बिग बॉस 20 मध्ये नॉमिनेशन टास्क कॅन्सल, आसिफ, रोहेद, स्काउट यांना डायरेक्ट नॉमिनेशन

सलमान खानच्या 'बिग बॉस 20' या रिअॅलिटी शोमध्ये सध्या रोज नवीन ट्विस्ट पाहायला मिळतायत आणि शो चांगलाच चर्चेत आहे. नुकत्याच झालेल्या पहिल्या 'वीकेंड का वार'मध्ये मात्र कोणत्याही स्पर्धकाला घराबाहेरचा रस्ता दाखवला गेला नव्हता, आणि सलमाननेही स्पर्धकांसोबत मजामस्ती करत प्रेक्षकांचं मनोरंजन केलं होतं. आता पुढच्या एपिसोडमध्ये मोठा ट्विस्ट येणार असल्याचं निर्मात्यांनी शेअर केलेल्या नव्या प्रोमोतून समोर आलंय.

या प्रोमोत बिग बॉसने चक्क या आठवड्याचं नॉमिनेशन टास्कच रद्द केल्याचं दिसतंय. एवढंच नाही, तर तीन स्पर्धकांना बिग बॉसने स्वतः थेट नॉमिनेट करून टाकलंय.

प्रोमोमध्ये सगळे स्पर्धक 'रूम नंबर 20'मध्ये बसलेले दिसतात. घरात नॉमिनेशनवर चर्चा सुरू असतानाच बिग बॉस अचानक नॉमिनेशन टास्क रद्द केल्याची घोषणा करतो. मिळालेल्या माहितीनुसार, घरातला एक महत्त्वाचा नियम मोडला गेल्यामुळेच हा निर्णय घेतला गेलाय. बिग बॉसच्या घरात नॉमिनेशनबाबत स्पर्धकांनी आपापसात चर्चा किंवा प्लॅनिंग करणं हे नियमांच्या विरोधात मानलं जातं. पण नॉमिनेशनच्या प्रोसेसमध्ये आसिफ खान, रोहेद खान आणि स्काउट हे तिघं प्लॅनिंग आणि प्लॉटिंग करताना दिसल्याचा दावा करण्यात आलाय.

हा नियम मोडल्याचं कारण देत बिग बॉसने आसिफ खान, रोहेद खान आणि स्काउट यांना थेट शिक्षा सुनावलीये. नॉमिनेशन टास्क रद्द करतानाच या तिघांना घराबाहेर जाण्यासाठी थेट नॉमिनेट करण्यात आलंय. त्यामुळे यंदाच्या आठवड्यात आसिफ खान, रोहेद खान आणि स्काउट हे तिघंच एलिमिनेशनच्या धोक्यात आलेत. आता येणाऱ्या 'वीकेंड का वार'मध्ये या तिघांपैकी कोणाचा घरातला प्रवास इथेच थांबणार, याकडे प्रेक्षकांचं लक्ष लागलंय.

दुसरीकडे, 'वीकेंड का वार'नंतरच्या एपिसोडमध्ये अरिश्फा खान आणि भोजपुरी अभिनेत्री आम्रपाली दुबे यांच्यात जोरदार भांडण झाल्याचंही पाहायला मिळालं. दोघींनीही एकमेकींवर आपला राग काढला, आणि हा वाद इतका वाढला की अरिश्फाला स्वतःच्या भावनांवर ताबा ठेवता आला नाही, ती रडायलाच लागली. या प्रकारानंतर घरातलं वातावरणही काही वेळ टेन्स झालं होतं.

पहिल्या 'वीकेंड का वार'मध्ये सलमान खानने काजी तौकीरचंही कौतुक केलं. काजीचा शोमधला अंदाज प्रेक्षकांना आवडतोय आणि बाहेरही त्याची चर्चा होतेय, असं सलमानने सांगितलं. सलमानकडून मिळालेलं हे कौतुक काजीसाठी खास ठरलं. आता नॉमिनेशन टास्क रद्द झाल्यानंतर आसिफ खान, रोहेद खान आणि स्काउट यांच्यापैकी नेमका कोणता स्पर्धक घराबाहेर जाणार, हे पुढच्या 'वीकेंड का वार'मध्येच स्पष्ट होईल.