किरण गायकवाडचं दिग्दर्शकीय पदार्पण, 'F.I.R. NO. 469'मधून सामान्य माणसाची गोष्ट मांडणार
अभिनेता किरण गायकवाड यांनी लिहिलेला आणि दिग्दर्शित केलेला सस्पेन्स-थ्रिलर चित्रपट 'F.I.R. NO. 469' २२ जानेवारीला प्रदर्शित होणार आहे.
अनेक मालिका आणि चित्रपटांमधून दमदार अभिनयाने ओळख निर्माण केलेला अभिनेता किरण गायकवाड आता दिग्दर्शक म्हणून पहिल्यांदाच प्रेक्षकांसमोर येत आहे. त्याने लिहिलेला आणि दिग्दर्शित केलेला 'F.I.R. NO. 469' हा सस्पेन्स-थ्रिलर चित्रपट २२ जानेवारी रोजी मोठ्या पडद्यावर प्रदर्शित होणार आहे. या चित्रपटाचं पोस्टर नुकतंच रिलीज झालं असून त्यातून कथेबद्दलची उत्सुकता आधीच वाढली आहे.
बिग ब्रेन प्रॉडक्शन्स आणि आनंदी एंटरटेनमेंट या दोन बॅनरखाली हा चित्रपट तयार झाला आहे. निलेश राठी, प्राची राऊत आणि सचिन अग्रवाल हे चित्रपटाचे निर्माते असून अर्चना नरेश भुतडा सहनिर्माती म्हणून जोडल्या गेल्या आहेत. त्र्यंबक डागा आणि मोहसीन खान यांनी सहयोगी निर्माते म्हणून काम पाहिलं आहे. कथा-पटकथा आणि दिग्दर्शन किरण गायकवाडचं असून योगेश कोळी यांनी छायांकन सांभाळलं आहे.
'F.I.R. NO. 469' या चित्रपटातून एका सर्वसामान्य नागरिकाची गोष्ट पडद्यावर येणार आहे. सत्ता, राजकारण, पैसा, गुन्हा, पोलीस प्रक्रिया आणि प्रशासन अशा सगळ्या गोष्टींच्या गुंत्यात अडकलेला हा माणूस नेमका कुठे जाऊन पोहोचतो, हा प्रवास सस्पेन्स आणि थ्रिलरच्या अंगाने उलगडत जाणार आहे.
पोस्टरमध्ये पोलीस स्टेशनमधल्या एका बाकड्यावर बसलेला सामान्य माणूस दिसतो. त्याच्या चेहऱ्यावरची हतबलता आणि भोवतालचं वातावरण पाहून पुढे नेमकं काय घडणार आहे, याबद्दल कुतूहल तयार होतं. पोस्टरच्या मागच्या भिंतीवर दिसणारं 'सत्यमेव जयते' हे वाक्यही लक्ष वेधून घेतं. या एका पोस्टरमधूनच सामान्य माणूस आणि व्यवस्था यांच्यातल्या संघर्षाची झलक मिळत असल्याने प्रेक्षकांची उत्सुकता आणखी वाढली आहे.
चित्रपटात मराठी मनोरंजनसृष्टीतले अनेक लोकप्रिय कलाकार महत्त्वाच्या भूमिकांमध्ये दिसणार आहेत. यात नचिकेत पूर्णपात्रे, प्रसाद ओक, अमृता धोंगडे, राहुल मगदूम, निखिल चव्हाण, हार्दिक जोशी, अंकिता लांडे, देवेंद्र गायकवाड, रमेश परदेशी, सुहास शिरसाट, योगेश शिरसाट, चेतन चावडा, अंजली जोगळेकर, अंकुश मांडेकर, मीरा सारंग आणि चेतन रायकर यांचा समावेश आहे.
चित्रपटाबद्दल बोलताना किरण गायकवाड म्हणाला, "एका कॉमन मॅनची गोष्ट 'F.I.R. NO. 469' या चित्रपटात आहे. अत्यंत नाट्यमय घटना-घडामोडींमधून ही गोष्ट उलगडत जाते. समाजातील वेगवेगळे पदर त्यातून कळत जातात." प्रेक्षक ही कथा सुरुवातीपासून शेवटपर्यंत खिळून पाहतील, अशा पद्धतीने चित्रपटाची मांडणी केल्याचं तो पुढे सांगतो. त्यामुळे अभिनयाबरोबरच किरण गायकवाडचं दिग्दर्शनही यंदा प्रेक्षकांसाठी खास ठरणार आहे.
'F.I.R. NO. 469' हा सस्पेन्स-थ्रिलर चित्रपट २२ जानेवारीला थिएटरमध्ये प्रदर्शित होणार आहे.
