वारंवार पित्त होतंय? ढेकर आणि जळजळीपासून सुटका देणारे सोपे घरगुती उपाय

तुम्हालाही सारखा ॲसिडिटीचा त्रास होतो का? ढेकर येणे आणि छातीत जळजळ ही ॲसिडिटीची ठळक लक्षणं आहेत. कधीतरी हे होणं ठीक आहे, पण जर हा त्रास सतत आणि वारंवार होत असेल, तर समजून जा की पचनक्रिया सुधारायला हवी.

यासाठी सगळ्यात आधी आहाराकडे लक्ष द्या. तळलेले आणि मसालेदार पदार्थ जास्त खात असाल तर ते वेळीच कमी करा. रोजचा चहा-कॉफीचा कपही थोडा कमी करा. औषधांवर सारखं अवलंबून राहण्याऐवजी काही घरगुती उपाय करून बघता येतील, जे बरेच प्रभावी ठरतात.

आधी हे समजून घेऊया की ॲसिडिटी होते तरी का. खाण्याच्या आणि रोजच्या सवयी नीट नसल्या की पचनक्रियेवर त्याचा परिणाम होतो. पोटातलं ॲसिड वाढतं आणि ते परत अन्ननलिकेत येतं. यातूनच छातीत जळजळ, आंबट ढेकर, तोंडाला वाईट चव आणि उलटी झाल्यासारखं वाटणं अशी लक्षणं दिसू लागतात.

प्रसिद्ध आहारतज्ज्ञ श्वेता शाह यांनी यावर तीन उपाय सांगितले आहेत. पहिला उपाय म्हणजे सकाळची सुरुवात मनुकांनी करा. पित्ताचा त्रास कायम राहत असेल, तर रोज सकाळी उठल्यावर आदल्या रात्री भिजवलेल्या ८ मनुका खा. यातून फायबर आणि नैसर्गिक पोषक घटक शरीराला मिळतात आणि पचनक्रिया सुधारायला मदत होते, असं त्या सांगतात.

दुसरा उपाय म्हणजे जेवणानंतर बडीशेप खाण्याची सवय लावणं. दुपारच्या जेवणानंतर भिजवलेली बडीशेप खा, तर रात्रीच्या जेवणानंतर एक चमचा बडीशेप घ्या. पचनक्रियेला मदत करण्यासाठी बडीशेप पूर्वीपासून वापरली जाते आणि यामुळे पोट फुगण्याचा त्रासही कमी होऊ शकतो, असं त्यांचं म्हणणं आहे.

तिसरा उपाय म्हणजे शीतली किंवा शीतकारी प्राणायाम करणे. औषधांबरोबरच पित्त कमी करण्यासाठी प्राणायामही उपयोगी पडतो, असं आहारतज्ज्ञ सांगतात. यातलं जे तंत्र तुम्हाला सोयीचं वाटेल ते निवडा, मग ते शीतली असो वा शीतकारी, आणि दुपारच्या जेवणापूर्वी १० वेळा तर रात्रीच्या जेवणापूर्वी १० वेळा त्याचा सराव करा.

हे तीनही उपाय एका दिवसात परिणाम दाखवत नाहीत, त्यामुळे सातत्याने केले तरच खरा फरक जाणवेल, असंही सांगितलं गेलं आहे. दीर्घकालीन आराम हवा असेल तर या समस्येवर सगळ्या बाजूंनी उपाय करणं गरजेचं आहे. यासोबतच रोज जेवणानंतर १० मिनिटं चालण्याची किंवा वज्रासन करण्याची सवय लावा. तुम्हालाही पित्ताचा त्रास होत असेल, तर हे उपाय जरूर करून बघा.