नागपुरात काली-पिवळी मारबतीची भेट, डीजेविना उत्साह कायम, कॉकरोच बडग्याने वेधले लक्ष

नागपुरात शुक्रवारी 145 वर्षांची ऐतिहासिक परंपरा असलेला मारबत आणि बडग्या उत्सव मोठ्या उत्साहात पार पडला. जुन्या शहरातल्या वस्त्यांमधून नेहमीप्रमाणे मिरवणुका निघाल्या. दरवर्षीप्रमाणे यंदाही काली आणि पिवळी मारबतीची भेट हे या उत्सवाचं खास आकर्षण ठरलं.

यावेळीही वेगवेगळ्या मुद्द्यांवर भाष्य करणारे बडग्या तयार करण्यात आले होते. यात पाकिस्तानचे आर्मी चीफ फील्ड मार्शल सय्यद आसिम मुनीर, महागाई, 'कॉकरोच जनता पार्टी' असे विषय प्रामुख्याने होते. चुकीच्या रुढी-परंपरा, महागाई, गुन्हेगारी आणि राजकारणावर टीका करणाऱ्या या उत्सवात यंदाही ज्वलंत विषयांवर भाष्य करण्यात आलं.

भालदारपुऱ्यात अविघ्न बडग्या उत्सव मंडळाने अध्यक्ष सोमू बिराह यांच्या मार्गदर्शनाखाली नागपूर महानगरपालिकेतील महिला सफाई कर्मचाऱ्यांच्या सुरक्षेचा मुद्दा मांडणारा बडग्या तयार केला, जो सगळ्यांचं लक्ष वेधून घेणारा ठरला. मस्कासाथमध्ये छत्रपती शिवाजी पार्क बडग्या उत्सव कमिटीने पाकिस्तानचे आर्मी चीफ फील्ड मार्शल सय्यद आसिम मुनीर यांच्यावर टीका करणाऱ्या बडग्याचंही लोकांनी कौतुक केलं. यात 'फील्ड मार्शल', 'फेल कमाल, बलुचिस्तानात बुरा हाल' अशा गमतीशीर घोषणा होत्या.

भारतीय जनता पार्टीच्या बडग्या उत्सव समितीने अध्यक्ष सचिन थापे यांच्या नेतृत्वाखाली राजकीय घडामोडींवर टिप्पणी करताना 'कॉकरोच जनता पार्टी हटाओ बडग्या' आणि 'सावजींचा अपमान करणारे मुंढे हटाओ, बडग्या' अशा घोषणा दिल्या.

पंचकुव्यात संग्राम बडग्या उत्सव मंडळ आणि युवा शक्ती बडग्या उत्सव समितीने वाढत्या महागाईविरोधात राग व्यक्त करत बडग्या काढला. विजय पराटे यांच्या नेतृत्वाखालील युवा शक्ती बडग्या उत्सव समिती गेल्या चाळीस वर्षांपासून बडग्या काढत आहे. बालाभाऊ पेठ भागातल्या मुलांनी बनवलेला बाल बडग्या उत्तर नागपुरात मिरवण्यात आला. हा बडग्या मुख्य मिरवणुकीत सामील न होता आजूबाजूच्या भागात फिरला, याबद्दल लोकांमध्ये उत्सुकता होती.

भालदारपुऱ्यात एकता मारबत उत्सव मंडळाचे अध्यक्ष विजय मटेलकर यांच्या नेतृत्वाखाली एक खास व्हाइट मार्च काढण्यात आला. मार्च 2025 मध्ये मेरठमध्ये एका पत्नीने तिच्या प्रियकराच्या मदतीने मर्चंट नेव्हीत असलेल्या पतीची क्रूरपणे हत्या करून मृतदेहाचे तुकडे सिमेंटच्या ड्रममध्ये लपवले होते. या गुन्हेगारी प्रवृत्तीविरोधात हा मार्च काढण्यात आला.

पोलीस आयुक्त विश्वास नांगरे पाटील यांनी मारबत उत्सवादरम्यान कोणताही अनुचित प्रकार घडू नये यासाठी कडक सुरक्षा व्यवस्था ठेवली होती. सुमारे चार हजार पोलिसांची तुकडी तैनात करण्यात आल्याची माहिती आहे. दारू पिऊन गोंधळ घालणाऱ्यांना तात्काळ पोलीस कोठडीत घेण्याचे आदेश देण्यात आले होते. सुरक्षेसाठी तीन अतिरिक्त पोलीस आयुक्त, सात उपायुक्त, 14 सहायक आयुक्त, 55 इन्स्पेक्टर, 350 सहायक इन्स्पेक्टर, एसआरपीएफची एक तुकडी आणि सुमारे एक हजार होमगार्ड तैनात करण्यात आले होते. मिरवणुकीच्या मार्गावरची वाहतूक दुसऱ्या मार्गाने वळवण्यात आली होती.

पोलीस आयुक्तांनी घालून दिलेल्या नियमांनुसार यंदा मारबत उत्सवात मोठ्या आवाजाची डीजे यंत्रणा लावण्यात आली नव्हती, तरीही लोकांच्या उत्साहात कोणतीही कमतरता जाणवली नाही. यंदा नागपूर महानगरपालिकेने परदेशी नागरिकांनाही हा उत्सव पाहण्याची व्यवस्था केली होती, त्यानुसार अनेक परदेशी नागरिकांनी या उत्सवाचा प्रत्यक्ष आनंद घेतला.