अभिजीत सावंतने बाप्पासाठी गायलं 'गणा धाव रे'; लेकींच्या सुरेल साथीने गाणं झालं खास

सगळीकडे गणपती बाप्पाच्या आगमनाची जय्यत तयारी सुरू असताना गायक अभिजीत सावंतने बाप्पाच्या स्वागतासाठी खास गाणं प्रेक्षकांसमोर आणलं आहे. 'गणा धाव रे' या शब्दांत अभिजीतने आपल्या आवाजात बाप्पाला साद घातली आहे. या गाण्याचं वैशिष्ट्य म्हणजे यात अभिजीतला त्याच्या दोन्ही मुलींची साथ मिळाली आहे.

बाप्पा घरोघरी येतात तेव्हा वातावरण भक्तिमय आणि उत्साहाने भरून जातं. नेमकं हेच वातावरण डोळ्यासमोर ठेवून 'गणा धाव रे' हे गाणं तयार करण्यात आलं आहे. या गाण्यात अभिजीत सावंतने केवळ गायनच केलं नाही, तर त्यात अभिनयही केला आहे. त्यामुळे हे गाणं फक्त ऐकण्यापुरतं न राहता पाहण्यासाठीही तितकंच खास ठरलं आहे.

अभिजीतच्या अहाना आणि समीरा या दोन्ही मुलींनी या गाण्यासाठी बॅकग्राऊंड व्होकल्स दिले आहेत. त्यामुळे हे गाणं अभिजीतसाठी नेहमीपेक्षा जास्त खास ठरलं आहे. अभिजीतच्या संगीत प्रवासातील हे तिघांचं म्हणजे अभिजीत, अहाना आणि समीरा यांचं पहिलंच एकत्र गाणं आहे, आणि तेही खास बाप्पासाठी तयार झालं आहे. वडील आणि दोन्ही मुली अशा तिघांनी मिळून एकत्र गाणं करण्याची ही पहिलीच वेळ असल्यामुळे या गाण्याला एक वेगळं भावनिक महत्त्व मिळालं आहे.

या गाण्याबाबत बोलताना अभिजीत सावंत म्हणाला, "बाप्पाच्या गाण्याला माझ्या मुलीची साथ लाभणं हा बाप्पाचा योगायोग आहे. अहाना आणि समीरा यांच्यासोबत 'गणा धाव रे' रेकॉर्ड केलं तेव्हाची भावना खूप भावनिक होती."

पुढे तो म्हणाला, "माझ्या संगीत प्रवासातील आमच्या तिघांचं हे पहिलं गाणं खास बाप्पासाठी केलं, याहून मोठी गोष्ट काय असणार! बाप्पाचं सगळ्यांसोबत एक सुंदर नातं असतं, तेच या गाण्यातून प्रेक्षकांना अनुभवायला मिळणार आहे."

अभिजीत सावंतने आपल्या वैविध्यपूर्ण गायनशैलीने कायम प्रेक्षकांच्या मनात वेगळं स्थान निर्माण केलं आहे. त्याची गाणी फक्त जुन्या पिढीलाच नाही, तर आजची तरुण पिढीही तितक्याच आवडीने ऐकते. त्यामुळे त्याचं कुठलंही नवीन गाणं प्रदर्शित झालं की सोशल मीडियावर लगेच त्याची चर्चा सुरू होते. त्याच्या आजवरच्या गाण्यांना मिळालेला प्रतिसाद पाहता 'गणा धाव रे' या गाण्याबाबतही चाहत्यांमध्ये उत्सुकता निर्माण झाली आहे.

आता 'गणा धाव रे' या गणपती गीताच्या रूपाने अभिजीतने चाहत्यांना भक्तिमय संगीताची मेजवानी दिली आहे. आपल्या दोन्ही लेकींसोबत गायलेलं हे गाणं अभिजीतसाठी आणि त्याच्या चाहत्यांसाठीही एक खास आठवण ठरणार आहे. वडील आणि मुलींनी मिळून साकारलेलं हे गाणं गणेशोत्सवाच्या काळात खास चर्चेचा विषय ठरत आहे.