गौरव खन्ना-आकांक्षा चमोला घटस्फोट: १० कोटींच्या पोटगीच्या चर्चेवर आकांक्षाचं स्पष्टीकरण

गौरव खन्ना आणि आकांक्षा चमोला यांच्या नात्याबद्दल गेल्या काही दिवसांपासून चर्चांना उधाण आलं होतं. दोघे वेगळे राहत असल्याचं समोर आल्यानंतर घटस्फोटाच्या बातम्यांनीही जोर धरला. या दरम्यान आकांक्षाने गौरवकडून तब्बल १० कोटी रुपये पोटगी म्हणून मागितल्याची अफवा सोशल मीडियावर पसरली होती. आता आकांक्षाने याच सगळ्या चर्चांवर उत्तर दिलं असून हे दावे साफ फेटाळून लावले आहेत.

'लॉक अप २' या शोमध्ये दिसलेल्या आकांक्षा चमोलाने नुकतीच मॅशेबल इंडियाला मुलाखत दिली. या मुलाखतीत तिला १० कोटींच्या पोटगीबद्दलच्या चर्चेवर प्रश्न विचारला गेला. यावर आकांक्षाने गमतीत उत्तर देत सांगितलं, "जर मी ते मागितले असते आणि मला ते मिळाले असते, तर मी आज इथे बसले नसते."

यावर आणखी बोलताना आकांक्षा म्हणाली, "जर माझ्याकडे खरंच एवढे पैसे असते, तर मी केव्हाच हा देश सोडून गेले असते." अशा पद्धतीने तिने १० कोटींच्या पोटगीची मागणी केल्याची चर्चा पूर्णपणे नाकारली. तिचं हे उत्तर सध्या सोशल मीडियावर बऱ्यापैकी व्हायरल झालं आहे.

यांशिवाय आकांक्षाने आणि गौरवच्या वयातील फरकावरून तिला ट्रोल करणाऱ्यांनाही चोख उत्तर दिलं. काही सोशल मीडिया युजर्सनी गौरव तिच्यापेक्षा १० वर्षांनी मोठा असल्याने आकांक्षाला 'शुगर डॅडीच्या शोधात' असल्याचं म्हटलं होतं. या ट्रोलिंगला उत्तर देताना आकांक्षा म्हणाली की ३०, ४० किंवा ५० वर्षांच्या पुरुषांना 'शुगर डॅडी' म्हणतात. गौरवबद्दल बोलताना ती म्हणाली, "१० वर्षांनी मोठा असणारा पुरुष 'शुगर डॅडी' असू शकत नाही."

आकांक्षाने तिच्या इन्स्टाग्राम अकाउंटबद्दलही स्पष्टीकरण दिलं. तिच्या इन्स्टाग्राम युझरनेममध्ये अजूनही 'आकांक्षा गौरव खन्ना' हे नाव कायम असल्याने युजर्सकडून वारंवार प्रश्न विचारले जात होते. यावर तिने सांगितलं की मेटाशी संबंधित एका अडचणीमुळे ती हे युझरनेम बदलू शकत नाही. "मेटाचे लोक ते बदलत नाहीत," असं तिने स्पष्ट केलं.

आकांक्षा चमोला आणि गौरव खन्ना यांनी २४ नोव्हेंबर २०१६ रोजी कानपूरमध्ये तीन दिवसांच्या सोहळ्यात लग्न केलं होतं. 'लॉक्ड अप: ट्रुथ ऑर डेअर'च्या प्रीमियरदरम्यान आकांक्षाने त्यांच्या विभक्त होण्याची सार्वजनिक घोषणा केली होती. दोघे जवळपास एक वर्षापासून वेगळे राहत असल्याचं तिने त्यावेळी सांगितलं होतं. हा निर्णय दोघांनी परस्पर संमतीने घेतला असून त्यांच्यात कोणतीही कटुता नसल्याचंही तिने स्पष्ट केलं होतं.