कॅप्टन झाल्यावर Yung DSAचा नूर बदलला, कनिका मानसोबत वॉशरूमवरून जुंपली

सलमान खानच्या 'बिग बॉस 20' या रिअॅलिटी शोला सुरुवात होऊन जेमतेम चार दिवस उलटले असले, तरी घरात रोज नव्या कारणावरून खटके उडताना दिसत आहेत. घरात नुकताच पहिला कॅप्टन्सी टास्क पार पडला आणि रॅपर Yung DSA या टास्कमध्ये विजयी होत घराचा पहिला कॅप्टन बनला. मात्र कॅप्टन बनताच त्याच्या वागण्यात मोठा बदल झाल्याचं घरातील सदस्यांना जाणवू लागलं आहे.

शोच्या निर्मात्यांनी नुकताच एक प्रोमो शेअर केला असून त्यात Yung DSA आणि कनिका मान यांच्यात तापलेला वाद दिसतो. कॅप्टन झाल्यानंतर सदस्यांनी घराचे नियम कसे पाळायचे, यावरून दोघांमध्ये खडाजंगी उडाल्याचं या प्रोमोत स्पष्ट दिसतं. हे नेमकं कशावरून सुरू झालं आणि पुढे काय घडलं, हे आजच्या भागात पाहायला मिळणार आहे.

वादाची ठिणगी पडली ती वॉशरूमच्या मुद्द्यावरून. प्रोमोमध्ये Yung DSA वॉशरूमजवळ उभा राहून ईशा रिखीसोबत गप्पा मारताना दिसतो, त्याचवेळी तो कनिका मानने पुरुषांचं वॉशरूम वापरल्याचा विषय काढतो. त्याचं म्हणणं असं की, त्याने बाहेरून कनिकाला हाक मारली होती, पण तिने कोणतंही उत्तर दिलं नाही. कॅप्टन या नात्याने किमान प्रतिसाद मिळणं अपेक्षित होतं, असं त्याचं म्हणणं आहे. यानंतर घरातील इतर काही सदस्यांनीही कनिकाला कॅप्टनचा मान राखायला हवा, असं सुनावलं.

याला उत्तर देताना कनिका मानने मात्र स्वतःची बाजू ठामपणे मांडली. ती फक्त पाणी सुरू करत होती आणि Yung DSAने शांतपणे बोलायला हवं होतं, एवढा गोंधळ घालण्याची काय गरज होती, असा प्रतिप्रश्न तिने केला. कनिकाच्या या उत्तराने Yungचा संताप अधिकच वाढला. "माझा अपमान झाला आहे आणि माझा अपमान म्हणजे घराच्या नियमांचा अपमान आहे. आता सगळ्यांना याची शिक्षा मिळेल," असं तो प्रोमोमध्ये म्हणताना दिसतो.

Yungच्या या पवित्र्यावर कनिका मानही तितकीच आक्रमकपणे उत्तर देते. "तू फक्त घराचा कॅप्टन आहेस, राजा नाहीस. आम्ही तुझी सेवा करायला इथे आलेलो नाही," असं ती स्पष्टपणे सुनावते. यावर Yung DSAही गप्प बसत नाही आणि "तू घराबाहेर पडल्यावर तुला कळेल की Yung कोण आहे," असं प्रत्युत्तर देतो.

हा वाद सोशल मीडियावर सध्या चर्चेचा विषय बनला असून, कॅप्टन बनल्यानंतर बदललेला Yungचा नूर आणि त्याचा कनिकासोबत झालेला खटका बघण्यासाठी प्रेक्षकांमध्ये उत्सुकता आहे. या संपूर्ण प्रकरणावर अधिक उलगडा 11 सप्टेंबरच्या भागात होणार आहे. 'बिग बॉस 20'चा हा भाग JioHotstar वर रात्री 9 वाजता आणि Colors TV वर रात्री 10:30 वाजता पाहता येईल.