BGauss C12 MaxR: 1.46 लाखांची फॅमिली स्कूटर, 178 km रेंजसह पाच खास फीचर्स

इलेक्ट्रिक स्कूटरची मागणी वाढतेय आणि त्याबरोबर ग्राहकांच्या अपेक्षाही बदलल्यात. आधी फक्त रेंज बघून स्कूटर घेतली जायची, पण आता लोक आराम, स्टोरेजची जागा, टेक्नॉलॉजी आणि सेफ्टी फीचर्सकडेही लक्ष देतात. हीच गरज ओळखून बीगॉसने त्यांची नवी स्कूटर C12 MaxR बाजारात आणलीय. या स्कूटरची सुरुवातीची एक्स-शोरूम किंमत आहे Rs 1.46 लाख, आणि याच किमतीत ती स्वतःला प्रीमियम फॅमिली स्कूटर म्हणून सिद्ध करायचा प्रयत्न करतेय.

सगळ्यात आधी बोलूया रेंजबद्दल. या स्कूटरमध्ये 3.8 kWh क्षमतेची LFP बॅटरी बसवलीय, आणि कंपनीच्या दाव्यानुसार एकदा फुल चार्ज केल्यावर ही स्कूटर तब्बल 178 km पर्यंत धावू शकते. ही बॅटरी 4.2 kW च्या PMSM मोटरला पॉवर देते. रायडिंगसाठी तीन मोड दिलेत - Eco, Ride आणि Sport, त्यामुळे गरजेनुसार रायडिंग स्टाईल बदलता येते. चार्जिंगबद्दल सांगायचं झालं तर बॅटरी साधारण 3 तास 50 मिनिटांत 80% चार्ज होते, तर फुल चार्ज व्हायला जवळपास 5 तास 15 मिनिटं लागतात. रोजच्या वापरासाठी सगळ्यात उपयोगी गोष्ट म्हणजे या स्कूटरचं 38 लिटरचं अंडरसीट स्टोरेज. यात चक्क दोन हेल्मेट मावतील एवढी जागा आहे. शिवाय फ्लॅट फ्लोअरबोर्ड, बॉटल होल्डर्स, अंब्रेला होल्डर आणि लॉक करता येईल असा ग्लोव्हबॉक्सही दिलाय. त्यामुळे घरातलं सामान असो, ऑफिसची बॅग असो किंवा रोजची खरेदी - जागेची अडचण फारशी जाणवणार नाही.

टेक्नॉलॉजीच्या बाबतीतही ही स्कूटर मागे नाही. 5 इंचाचा TFT डिस्प्ले दिलाय, ज्यावर टर्न-बाय-टर्न नेव्हिगेशन, कॉल अलर्ट, किती अंतर गेल्यावर बॅटरी संपेल याची माहिती (Distance-to-Empty) आणि थीम्स बदलण्याची सोयही मिळते. Bluetooth कनेक्टिव्हिटीसोबतच वायरलेस चार्जिंगचंही फीचर आहे. सेफ्टीसाठी Fall Sense, अँटी-थेफ्ट टेक्नॉलॉजी आणि स्टँडवर स्कूटर असताना मोटर आपोआप बंद होण्याची सुविधाही दिलीय.

लूकच्या बाबतीत फुल-LED लायटिंग आणि अलॉय व्हील्समुळे स्कूटरला मॉडर्न टच मिळतो. सस्पेंशनबद्दल बोलायचं तर पुढच्या बाजूला हायड्रॉलिक टेलिस्कोपिक सस्पेंशन दिलंय, तर मागच्या बाजूला 5-स्टेप अॅडजस्टेबल Nitrox गॅस-चार्ज्ड सस्पेंशन आहे, त्यामुळे खराब रस्त्यांवरही आणि वेगवेगळ्या वजनाच्या रायडरसाठीही आराम टिकून राहतो.

ब्रेकिंगसाठी दोन्ही चाकांना डिस्क ब्रेक दिलेत, 12-इंचाचे ट्युबलेस टायर्स आहेत आणि ग्राउंड क्लीयरन्स 160 mm एवढा आहे. त्यामुळे शहरातले खड्डे, स्पीड ब्रेकर आणि खराब रस्ते हाताळणं सोपं जाऊ शकतं. एकूणच रेंज, मोठं स्टोरेज, स्मार्ट फीचर्स आणि आरामदायी सस्पेंशन बघता, Rs 1.46 लाख ही किंमत काही ग्राहकांना योग्य वाटू शकते.