Masala Appe Recipe: सणावाराच्या दिवसांत घरी आलेल्या पाहुण्यांसाठी बनवा झटपट तयार होणारे मसाला आप्पे, नोट करून

इडली, डोसा, आप्पे, उत्तप्पा असे दक्षिण भारतीय पदार्थ फक्त भारतातच नाही तर जगभरात प्रसिद्ध आहेत. हे पदार्थ फक्त सकाळच्या नाश्त्याला नाही तर जेवणातही खाल्ले जातात. इडली आणि डोसासोबत खोबऱ्याची चटणी आणि सांबार खायला सगळ्यांनाच आवडतं. डाळ आणि तांदूळ भिजवून यातले बहुतेक पदार्थ तयार केले जातात. दक्षिण भारतीय पदार्थांची ही यादी मोठी असून त्यातले अनेक पदार्थ आता घरोघरी बनवले जातात.

सणावाराचे दिवस आले की घरोघरी पाहुणे येणं सुरू होतं. अशावेळी पाहुण्यांच्या नाश्त्यासाठी कांदापोहे, उपमा, शिरा असे नेहमीचे पदार्थ बनवले जातात. पण पाहुण्यांना काहीतरी वेगळं खाऊ घालायचं असेल आणि तेही कमी वेळात, तर रव्याचे आप्पे हा पर्याय एकदम बेस्ट ठरतो. हे आप्पे अवघ्या दहा ते पंधरा मिनिटांत तयार होतात आणि त्यात वेगवेगळ्या भाज्या घातल्या की चवही खूप छान लागते. त्यामुळे कमी वेळात आणि सोप्या पद्धतीने काहीतरी नवीन बनवायचं असेल तर ही रेसिपी नक्की ट्राय करता येते.

मसाला आप्पे बनवण्यासाठी लागणारं साहित्य म्हणजे रवा, पोहे, तांदळाचं पीठ, दही, आंबट दही, बेकिंग सोडा, कांदा, टोमॅटो, हिरवी मिरची आणि मीठ. हे सगळं साहित्य साधारण प्रत्येकाच्या घरात सहज उपलब्ध असतं, त्यामुळे ही रेसिपी बनवण्यासाठी वेगळी तयारी करावी लागत नाही.

ही रेसिपी बनवायला सुरुवात करताना मिक्सरच्या भांड्यात आधी पोहे घालून बारीक वाटून घ्यायचे. त्यानंतर त्यात तांदळाचं पीठ आणि रवा घालून पुन्हा एकदा मिक्सरमधून फिरवून घ्यायचं. बारीक पीठ तयार झालं की ते वाटीत काढून त्यात दही घालून व्यवस्थित मिक्स करायचं. मिश्रण जास्त घट्ट वाटलं तर त्यात थोडं पाणी घालता येतं, जेणेकरून पीठाची घट्टपणा योग्य राहील.

त्यानंतर या मिश्रणात बारीक चिरलेला कांदा, टोमॅटो आणि हिरवी मिरची घालून चांगलं मिक्स करायचं. आवडीनुसार यात वेगवेगळ्या भाज्याही घालता येतात, त्यामुळे आप्प्यांची चव आणखी छान लागते. सगळ्यात शेवटी बेकिंग सोडा घालून मिश्रण नीट मिक्स करायचं आणि काही वेळ झाकण ठेवून बाजूला ठेवायचं, जेणेकरून पीठ मुरेल आणि आप्पे चांगले फुलून येतील.

त्यानंतर आप्पे पात्र गॅसवर गरम करायला ठेवायचं. त्यात तेल किंवा बटर घालून तयार केलेलं मिश्रण भरायचं आणि दोन्ही बाजूने कुरकुरीत होईपर्यंत आप्पे भाजून घ्यायचे. अशाप्रकारे सोप्या पद्धतीने आणि कमी वेळात झटपट तयार होणारे रव्याचे मसाला आप्पे तयार होतात, जे सणावाराच्या दिवसांत घरी आलेल्या पाहुण्यांना खाऊ घालण्यासाठी उत्तम पर्याय ठरतात.