फक्त १२ वर्षांच्या सेवेनंतर मेजर ऋषभ सिंग संब्याल यांचा लष्कराला रामराम

अवघ्या ३० वर्षांचे असताना आणि करिअर बहरात असताना मेजर ऋषभ सिंग संब्याल यांनी भारतीय सैन्याची वर्दी उतरवण्याचा निर्णय घेतला आणि सगळ्यांनाच धक्का बसला. सोशल मीडियावर 'नॅशनल क्रश' म्हणून ओळखले जाणारे आणि राष्ट्रपती द्रौपदी मुर्मू यांचे माजी ADC राहिलेले संब्याल यांच्या या तडकाफडकी सेवानिवृत्तीची चर्चा सध्या देशभर सुरू आहे. NDA पासून सुरू झालेला आणि थेट राष्ट्रपती भवनापर्यंत पोहोचलेला त्यांचा हा प्रवास एखाद्या सिनेमाच्या कथेसारखा वाटावा इतका थरारक आहे.

त्यांनी नोकरी का सोडली, हे जाणून घेण्यासाठी सगळे उत्सुक आहेत. राज शमाणी यांच्या पॉडकास्टवर बोलताना खुद्द मेजर ऋषभ यांनीच या सगळ्या चर्चांना पूर्णविराम दिला. त्यांनी सांगितले की आयुष्यात असे काही महत्त्वाचे टप्पे आले, ज्यामुळे त्यांना हा अवघड निर्णय घ्यावा लागला. जवळपास १२ वर्षे त्यांनी लष्करात सेवा बजावली. या काळात लडाखमधील तैनातीपासून ते अनेक जोखमीच्या मोहिमांपर्यंत आणि राष्ट्रपती भवनातील कडक शिस्तीच्या ड्युटीपर्यंत सगळे अनुभवले.

२०१३ साली NDA परीक्षा पास झाल्यावर त्यांनी २०१४ मध्ये १३३ व्या कोर्समधून प्रशिक्षण सुरू केले. २०२१ च्या प्रजासत्ताक दिनाच्या परेडमध्ये त्यांनी जाट रेजिमेंटच्या पथकाचे नेतृत्व केले आणि 'बेस्ट मार्चिंग कंटिंजेंट'ची ट्रॉफी पटकावली. पुढे ते सैन्यातील अतिशय खतरनाक आणि एलिट युनिट असलेल्या '४ पॅरा स्पेशल फोर्सेस'मध्ये दाखल झाले आणि मानाचा 'बलिदान बॅज' मिळवला.

मार्च २०२३ मध्ये देशातील सर्वात गोपनीय आणि प्रतिष्ठेच्या पदांपैकी एक असलेल्या राष्ट्रपतींच्या ADC पदावर त्यांची निवड झाली. राष्ट्रपती भवनातील तीन वर्षांच्या कार्यकाळात त्यांनी परदेशी आणि देशी पाहुण्यांचे स्वागत, पंतप्रधान कार्यालयासोबत समन्वय आणि राष्ट्रपतींच्या सुरक्षेची कडक जबाबदारी अगदी चोख सांभाळली. याच काळात त्यांच्या साधेपणाचे आणि व्यक्तिमत्त्वाचे व्हिडिओ सोशल मीडियावर तुफान व्हायरल झाले आणि ते रातोरात 'नॅशनल क्रश' बनले.

आता पेन्शनचा मुद्दा आहे. लष्कराच्या नियमांनुसार, कोणताही अधिकारी किमान २० वर्षांची सेवा पूर्ण केल्यावरच पूर्ण पेन्शनसाठी पात्र ठरतो. २० वर्षे पूर्ण होण्याआधी म्हणजेच 'प्री-मॅच्युअर रिटायरमेंट' घेतल्यास वेगळे नियम लागू होतात. मेजर ऋषभ सिंग संब्याल यांनी १२ वर्षांची सेवा पूर्ण केली असल्याने, नियमांनुसार त्यांना रिटायरमेंट बेनिफिट्स, ग्रॅच्युटी, माजी सैनिकांना मिळणाऱ्या सुविधा आणि वैद्यकीय लाभ मिळतील, पण पेन्शन मात्र मिळणार नाही.

लष्कर सोडल्यावर पुढे काय, याबद्दलही त्यांनी संकेत दिले आहेत. उच्च दर्जाच्या अधिकाऱ्यांना सैन्य सोडल्यानंतर कॉर्पोरेट क्षेत्र, स्ट्रॅटेजिक सिक्युरिटी सल्ला, युवकांचे सक्षमीकरण आणि लीडरशिप अशा क्षेत्रांत मोठ्या संधी असतात. मेजर ऋषभ सिंग संब्याल यांनी स्वतः सांगितले आहे की, पुढच्या काळात ते देशातील तरुणांना प्रेरणा देण्यासाठी आणि राष्ट्रनिर्माणाच्या नव्या प्रवासावर काम करणार आहेत.