'अडकित्ता'मधील मंगलच्या भूमिकेचा अनुभव सई ताम्हणकरने उलगडला

अभिनेत्री सई ताम्हणकर सध्या तिच्या आगामी मराठी चित्रपट 'अडकित्ता'मधील तिच्या खास भूमिकेमुळे चर्चेत आली आहे. या चित्रपटात सई एक महत्त्वाची व्यक्तिरेखा साकारताना दिसणार आहे. या भूमिकेतून मातृत्व, भावनिक जिव्हाळा आणि मुलासाठी योग्य निर्णय घेणं यासारखे संवेदनशील मुद्दे मांडले जात आहेत. चित्रपटाच्या निमित्ताने सईने तिच्या भूमिकेचा अनुभव आणि या व्यक्तिरेखेमुळे तिच्या दृष्टिकोनात झालेला बदल याबद्दल दिलखुलास गप्पा मारल्या.

'अडकित्ता'मध्ये सई ताम्हणकर सिद्धार्थ आणि सखी यांच्यासोबत स्क्रीन शेअर करते आहे. चित्रपटाच्या मध्यवर्ती संघर्षाच्या केंद्रस्थानी असलेल्या या तिन्ही कलाकारांमधील अभिनयाच्या देवाणघेवाणीबद्दल बोलताना सईने सांगितलं की, क्रिएटिव्ह विचारांची देवाणघेवाण हा या संपूर्ण प्रोसेसचा महत्त्वाचा भाग होता. सखीसोबत पहिल्यांदाच काम करण्याचा अनुभव तिच्यासाठी आनंददायी ठरला, तर सिद्धार्थसोबत सईने याआधीही अनेकदा काम केलेलं आहे. सिद्धार्थ त्याची व्यक्तिरेखा ज्या पद्धतीने साकारत होता, ते एक मित्र आणि सहकलाकार म्हणून पाहणं तिच्यासाठी खास होतं. सहकलाकारांसोबतचा हा अनुभव सईने "निव्वळ आनंद" असल्याचं म्हटलं.

'अडकित्ता'मधील मंगलची भूमिका साकारल्यानंतर सईचा नॅनींच्या जगाकडे पाहण्याचा दृष्टिकोनही बदलला. एखाद्या कुटुंबाचा भाग बनून त्या कुटुंबाच्या भविष्याच्या जडणघडणीत मदत करणं ही किती मोठी जबाबदारी असते, हे तिला या भूमिकेतून जवळून समजलं. नॅनींच्या कामाकडे अनेकदा केवळ एक नोकरी म्हणून पाहिलं जातं, पण प्रत्यक्षात त्या कुटुंबातील मुलांच्या संगोपनात आणि त्यांच्या भविष्यात महत्त्वाची भूमिका बजावत असतात, हे सईला या व्यक्तिरेखेमुळे जाणवलं. त्यासाठी कृतज्ञ राहणं आपण अनेकदा विसरतो, असंही तिने नमूद केलं.

मंगलच्या भूमिकेमुळे सईला एका तरुण काम करणाऱ्या आईसमोर असलेल्या आव्हानांचाही जवळून विचार करता आला. एक स्वतंत्र महिला म्हणून काम, कुटुंब आणि मुलांच्या गरजा यांच्यात समतोल साधताना जी द्विधा मनःस्थिती निर्माण होते, ती तिने या भूमिकेतून अनुभवली. ही संपूर्ण प्रोसेस किती अवघड आणि आव्हानात्मक असू शकते, याची जाणीव या भूमिकेमुळे झाल्याचं सईने सांगितलं. भविष्यात गरज पडली, तर या अनुभवातून मिळालेले धडे उपयोगी ठरतील, असंही तिने स्पष्ट केलं.

'अडकित्ता' पाहिल्यानंतर प्रेक्षकांनी नेमकं काय विचार करावा, याबद्दलही सईने आपलं मत मांडलं. तिच्या मते हा एक गोड आणि रिलेटेबल चित्रपट आहे. विशेषतः अनेक तरुण जोडप्यांना या कथेतील प्रसंग आणि भावनिक पैलू स्वतःच्या आयुष्याशी जोडलेले वाटू शकतात. या कथेचं वैशिष्ट्य म्हणजे आजपासून दशकभरानंतरही ती तितकीच रिलेटेबल वाटू शकते, असं सईचं म्हणणं आहे. हा चित्रपट ZEE5 या ओटीटी प्लॅटफॉर्मवर प्रदर्शित होणार असल्यामुळे त्याची पोहोच अधिक व्यापक होणार असून जगभरातील विविध भागांतील प्रेक्षकांपर्यंत तो पोहोचेल, याचा सईला आनंद आहे.