पार्लरचा खर्च टाळा, घरच्या घरी करा फेशिअल आणि मिळवा नैसर्गिक चमक

गणपती बाप्पाच्या आगमनानंतर घराघरात उत्साहाचं वातावरण असतं. पूजा, घरातली धावपळ आणि पाहुण्यांची ये-जा यातच पूर्ण दिवस निघून जातो, आणि त्यामुळे स्वतःकडे लक्ष द्यायला वेळच मिळत नाही. मग सणाच्या एक-दोन दिवस आधी अनेक जण पार्लरमध्ये जाऊन फेशिअल किंवा क्लीनअप करून घेतात. पण तरीही चेहऱ्यावर हवा तसा ग्लो येत नाही, हा अनुभव अनेकींना येतो. हजारो रुपये खर्च करूनही त्वचेची चमक वाढत नाही. त्यामुळे महागड्या ट्रीटमेंट किंवा पार्लरमधल्या फेशिअलवर अवलंबून राहण्याऐवजी घरच्या घरी फेशिअल केलं तर त्वचा चमकदार दिसते आणि टॅनिंगही कमी होतं.

बदलत्या हवामानामुळे त्वचा निस्तेज आणि कोरडी पडते, आणि त्यावर उपाय म्हणून महागड्या क्रीम वापरल्या जातात. पण त्याऐवजी स्वयंपाकघरात असलेल्या पदार्थांचाच वापर त्वचेसाठी करता येतो. फेशिअलची सुरुवात सौम्य फेशवॉशने चेहरा स्वच्छ करण्यापासून करावी. त्यानंतर कापसावर गुलाबपाणी घेऊन ते चेहऱ्यावर लावावं आणि दोन-तीन मिनिटं तसंच सुकू द्यावं.

चेहऱ्यावर चिकटलेली धूळ, माती आणि तेलकटपणा घालवण्यासाठी स्क्रब करणं गरजेचं असतं. यासाठी मिक्सरमध्ये ओट्स आणि दही एकत्र करून जाडसर पेस्ट बनवावी. ही पेस्ट संपूर्ण चेहऱ्यावर लावून हलक्या हातांनी मसाज करावी, यामुळे त्वचेवरची मृत त्वचा निघून जाते आणि चेहरा स्वच्छ दिसतो. स्क्रबसाठी कॉफी पावडरचाही वापर करता येतो.

स्क्रब झाल्यावर चेहऱ्याला वाफ द्यावी, यामुळे त्वचेच्या छिद्रांमधली घाण निघून जायला मदत होते. मात्र वाफ जास्त वेळ घेऊ नये, कारण त्यामुळे चेहरा कोरडा पडू शकतो. ज्यांची त्वचा खूप कोरडी आहे त्यांनी दही आणि मध यांचा फेसपॅक लावावा, तर तेलकट त्वचा असणाऱ्यांनी चंदन पावडर आणि गुलाबपाणी घालून बनवलेली पेस्ट लावावी. हा फेसपॅक काही वेळ चेहऱ्यावर राहू द्यावा आणि नंतर कोमट पाण्याने चेहरा स्वच्छ धुवावा.

फेशिअल पूर्ण झाल्यावर चेहऱ्याला मॉइश्चरायझर लावायला विसरू नये, नाहीतर चेहरा पुन्हा कोरडा पडू शकतो. फक्त फेशिअल करून त्वचेची काळजी पूर्ण होत नाही, तर भरपूर पाणी पिणं, पोषक आहार घेणं, नियमित हालचाल करणं आणि शांत झोप घेणं हेही तितकंच महत्त्वाचं असतं. यामुळे त्वचा आतून सुंदर आणि चमकदार राहते. त्वचेवरचं तेज वाढवण्यासाठी नेहमीच महागडे प्रॉडक्ट लागतातच असं नाही, स्वयंपाकघरात असलेले साधे पदार्थही त्वचा आतून चमकदार ठेवायला मदत करतात.

टीप - हा लेख केवळ सामान्य माहितीसाठी असून यात कोणत्याही उपचाराचा दावा केलेला नाही. कोणताही उपाय करण्यापूर्वी डॉक्टरांचा सल्ला घ्यावा.