घरच्या घरी बनवा टेस्टी स्ट्रीट स्टाईल शेजवान नूडल्स, वाचा सोपी रेसिपी

इंडो चायनीज पदार्थ लहान मुलांपासून मोठ्यांपर्यंत सगळ्यांनाच आवडतात. पण सध्या बाहेरच्या फेसाळ आणि भेसळयुक्त पदार्थांचं प्रमाण वाढलेलं असल्यामुळे घरी बनवलेले पदार्थ खाणं आरोग्याच्या दृष्टीने जास्त चांगलं ठरतं. त्यामुळे बाहेरून विकत आणण्याऐवजी घरीच शेजवान नूडल्स बनवले तर चवही मिळते आणि टेन्शनही राहत नाही.

चायनीज पदार्थांची आवड असणाऱ्यांसाठी शेजवान नूडल्स हा पटकन तयार होणारा आणि चविष्ट पर्याय आहे. यात रंगीबेरंगी भाज्या, शेजवान सॉस आणि वेगवेगळे मसाले वापरले जातात, त्यामुळे नूडल्सला तिखट आणि चटपटीत चव येते. हे बनवायला फार वेळही लागत नाही. घरात असलेल्या भाज्या वापरून अगदी सोप्या पद्धतीने रेस्टॉरंटसारखे व्हेज शेजवान नूडल्स तयार करता येतात. संध्याकाळी भूक लागली असेल, विकेंडला काहीतरी वेगळं खायचं असेल किंवा घरच्या पार्टीसाठी मेनू ठरवायचा असेल, तेव्हा ही रेसिपी नक्की ट्राय करता येईल.

यासाठी लागणारं साहित्य असं - नूडल्स २ पॅकेट, तेल २ ते ३ चमचे, बारीक चिरलेला लसूण १ चमचा, बारीक चिरलेलं आलं १ चमचा, बारीक चिरलेला कांदा १, बारीक चिरलेलं गाजर १, बारीक चिरलेली शिमला मिरची १, बारीक चिरलेला कोबी १ कप, स्प्रिंग ओनियन २ चमचे, शेजवान सॉस २ ते ३ चमचे, सोया सॉस १ चमचा, टोमॅटो सॉस १ चमचा, व्हिनेगर १ चमचा, मिरी पावडर अर्धा चमचा आणि चवीनुसार मीठ.

कृती करताना आधी एका मोठ्या भांड्यात पाणी उकळून त्यात थोडं मीठ आणि तेलाचे काही थेंब घालावेत. त्यात नूडल्स टाकून पॅकेटवरच्या सूचनेप्रमाणे शिजवावेत. नूडल्स मऊ झाले की लगेच गाळून थंड पाण्याखाली धुवावेत आणि बाजूला ठेवावेत. त्यानंतर कढईत किंवा वोकमध्ये तेल गरम करून त्यात बारीक चिरलेलं आलं आणि लसूण घालून काही सेकंद परतावं. मग त्यात कांदा, गाजर, शिमला मिरची आणि कोबी घालून मोठ्या आचेवर भाज्या थोड्या कुरकुरीत राहतील अशा पद्धतीने परताव्यात.

भाज्यांमध्ये शेजवान सॉस, सोया सॉस आणि टोमॅटो सॉस घालून नंतर व्हिनेगर आणि मिरी पावडर मिसळावी आणि सगळं मोठ्या आचेवर एकत्र करावं. मग शिजवलेले नूडल्स कढईत घालून, ते तुटणार नाहीत याची काळजी घेत दोन चमचे किंवा चिमट्याच्या मदतीने हलक्या हाताने मिश्रणात मिसळावेत. सोया सॉस आणि शेजवान सॉसमध्ये आधीच मीठ असल्यामुळे मीठ गरजेपुरतंच घालावं. नूडल्स २ ते ३ मिनिटं मोठ्या आचेवर परतत राहावेत, म्हणजे सॉस नूडल्सला व्यवस्थित लागतो आणि भाज्यांचा कुरकुरीतपणाही टिकून राहतो. शेवटी गॅस बंद करून वरून बारीक चिरलेला स्प्रिंग ओनियन घालावा आणि गरमागरम व्हेज शेजवान नूडल्स शेजवान चटणी किंवा आवडीच्या सॉससोबत सर्व्ह करावेत.