लायसन्स नाही, नंबर प्लेट नाही, तरी 115 किलोमीटर धावणारी स्वस्त इलेक्ट्रिक स्कूटर बाजारात
ओडिसी कंपनीच्या रॅसर निओ या नव्या इलेक्ट्रिक स्कूटरला चालवण्यासाठी ड्रायव्हिंग लायसन्स किंवा नंबर प्लेटची गरज नाही, आणि किंमतही अगदी खिशाला परवडणारी आहे.
इलेक्ट्रिक टू-व्हीलरच्या मार्केटमध्ये आता एक नवा आणि स्वस्त पर्याय आला आहे. ओडिसी (Odysse) कंपनीने आपली नवी रॅसर निओ (Racer Neo) इलेक्ट्रिक स्कूटर बाजारात आणली असून, ही स्कूटर चालवण्यासाठी ड्रायव्हिंग लायसन्स किंवा नंबर प्लेट यापैकी कशाचीही गरज लागत नाही, हे या स्कूटरचं सगळ्यात मोठं वैशिष्ट्य आहे. साहजिकच सर्वसामान्य ग्राहकांसाठी हा एक आकर्षक आणि सोयीचा पर्याय ठरतो आहे.
रोज शहरातल्या शहरात कमी अंतराची जी ये-जा असते, ती लक्षात घेऊनच या स्कूटरची रचना करण्यात आली आहे. गर्दीच्या ट्रॅफिकमधूनही सहज वाट काढता यावी म्हणून तिचा लूक मॉडर्न आणि कॉम्पॅक्ट ठेवला गेला आहे, जेणेकरून रोजच्या धावपळीत ही स्कूटर वापरणाऱ्याला त्रास होऊ नये.
बॅटरी आणि परफॉर्मन्सबद्दल बोलायचं झालं तर, या स्कूटरमध्ये 1.4 kWh पासून 2.5 kWh क्षमतेपर्यंत लिथियम-आयन बॅटरी पॅकचे वेगवेगळे पर्याय दिले आहेत. एकदा पूर्ण चार्ज केल्यावर व्हेरियंटनुसार ही स्कूटर 70 किलोमीटर ते 115 किलोमीटरपर्यंत धावू शकते, म्हणजे रोजच्या प्रवासासाठी वारंवार चार्जिंगची गरज पडत नाही. यात 1200 वॅटची बीएलडीसी (BLDC) मोटर बसवली असून ती 27 एनएम (Nm) टॉर्क देते, त्यामुळे स्कूटरला चांगला पिकअप मिळतो.
रोजचा प्रवास आणखी सोपा आणि सुरक्षित व्हावा यासाठी स्कूटरमध्ये अनेक फीचर्स दिले आहेत. डिजिटल स्पीडोमीटर, ट्रिप मीटर, अँटी-थेफ्ट अलार्म सिस्टीम, सेंट्रल लॉक आणि रिव्हर्स गिअर मोड अशा सुविधा यात मिळतात. याशिवाय मोबाईल चार्जिंगसाठी यूएसबी पोर्ट, एलईडी हेडलाईट-टेललाईट आणि सामान ठेवण्यासाठी अंडर-सीट बूट स्पेसही देण्यात आली आहे, ज्यामुळे रोजच्या वापरात ही स्कूटर अधिक सोयीची ठरते.
किमतीच्या बाबतीत ही स्कूटर खिशाला परवडणारी आहे. भारतीय बाजारात ओडिसी रॅसर निओची सुरुवातीची एक्स-शोरूम किंमत साधारण 53,000 रुपयांपासून सुरू होते. लिथियम-आयर्न बॅटरीवर कंपनी 3 वर्षांची वॉरंटी देते, तर इलेक्ट्रिक मोटरवर 1 वर्षाची वॉरंटी मिळते. घरातल्या साध्या सॉकेटने ही स्कूटर साडेतीन ते चार तासांत पूर्ण चार्ज होते, म्हणजे वेगळ्या चार्जिंग स्टेशनची गरजही भासत नाही.
ही स्कूटर विना लायसन्स आणि नंबर प्लेट कशी चालू शकते, याचं कारण म्हणजे रस्ते वाहतूक आणि महामार्ग मंत्रालयाच्या नियमांनुसार, ज्या इलेक्ट्रिक वाहनांचा वेग तासाला 25 किलोमीटर किंवा त्याहून कमी असतो आणि ज्यांची मोटर क्षमता 250 वॅटपर्यंत मर्यादित असते, त्यांना चालवायला ड्रायव्हिंग लायसन्स किंवा वाहन पासिंगची गरज नसते. ओडिसीच्या लाईनअपमधलं लो-स्पीड (लाईट) मॉडेल याच निकषांत बसतं. त्यामुळे शाळकरी मुलं, महिला किंवा ज्येष्ठ नागरिक कोणतीही कागदपत्रांची कटकट न करता ही स्कूटर सहज वापरू शकतात, आणि याच कारणामुळे ही स्कूटर अनेकांसाठी सोयीची ठरते आहे.
