लडाखच्या खडतर वाटांवर रॉयल एनफिल्ड हिमालयन 450! ऑफ-रोड राइडचा भन्नाट अनुभव

लडाख म्हटलं की डोळ्यासमोर उंच पर्वत, वळणावळणाचे रस्ते आणि कायम लक्षात राहील अशी बाइक राइड उभी राहते. आता लडाखमधल्या बऱ्याच मोठ्या रस्त्यांवर चांगलं डांबरीकरण झालेलं आहे, त्यामुळे प्रवास आधीपेक्षा सोपा झाला आहे. पण खरी मजा अनुभवायची असेल तर मुख्य रस्ता सोडून खडकाळ आणि वाळवंटी ट्रेलवर उतरावं लागतं, आणि तिथली गंमत काही औरच असते. याच अनुभवासाठी रॉयल एनफिल्डने हिमालयन बेसकॅम्पदरम्यान 'लडाख अनचार्टेड' नावाची ऑफ-रोड राइड आयोजित केली होती.

ही राइड लेहजवळच्या चुचोट ग्राउंड्सपासून सुरू झाली. तिथून पुढे अरुंद ट्रेल, खडकाळ चढ आणि कालव्याच्या बाजूने जाणारे रस्ते पार करायचे होते. वाटेत काही ठिकाणी वाळू, घट्ट बसलेले गोटे आणि मोठमोठे खडक असा मिक्स भूभाग लागला, जो कोणत्याही रायडरसाठी आव्हानात्मक ठरावा असा होता. छोट्या पाण्याच्या प्रवाहातूनही हिमालयन 450 ने सहज मार्ग काढला. अशा खडतर टप्प्यांवर बाइकवरची बॉडी पोझिशन नीट ठेवणं, थ्रॉटल कंट्रोलमध्ये ठेवणं आणि योग्य लाइन निवडणं हे तितकंच महत्त्वाचं ठरतं, कारण एका चुकीच्या निर्णयाने बाइक घसरण्याची शक्यता असते.

या डेंजर आणि खडतर ट्रेलवर हिमालयन 450 मधल्या 450cc इंजिनचा मिड-रेंज टॉर्क चांगलाच उपयोगी पडला. कठीण चढावर सारखं क्लच वापरत बसण्याची गरज न पडता, कंट्रोल्ड थ्रॉटलवरच बाइक पुढे नेता आली, त्यामुळे रायडरची दमछाकही कमी झाली. रस्त्यातले खड्डे, दगड आणि रट्स यावरही सस्पेन्शनने चांगली साथ दिली. गोट्यांवरून जाताना मागचा भाग एका क्षणासाठी स्लाइड झाला, तरी थ्रॉटल आणि योग्य कंट्रोलच्या मदतीने बाइक पुन्हा स्थिर करता आली, आणि हाच क्षण बाइकच्या क्षमतेची खरी परीक्षा ठरला.

हिमालयन 450 ही सक्षम बाइक असली, तरी ती काही हलकी एंड्युरो बाइक नाही, हे या राइडमधून स्पष्ट झालं. त्यामुळे खूप सैल पृष्ठभागावर किंवा अरुंद खडकाळ उतारावर तिचं वजन जाणवत राहतं. म्हणूनच अशा राइडसाठी फक्त रायडिंग स्किल असून चालत नाही, तर शारीरिक तयारीही तितकीच गरजेची असते. लडाखच्या उंचीशी जुळवून घेणं हे तर अत्यावश्यकच असतं. लेहमध्ये पोहोचल्यावर पहिले 24 तास शरीराला आराम देणं आणि अॅक्लिमेटायझेशनकडे लक्ष देणं किती गरजेचं आहे, हे या अनुभवातून पुरतं स्पष्ट होतं.