मुलांचे जुने कपडे, खेळणी, पाळणा घरात ठेवावा का, वास्तुशास्त्राचा सल्ला

घरातल्या मुलांचे लहानपणीचे कपडे, बूट, खेळणी आणि पाळणा जपून ठेवणं हा अनेक पालकांसाठी भावनिक निर्णय असतो. मूल मोठं होत जातं तसतशा या वस्तू आकाराने लहान पडतात किंवा जुन्या होतात, तरी त्या फेकून द्यायचा जीव होत नाही. पण या साठवलेल्या वस्तूंची संख्या वाढत जाते, तेव्हा त्यांचं नेमकं काय करायचं हा प्रश्न पडतोच. वास्तुशास्त्रानुसार अशा वस्तूंबाबत काही ठराविक संकेत सांगितले जातात. घरात ठेवलेल्या गोष्टींचा परिणाम वातावरणावर आणि घरातल्या सकारात्मक ऊर्जेवर होतो, असं मानलं जातं. त्यामुळे मुलांच्या जुन्या वस्तू घरात ठेवणं योग्य की अयोग्य, हे वास्तुशास्त्राच्या दृष्टिकोनातून समजून घेऊया.

सर्वात आधी बोलू या जुन्या कपड्यांबद्दल. वास्तुशास्त्रानुसार बरेच दिवस न वापरलेले मुलांचे कपडे उगाच घरात साठवून ठेवू नयेत. विशेषतः फाटलेले, मळलेले किंवा खराब झालेले कपडे घरातच ठेवण्याऐवजी गरजू लोकांना देऊन टाकणं जास्त चांगलं मानलं जातं. असं केल्याने घरातला उगाचचा पसारा कमी होतो आणि जागा नीटनेटकी राहते. तरीही मुलांच्या आठवणी जपणारे काही खास कपडे तुम्हाला जपून ठेवायचे असतील, तर ते स्वच्छ धुऊन, व्यवस्थित घडी घालून, कोरड्या आणि नीटनेटक्या जागी ठेवता येतात.

हाच नियम खेळण्यांनाही लागू पडतो. तुटलेली, खराब झालेली किंवा बरेच दिवस वापरातच नसलेली खेळणी घरात ठेवणं वास्तुशास्त्राच्या दृष्टीने योग्य मानलं जात नाही. तुटलेल्या वस्तूंचा संबंध नकारात्मकतेशी जोडला जातो, असं सांगितलं जातं. त्यामुळे तुटलेली खेळणी दुरुस्त होणार असतील तर ती दुरुस्त करून घ्यावीत, नाहीतर घरातून काढून टाकणंच बरं. चांगल्या स्थितीत असलेली आणि उपयोगी खेळणी छोट्या मुलांना देता येतात किंवा गरजू लोकांना दान करता येतात.

बाळाचा पाळणा आणि त्याचे बूट यांच्याशी पालकांचं भावनिक नातं खूप घट्ट असतं. पण वास्तुशास्त्रानुसार न वापरला जाणारा पाळणा घराच्या एखाद्या कोपऱ्यात कित्येक वर्षं धूळ खात पडून राहू देऊ नये. पुढे कधीतरी परत वापरायचा असेल, तर तो स्वच्छ करून कोरड्या आणि सुरक्षित जागी ठेवावा. भंगार सामानात, तुटक्या वस्तूंमध्ये किंवा घाणीत पाळणा ठेवणं योग्य मानलं जात नाही. तो वापरायचाच नसेल तर गरजू कुटुंबाला दान करणं हा एक चांगला पर्याय ठरू शकतो.

वास्तुशास्त्रानुसार मुलांच्या जुन्या वस्तूंची वेळोवेळी तपासणी करत राहावी आणि आता गरज नसलेल्या वस्तू काढून टाकाव्यात. कपडे आणि खेळणी चांगल्या स्थितीत असतील पण वापरात नसतील, तर त्या दुसऱ्याला देऊन टाकाव्यात. कपाटात किंवा साठवणीच्या खोलीत निरुपयोगी वस्तूंऐवजी फक्त रोजच्या वापरातल्या गोष्टीच ठेवाव्यात. मात्र ज्या वस्तूंचा कुटुंबातल्या सदस्यांशी खरोखर भावनिक जिव्हाळा आहे, अशाच आठवणींच्या वस्तू जपून ठेवाव्यात, असं वास्तुशास्त्र सांगतं.