तळोजातील लोढा लॉजिस्टिक पार्ककडे निघालेला 16 टन संशयित मांसाचा कंटेनर पकडला

उत्तर प्रदेशातून नवी मुंबईच्या दिशेने येत असलेला एक कंटेनर हिंदुत्ववादी संघटनेच्या कार्यकर्त्यांनी अडवला. या कंटेनरमध्ये तब्बल 16 टन संशयित मांस भरलेले होते. तळोजा भागातील लोढा लॉजिस्टिक पार्कमधील एका वेअरहाऊसच्या कोल्ड स्टोरेजकडे हा कंटेनर निघाला होता, अशी प्राथमिक माहिती समोर आली आहे. पर्युषण काळातच एवढ्या मोठ्या प्रमाणात मांसाची वाहतूक होत असल्याचे उघडकीस आल्यामुळे परिसरात खळबळ उडाली.

उत्तर प्रदेशातून मोठ्या प्रमाणात मांस घेऊन एक संशयित कंटेनर नवी मुंबईकडे निघाल्याची माहिती हिंदुत्ववादी संघटनेच्या कार्यकर्त्यांना आधीच मिळाली होती. ही माहिती मिळताच कार्यकर्त्यांनी त्या वाहनाचा पाठलाग करत रस्त्यातच कंटेनर थांबवला. कंटेनर उघडून तपासणी केली असता आतमध्ये सुमारे 16 टन मांस असल्याचे कार्यकर्त्यांच्या लक्षात आले. त्यानंतर त्यांनी तात्काळ स्थानिक हिल लाईन पोलीस स्टेशनला ही घटना कळवली.

पोलिसांना माहिती मिळताच पोलिसांचे पथक आणि अन्न व औषध प्रशासनाचे अधिकारी घटनास्थळी पोहोचले. पोलिसांनी कंटेनर ताब्यात घेतला असून पुढील तपास सुरू केला आहे.

या मांसाचा प्रकार अद्याप निश्चित झालेला नाही, त्यामुळे ते गोमांस आहे असा दावा सध्या करता येणार नाही. मांसाची शास्त्रीय तपासणी करण्यासाठी डॉक्टरांच्या पथकाला पाचारण करण्यात आले. डॉक्टरांच्या उपस्थितीत मांसाचे विविध नमुने घेतले गेले आणि ते तपासणीसाठी फॉरेन्सिक लॅबकडे पाठवण्यात आले. लॅबचा अहवाल आल्यानंतरच मांसाचा नेमका प्रकार स्पष्ट होणार असून, त्यानुसार पोलीस पुढची कायदेशीर कारवाई करणार आहेत.

पोलिसांकडून मिळालेल्या प्राथमिक माहितीनुसार, कंटेनरमधील मांस तळोजा येथील लोढा लॉजिस्टिक पार्कमधील एका वेअरहाऊसच्या कोल्ड स्टोरेजमध्ये साठवण्यासाठी नेले जात होते. हे मांस कोणी पाठवले, नेमके कुठून पाठवले गेले आणि पुढे कोणाला दिले जाणार होते, या सगळ्या गोष्टींची चौकशी पोलीस करत आहेत.

या प्रकरणामागे एखादे मोठे रॅकेट आहे का, याचाही पोलीस शोध घेत आहेत. वाहतुकीसाठी लागणारी कागदपत्रे, मांस नेमके कुठून आणले गेले, कोणत्या पुरवठादाराकडून आले आणि शेवटी हे मांस कोणाला किंवा कुठे पोहोचवायचे होते, या सगळ्या मुद्द्यांची चौकशी होणे गरजेचे आहे.

दरम्यान, हिंदुत्ववादी संघटनांनी या प्रकरणात आक्रमक भूमिका घेतली असून सखोल चौकशी आणि दोषी आढळणाऱ्यांवर कठोर कारवाई करण्याची मागणी केली आहे. मात्र मांस नेमके कोणत्या प्राण्याचे आहे, हे फॉरेन्सिक अहवाल आल्यानंतरच स्पष्ट होणार असल्याने तोपर्यंत त्याला 'संशयित मांस' म्हणणेच योग्य ठरेल.