BGauss C12 MaxR इलेक्ट्रिक स्कूटर बाजारात दाखल, 178 किमी रेंज आणि 75 किमी टॉप स्पीड

इलेक्ट्रिक व्हेइकल क्षेत्रात आपला जम बसवत असलेल्या BGauss या कंपनीने आता एक नवी स्कूटर बाजारात आणली आहे. C12 MaxR असं या स्कूटरचं नाव असून रोजच्या वापरासाठी उपयुक्त ठरतील असे फीचर्स आणि दमदार परफॉर्मन्स एकत्र देण्याचा प्रयत्न कंपनीने या स्कूटरमध्ये केला आहे. एका चार्जमध्ये 178 किमीची रेंज, 75 किमी प्रतितास इतका टॉप स्पीड आणि सीटखाली तब्बल दोन हेल्मेट्स मावतील इतकी मोठी स्टोरेज जागा ही या स्कूटरची खासियत सांगितली जाते.

बॅटरीबद्दल बोलायचं झालं तर या स्कूटरमध्ये अल्युमिनियमच्या केसिंगसह 3.8 kWh क्षमतेची LFP बॅटरी बसवण्यात आली आहे, जिला IP67 रेटिंग देण्यात आलं आहे. ही बॅटरी सुरक्षित राहावी यासाठी बॅटरी मॅनेजमेंट सिस्टीममध्ये तब्बल 110 सेफ्टी फीचर्स समाविष्ट करण्यात आले आहेत. IDC टेस्ट सायकलनुसार पूर्ण चार्ज झाल्यावर स्कूटर 178 किमीपर्यंत धावू शकते, मात्र प्रत्यक्ष वापरात ही रेंज रस्त्याची स्थिती आणि वाहनावरील वजनानुसार कमी-जास्त होऊ शकते.

पॉवरसाठी स्कूटरमध्ये HyperZen हे इन-व्हील हायपरड्राईव्ह मोटर देण्यात आलं असून ते 4.2 kW म्हणजेच 5.63 hp इतकी पीक पॉवर तयार करतं. यामुळे स्कूटरचा वेग 75 किमी प्रतितासापेक्षा जास्त होऊ शकतो. रायडिंगसाठी Eco, Ride आणि Sport असे तीन मोड्स दिले असून सोबतच रिव्हर्स मोड, क्रूझ कंट्रोल आणि रीजनरेटिव्ह ब्रेकिंग सिस्टीमदेखील उपलब्ध आहे.

स्टोरेजच्या बाबतीत ही स्कूटर खूपच व्यावहारिक ठरते. सीटखालच्या बूट स्पेसमध्ये दोन हेल्मेट्स सहज मावतात. त्याशिवाय लॉक करता येणारा कप्पा, मोबाईल आणि बॉटल ठेवण्यासाठी जागा, कपडे ठेवण्यासाठी वेगळी सोय आणि वायरलेस चार्जिंगचीही सुविधा यात देण्यात आली आहे. मोठा फ्लोअरबोर्ड असल्याने मध्यम आकाराचं सामानही सहज ठेवता येतं.

टेक्नॉलॉजीच्या बाबतीत स्कूटरमध्ये 5 इंचाचा TFT डिस्प्ले असून यावर टर्न-बाय-टर्न नॅव्हिगेशन, कॉल नोटिफिकेशन्स, राईड आणि चार्ज स्टॅटिस्टिक्स, युजर प्रोफाईल्स तसंच डॉक्युमेंट स्टोरेज अशा सुविधा मिळतात. यासोबतच Distance-to-Empty, FallSense, स्टँड-बेस्ड मोटर कट-ऑफ, सर्व्हिस रिमाइंडर्स आणि डिस्प्ले थीम्ससारखे फीचर्सही देण्यात आले आहेत. कनेक्टेड फीचर्समध्ये पेरेंटल लॉक, SecureLock, फर्मवेअर अपडेट्स, व्हेईकल हेल्थ चेक, SOS आणि DigiLocker कनेक्टिव्हिटीचा समावेश आहे.

हार्डवेअरबद्दल सांगायचं तर स्कूटरला ट्युबलेस टायर्ससह 12 इंची अलॉय व्हील्स देण्यात आले आहेत. समोर 220 मिमीची डिस्क ब्रेक तर मागच्या बाजूला CBS सिस्टीम आहे. सस्पेंशनसाठी समोर हायड्रोलिक टेलिस्कोपिक फॉर्क आणि मागे 5-स्टेप ॲडजस्टेबल नायट्रॉक्स गॅस-इमल्शन युनिट बसवण्यात आलं आहे. स्कूटरचा ग्राऊंड क्लिअरन्स 160 मिमी असून स्टँडर्ड पेलोड क्षमता 150 किलो इतकी आहे.

ही स्कूटर स्पार्कलिंग वाईन विथ शॅम्पेन गोल्ड, टेरा ग्रीन विथ शॅम्पेन गोल्ड, पर्ल व्हाईट आणि सॅटिन ब्लॅक अशा रंगांमध्ये उपलब्ध करून देण्यात आली आहे. BGauss च्या अधिकृत वेबसाईटवर दिलेल्या माहितीनुसार GST आणि चार्जरसह या स्कूटरची लिस्टेड किंमत 1.60 लाख रुपये आहे, तर PM E-Drive योजनेचा लाभ मिळाल्यानंतर प्रभावी एक्स-शोरूम किंमत 1.55 लाख रुपयांवर येते. अर्थात, अंतिम ऑन-रोड किंमत ही राज्य आणि शहरानुसार वेगळी असू शकते.