बीट खायला अजिबात आवडत नाही? रक्त वाढवण्यासाठी सोप्या पद्धतीने बनवा बीट ओट्स आप्पे, नोट करा रेसिपी

लहान मुलांना भाज्या दाखवल्या की नाक मुरडायची सवय जवळपास सगळ्याच घरात दिसते. बीट तर विशेषतः मुलं खायला टाळतात, भाजी पाहिली की लगेच नकार देतात. पण भाज्यांचं सेवन शरीरासाठी किती फायदेशीर असतं, हे वेगळं सांगायला नको. रोजच्या जेवणात वेगवेगळ्या भाज्यांचा समावेश केला की तब्येत आपोआप सुधारते आणि शरीर निरोगी राहतं. याच कारणामुळे आज एक सोपी आणि टेस्टी पद्धत सांगणार आहोत, जी वापरून बीट ओट्स आप्पे बनवता येतील.

अशा पद्धतीने बनवलेले बीट आप्पे लहान मुलांपासून मोठ्यांपर्यंत सगळेच आवडीने खातात, कारण त्यात बीटचा वास किंवा चव फारशी जाणवत नाही. शरीरात रक्ताची कमतरता जाणवत असेल तर अशा वेळी वेगवेगळ्या भाज्या आहारात घेण्याचा सल्ला दिला जातो. आठवड्यातून किमान दोनदा किंवा नियमितपणे बीट खाल्लं तर रक्ताची कमतरता भरून निघायला मदत होते आणि एकूण तब्येतही सुधारते. पोषक घटकांनी भरलेले हे बीट ओट्स आप्पे सकाळच्या नाश्त्यासाठी एकदम परफेक्ट पर्याय ठरतात. चला तर मग जाणून घेऊया ही रेसिपी नेमकी कशी बनवायची.

हे आप्पे बनवण्यासाठी लागणारं साहित्य अगदी घरगुती आणि सहज उपलब्ध होणारं आहे, त्यामुळे बाजारातून वेगळं काही आणण्याची गरज पडत नाही. यासाठी बीट, ओट्स, रवा, कांदा, आलं, हिरवी मिरची, कोथिंबीर, मीठ, तेल, मोहरी, कढीपत्ता, सोडा आणि लाल तिखट एवढ्या गोष्टी वापराव्या लागतात. या सगळ्या गोष्टी बहुतांश घरांमध्ये आधीच उपलब्ध असतात.

बनवण्याची पद्धत अशी - सर्वात आधी मिक्सरच्या भांड्यात ओट्स टाकून त्याची बारीक पावडर करून घ्यायची. एका मोठ्या वाटीत रवा, ओट्सची पावडर, बारीक चिरलेला कांदा आणि कोथिंबीर घालून सगळं व्यवस्थित मिक्स करायचं. त्यानंतर त्यात बीटची पेस्ट, चवीनुसार मीठ आणि आलं-मिरचीची पेस्ट घालून पुन्हा मिक्स करायचं. मिश्रण घट्ट वाटलं तर त्यात गरजेनुसार पाणी घालावं, जेणेकरून मिश्रणाची योग्य कन्सिस्टन्सी तयार होईल.

हे मिश्रण तयार झाल्यावर दहा मिनिटं झाकून बाजूला ठेवावं. दरम्यानच्या वेळात एका छोट्या वाटीत तेल गरम करून त्यात मोहरी, हिंग, कढीपत्ता आणि लाल तिखट टाकून फोडणी करावी आणि ती तयार मिश्रणात ओतून नीट मिक्स करावी. शेवटी रव्याच्या या मिश्रणात इनो घालून एकत्र करावं. त्यानंतर आप्पे पात्र गरम करण्यासाठी गॅसवर ठेवावं. भांडं गरम झालं की त्यात थोडं तेल घालून मिश्रण ओतावं आणि दोन्ही बाजूंनी खरपूस भाजून घ्यावं, म्हणजे आप्पे व्यवस्थित शिजतील.

अशा पद्धतीने अगदी सोप्या स्टेप्समध्ये हेल्दी आणि टेस्टी बीट ओट्स आप्पे तयार होतात. लहान मुलांना बीट आवडत नसेल तरी ही रेसिपी वापरून बनवलेले आप्पे ती नक्की आवडीने खातील, आणि त्याचबरोबर घरातल्या मोठ्यांच्या तब्येतीलाही याचा फायदा होईल.