2027 कावासाकी व्हर्सिस 1100 भारतात लाँच, किंमत 13.89 लाख रुपये; जाणून घ्या खास फीचर्स
कावासाकीने आपली लोकप्रिय अॅडव्हेंचर टूरिंग मोटरसायकल भारतीय बाजारात आणली असून यात दमदार इंजिन आणि भरगच्च फीचर्स देण्यात आले आहेत.
कावासाकी इंडियाने आपली अॅडव्हेंचर टूरिंग मोटरसायकल व्हर्सिस 1100 चे 2027 मॉडेल भारतीय बाजारात आणले आहे. या बाईकची एक्स-शोरूम किंमत 13.89 लाख रुपये ठेवण्यात आली आहे. कंपनीने ही मोटरसायकल फक्त एकाच फुली-लोडेड 'स्टँडर्ड' व्हेरिएंटमध्ये आणली असून, ती मेटॅलिक मॅट ग्राफीन स्टील ग्रे आणि मेटॅलिक डायब्लो ब्लॅक अशा दोन रंगांत उपलब्ध आहे. विशेष बाब म्हणजे गेल्या वर्षीच्या मॉडेलच्या तुलनेत किंमत, डिझाइन, फीचर्स किंवा इंजिनमध्ये कोणताही मोठा बदल करण्यात आलेला नाही, म्हणजेच जुना फॉर्म्युला कायम ठेवत कंपनीने ही बाईक पुढे नेली आहे.
लांब पल्ल्याच्या प्रवासाला लक्षात घेऊन या बाईकचे डिझाइन तयार करण्यात आले आहे. यात ट्विन LED हेडलॅम्प, कॉम्पॅक्ट LED इंडिकेटर्स, अॅडजस्टेबल विंडस्क्रीन, रुंद शाउड्स आणि स्प्लिट सीट देण्यात आली आहे. यातील अॅडजस्टेबल विंडस्क्रीनमुळे रायडरला हवेच्या दाबापासून जास्त संरक्षण मिळते, तर रुंद शाउड्समुळे इंजिनाच्या उष्णतेपासूनही थोडा बचाव होतो. 21 लिटरची मोठी फ्युल टाकी असल्याने लांबच्या प्रवासात वारंवार पेट्रोल भरायची गरज पडत नाही. 17 इंचाच्या अलॉय व्हील्सवर ट्युबलेस टायर्स बसवण्यात आले आहेत.
फीचर्सच्या बाबतीतही ही बाईक बरीच भरगच्च आहे. यात ऑल-LED लाइटिंगसोबतच इलेक्ट्रॉनिक क्रूझ कंट्रोल, USB Type-C चार्जिंग पोर्ट, कॉर्नरिंग ABS, ट्रॅक्शन कंट्रोल, मल्टिपल पॉवर मोड्स आणि इंजिन ब्रेकिंग कंट्रोल दिलेले आहे. याशिवाय असिस्ट आणि स्लिपर क्लच तसेच इकॉनॉमिकल रायडिंग इंडिकेटरही मिळतो, जो रायडरला इंधन किती काटकसरीने वापरले जाते आहे हे दाखवतो. यामुळे ही बाईक शहरातल्या रोजच्या वापरासोबत हायवेवरच्या लांब टूरिंगसाठीही सोयीची ठरू शकते.
इंजिनबद्दल बोलायचं झालं तर व्हर्सिस 1100 मध्ये 1,099cc चे 4-सिलेंडर लिक्विड-कूल्ड इंजिन बसवण्यात आले आहे. हे इंजिन 133 bhp पॉवर आणि 112 Nm टॉर्क तयार करते आणि त्याला 6-स्पीड गिअरबॉक्स जोडलेला आहे. बाईकचे ड्राय वजन 235 किलो, ग्राउंड क्लीयरन्स 150 मिलिमीटर आणि सीट हाइट 820 मिलिमीटर इतकी आहे. पुढच्या बाजूला 43 मिलिमीटरचे टेलिस्कोपिक फोर्क्स तर मागच्या बाजूला गॅस-चार्ज्ड मोनोशॉक सस्पेन्शन देण्यात आले आहे, ज्यामुळे खडबडीत रस्त्यांवरही चांगले संतुलन मिळते.
भारतीय बाजारात व्हर्सिस 1100 ची थेट टक्कर ट्रायम्फ टायगर 900 GT आणि बीएमडब्ल्यू F900 GS सारख्या प्रीमियम अॅडव्हेंचर मोटरसायकलींशी होणार आहे. दरम्यान, कावासाकीच्या काही नॉन-E20 मॉडेल्सवर 30 सप्टेंबर 2026 पर्यंत डिस्काउंट आणि इतर फायदे उपलब्ध आहेत.
