की बघा. आणि ज्यांनी बघितलाय त्यांनी परत बघा, कारण हा सिनेमा कितीही वेळा बघितला तरी मन भरत नाही आणि डोळ्यातलं पाणी थांबत नाही." प्रवीण तरडेंच्या या पोस्टवर काही वेळातच हजारो लाईक्स आणि कमेंट्सचा पाऊस पडला. चाहत्यांनी कमेंट्समध्ये सिनेमाबद्दलच्या आपल्या भावना व्यक्त केल्या.
2015 सालच्या 'देऊळ बंद' या सिनेमाचा हा दुसरा भाग आहे. या दुसऱ्या भागात शेतकऱ्यांचे प्रश्न, त्यांचं दुःख आणि स्वामी समर्थांवरची श्रद्धा असे विषय हाताळण्यात आले आहेत. श्रद्धा आणि अंधश्रद्धा यांच्यातली लढाई अगदी योग्य पद्धतीने मांडल्यामुळे प्रेक्षकांना हा सिनेमा आपलासा वाटला आणि त्यांनी थिएटरमध्ये जाऊन तो बघितला. सिनेमाची स्टारकास्टही तगडी आहे. प्रवीण तरडे स्वतः यात आहेतच, त्यासोबत मोहन जोशी, प्रसाद ओक, महेश मांजरेकर, संस्कृती बालगुडे, स्नेहल तरडे, मंगेश देसाई, ओम भुतकर, सविता मालपेकर, सुनील अभ्यंकर आणि इतर अनेक कलाकार यात आहेत. सगळ्यांनीच जबरदस्त काम केलं आहे.
ज्यांना गर्दीमुळे थिएटरमध्ये जाऊन हा सिनेमा बघता आला नाही किंवा ज्यांना आपल्या कुटुंबासोबत बसून हा सिनेमा पुन्हा एकदा बघायचा आहे, त्यांच्यासाठी आता अमेझॉन प्राइम व्हिडिओवर हा सिनेमा उपलब्ध होणार आहे. त्यामुळे थिएटरमध्ये न बघितलेल्यांनाही आता घरबसल्या हा सिनेमा बघता येणार आहे.
