फ्रीजचं टेम्परेचर सेटिंग चुकलं की लाईटबिल वाढतं, जाणून घ्या योग्य नंबर

लाईटबिल जास्त आलं की आपण पहिल्यांदा AC कमी करतो, गीजर बंद ठेवतो, फॅन बंद करतो. पण फ्रीजकडे कोणाचंच लक्ष जात नाही, कारण तो दिवसाचे 24 तास चालूच असतो. फ्रीज घरात आणला की त्याचा नंबर एकदा सेट केला जातो आणि मग वर्षभर तसाच ठेवला जातो. उन्हाळा असो, पावसाळा असो किंवा हिवाळा, फ्रीज त्याच नंबरवर चालू राहतो. तज्ज्ञांच्या मते हीच एक चूक लाईटबिल वाढवते आणि ऋतूनुसार टेम्परेचर बदललं तर वर्षाला हजारो रुपयांची बचत होऊ शकते.

फ्रीजच्या आतमध्ये 1 ते 7 किंवा 1 ते 5 पर्यंतचा एक गोल नंबरचं बटण असतं. यात 90 टक्के लोकांचा एक गैरसमज असतो, तो म्हणजे 1 नंबरवर जास्त थंडी होते आणि 7 नंबरवर कमी. पण खरं तर हे उलट आहे. नंबर जेवढा मोठा तेवढी थंडी जास्त होते. फ्रीज 7 नंबरवर ठेवला की तो जास्त थंड होतो, कारण त्याचं इंजिन म्हणजे कॉम्प्रेसर जास्त वेळ चालतो आणि जास्त लाईट खातो. हिवाळ्यात बाहेर आधीच थंडी असते, तरी फ्रीज 6 किंवा 7 नंबरवर ठेवला तर तो उगाच जास्त बर्फ बनवत राहतो आणि वीज वाया जाते. जास्त कूलिंगमुळे 5 ते 10 टक्के जास्त लाईट लागते.

मग योग्य सेटिंग काय, तर बाहेरच्या हवामानानुसार फ्रीजचा नंबर बदलायला हवा. हिवाळ्यात बाहेर थंडी असतेच, त्यामुळे फ्रीजला जास्त काम करायची गरज नसते, म्हणून तो 1 किंवा 2 नंबरवर ठेवावा. पावसाळ्यात हवा थोडी दमट असते, त्यामुळे फ्रीज 3 किंवा 4 नंबरवर ठेवायला हवा. उन्हाळ्यात जेव्हा खूप गरम होतं तेव्हाच फ्रीज 5 ते 7 नंबरवर ठेवावा, म्हणजे जेवण खराब होणार नाही. डिजिटल फ्रीज असेल तर तो 3 ते 5 डिग्रीवर ठेवावा, त्यामुळे वीज बिल वाचू शकतं.

फक्त नंबर बदलण्याव्यतिरिक्त आणखी काही सोप्या गोष्टी केल्या तरी फायदा होतो. गरम भाजी किंवा गरम दूध थेट फ्रीजमध्ये ठेवू नये, आधी ते बाहेर थंड होऊ द्यावं, कारण गरम वस्तू ठेवली की फ्रीजला थंड करण्यासाठी 24 टक्के जास्त लाईट लागते. फ्रीजरमध्ये बर्फाचा जाड थर साचला असेल तर डिफ्रॉस्ट बटण दाबावं, कारण बर्फामुळे फ्रीजला डबल काम करावं लागतं. फ्रीज खचाखच भरू नये, कारण गच्च भरला की आत थंड हवा फिरत नाही, थोडा मोकळा ठेवला तर हवा सगळीकडे फिरते आणि जेवणही चांगलं राहतं. दाराचं रबर सैल झालंय का हेही तपासावं, ते खराब झालं तर आतली थंड हवा बाहेर जाते आणि फ्रीज कधीच बंद होत नाही, त्यामुळे बिल जास्त येतं. यासाठी दारात एखादा कागद लावून बघावा, तो सहज निघत असेल तर रबर बदलण्याची वेळ आली आहे. ही छोटीशी सवय वर्षाला हजारो रुपयांची बचत करून देऊ शकते.