प्राजक्ता माळीची 'लग्नपंचमी' नाटकाबद्दलची पोस्ट चर्चेत, म्हणाली- 'तुझ्या विचारांच्या प्रेमात फार पूर्वीपासून

मराठी मनोरंजनसृष्टीतली लोकप्रिय अभिनेत्री प्राजक्ता माळी सोशल मीडियावर नेहमीच ॲक्टिव्ह असते. आपल्या कामाबरोबरच ती वेगवेगळे अनुभव आणि खास क्षण चाहत्यांसोबत शेअर करत असते. याच सिलसिल्यात तिने नुकतंच रंगभूमीवर गाजत असलेलं 'लग्नपंचमी' हे नाटक बघितलं. हे नाटक बघितल्यानंतर तिने आपला अनुभव सोशल मीडियावर पोस्ट करत चाहत्यांसोबत शेअर केला.

प्राजक्ताने सोशल मीडियावर 'लग्नपंचमी'च्या कलाकारांसोबतचे काही फोटो शेअर केले. त्यासोबत तिने या नाटकाचं भरभरून कौतुकही केलं. आज एक सुंदर नाटक बघितलं आणि ते म्हणजे 'लग्नपंचमी', असं तिने आपल्या पोस्टमध्ये लिहिलं.

नाटकाबद्दल सांगताना प्राजक्ता म्हणाली, "लग्न झालेल्यांनी, लग्न करण्याची इच्छा असलेल्यांनी, लग्न न करण्याची इच्छा असलेल्यांनी... थोडक्यात सर्वांनी हे नाटक पहावं." सगळ्या वयोगटातल्या प्रेक्षकांचं हे नाटक मनोरंजन करेल, असा विश्वासही तिने या पोस्टमध्ये व्यक्त केला.

'लग्नपंचमी'च्या लेखिका, निर्माती आणि अभिनेत्री मधुगंधा कुलकर्णी यांचं प्राजक्ताने विशेष कौतुक केलं. या तिन्ही जबाबदाऱ्या मधुगंधाने अतिशय सुंदरपणे सांभाळल्याचं तिने सांगितलं. मधुगंधाच्या विचारांबद्दल बोलताना प्राजक्ता म्हणाली, "तुझ्या विचारांच्या प्रेमात तर मी फार पूर्वीपासून आहेच. आज नाटकातून पुन्हा ते अनुभवायला मिळालं."

नाटकातल्या कलाकारांच्या अभिनयाचंही प्राजक्ताने आपल्या पोस्टमध्ये कौतुक केलं. स्वप्नील जोशी यांच्या रंगमंचावरच्या नैसर्गिक वावराने आपण थक्क झाल्याचं तिने सांगितलं. त्यांचा लाईव्ह रंगमंचावरचा अभिनय बघणं हा एक वेगळाच अनुभव असल्याचं प्राजक्ताने नमूद केलं. यासोबतच विदुला चौगुले आणि मुकेश जाधव यांच्या कामाचंही तिने कौतुक केलं.

'लग्नपंचमी' बघताना तब्बल तीन तास खूप मजेत गेल्याचं प्राजक्ताने आपल्या पोस्टमध्ये सांगितलं. विशेष म्हणजे प्रेक्षकांमध्ये तिच्यासोबत ललित प्रभाकर आणि परेश मोकाशी हेदेखील उपस्थित होते, त्यामुळे हा अनुभव आणखी खास झाल्याचं तिने म्हटलं.

शेवटी प्राजक्ताने आपल्या चाहत्यांना 'लग्नपंचमी' नाटक आवर्जून बघण्याचं आवाहन केलं. तिच्या या पोस्टनंतर 'लग्नपंचमी' हे नाटक पुन्हा एकदा चर्चेत आलं आहे.