पालघर मारहाण प्रकरण: तपासातील दिरंगाईवरून हायकोर्टाने पोलिसांना फटकारले

पालघरमधील एका खासगी रुग्णालयात घडलेल्या मारहाणीच्या प्रकरणात पोलिसांच्या तपासातील ढिलाईवरून हायकोर्टाने बुधवारी तीव्र नाराजी व्यक्त केली. या रुग्णालयात जखमी गोविंदावर उपचार सुरू असताना शिंदे गटाच्या शिवसैनिकांनी रुग्णालयातील कर्मचाऱ्यांना मारहाण केली होती. या प्रकरणातील आरोपी पोलिसांच्या निष्काळजीपणामुळेच फरार झाल्याचे न्यायालयाने स्पष्टपणे सुनावले.

न्या. अजय गडकरी आणि न्या. कमल खाता यांच्या खंडपीठाने म्हटले की, एका रुग्णालयातील वैद्यकीय अधिकाऱ्यांवर हल्ला होण्यासारख्या संवेदनशील प्रकरणात पोलिसांनी कोणताही ठोस तपास न करणे हे स्वीकारार्ह नाही. डोंबिवलीतील महापालिका रुग्णालयात शिंदेंच्या शिवसेनेचे नगरसेवक रमेश म्हात्रे यांनी डॉक्टरांवर हल्ला केल्याचे प्रकरण अलीकडेच घडले होते, तरीही त्यातून पालघर पोलिसांनी काहीच धडा घेतला नसल्याचे खंडपीठाने खडसावले.

ठाणे जिल्ह्यातील त्या प्रकरणाची दखल न्यायालयाने स्वतःहून घेतली होती. आता पालघर जिल्ह्यासाठीही स्वतःहून याचिका दाखल करावी लागणार का, असा सवाल न्यायालयाने उपस्थित केला. ठाणे प्रकरणातील घटना पुरेशी धडा देणारी नव्हती का, आणि त्यातून पोलिसांनी काहीच शिकले नाही का, अशी प्रश्नांची सरबत्तीच न्यायालयाने केली. पालघर पोलिसांना या प्रकरणाच्या तपासात रस नसेल तर तसे स्पष्ट सांगावे, अन्यथा हे प्रकरण मुंबई पोलिसांच्या क्राइम ब्रँचकडे सोपवले जाईल, असा सज्जड इशाराही न्यायालयाने दिला.

प्रकरणाची केस डायरी योग्य पद्धतीने न ठेवल्यावरूनही पोलिसांना फटकार बसली. याआधीही अनेकदा याबाबत आदेश दिले असून पोलिस महासंचालकांनीही केस डायरी नियमित ठेवण्याचे आदेश दिलेले असतानाही पोलिस आपल्याच वरिष्ठांचे आदेश धुडकावत असल्याचे न्यायालयाने नमूद केले. संबंधित अधिकाऱ्यांवर काय कारवाई करायची, याबाबत पोलिस महासंचालकांशी चर्चा करण्याचे आदेशही खंडपीठाने दिले. यावर, पोलिस महासंचालकांनी पालघर पोलिसांकडून सर्व कागदपत्रे मागवली असून त्याचा अभ्यास करून योग्य कारवाई केली जाईल, असे सरकारी वकिलांनी न्यायालयाला सांगितले.

डोंबिवली प्रकरणात आधीच्या आदेशांचे पालन झाल्याचे सांगणारे प्रतिज्ञापत्र सरकारी वकिलांनी सादर केले आणि रमेश म्हात्रेसह इतर आरोपींवर आरोपपत्र दाखल झाल्याचेही न्यायालयाला सांगण्यात आले. मात्र आधीच्या आदेशांची पूर्तता व्यवस्थित न झाल्याने न्यायालयाने पोलिसांना खडसावत विचारले की, या प्रकरणाबाबत तुम्ही खरोखर गंभीर आहात का.

प्राथमिक माहिती अहवालात नाव असलेल्या दहा जणांपैकी शिवसेनेचा शहर प्रमुख राहुल धरत सध्या अटकेत असून पोलिस कोठडीत आहे. उर्वरित नऊ आरोपी अजूनही फरार असून, याशिवाय सात अनोळखी व्यक्तींविरोधातही तक्रार दाखल करण्यात आल्याची माहिती पालघरचे पोलिस अधीक्षक यतीश देशमुख यांनी न्यायालयाला दिली. गुन्हा दाखल झाल्यानंतर आरोपींना अटक करण्यासाठी पोलिसांनी तातडीने कारवाई का केली नाही, फरार असलेल्या नऊ आरोपींची ओळख पटलेली असतानाही त्यांचा शोध का घेतला गेला नाही, असे प्रश्न न्यायालयाने उपस्थित केले. गुन्हा दाखल झाल्यानंतर तपासात तत्परता दिसत नसल्याचे नमूद करत, पोलिसांच्या निष्काळजीपणामुळेच आरोपींना फरार होण्याची संधी मिळाल्याचे खडे बोल न्यायालयाने सुनावले.