'फालतू चारित्र्यहनन बस्स झालं!' दिशा सालियन प्रकरणावर उद्धव ठाकरे संतापले
दिशा सालियन मृत्यूप्रकरणात CBI ने FIR दाखल केल्यानंतर उद्धव ठाकरे आणि आदित्य ठाकरे यांनी पहिल्यांदाच याबाबत भूमिका मांडली.
दिशा सालियन मृत्यूप्रकरणाला पुन्हा एकदा नवं वळण मिळालं आहे. मुंबई उच्च न्यायालयाने दिलेल्या आदेशानंतर केंद्रीय अन्वेषण विभागाने म्हणजेच CBI ने या प्रकरणात FIR दाखल केल्याचं वृत्त समोर आलं आहे. दिशा सालियन यांचे वडील सतीश सालियन यांनी दिलेल्या जबाबाच्या आधारे हा गुन्हा नोंदवण्यात आल्याची माहिती मिळते आहे. या घडामोडीनंतर शिवसेना (UBT) पक्षप्रमुख उद्धव ठाकरे यांनी पहिल्यांदाच यावर भाष्य केलं आहे. या संपूर्ण प्रकरणाला आता पुन्हा एकदा चर्चेचं वळण मिळालं असून राजकीय वर्तुळात याची चर्चा सुरू झाली आहे.
या प्रकरणात अनेक जणांच्या नावांचा उल्लेख होत असल्याचं सांगितलं जातं. त्यामध्ये आदित्य ठाकरे, उद्धव ठाकरे, अनिल देशमुख, परमबीर सिंह, सचिन वाझे, सूरज पांचोली, दिनो मोरिया आणि रिया चक्रवर्ती अशा नावांचा समावेश असल्याचं म्हटलं जातं आहे. या सर्व नावांमुळे प्रकरणाला अधिकच गुंतागुंतीचं स्वरूप प्राप्त झालं आहे.
या संपूर्ण प्रकरणावर बोलताना उद्धव ठाकरे यांनी राजकीय हेतूने आपलं चारित्र्यहनन केलं जात असल्याचा थेट आरोप केला. "माझेही नाव आहे. तुमचेही येईल. दुरान्वयेही संबंध नाही. ओळख पाळख नाही. किती काळ सहन करत राहणार," अशा शब्दांत त्यांनी आपली नाराजी व्यक्त केली.
पुढे बोलताना उद्धव ठाकरे यांनी या प्रकरणामागे राजकीय हेतू असल्याचा दावा पुन्हा एकदा केला. "नरेंद्र मोदी व डोनाल्ड ट्रम्प यांचेही नाव येईल. का म्हणून नाव घेतले जातंय. राजकीय हेतूने हे प्रेरित आहे. आम्ही गप्प होतो. फालतू चारित्र्यहनन बस्स झाले, अन्यथा आम्हीही कायदेशीर मार्गाने जाऊ. आमचा त्याच्याशी काही संबंध नाही," असं ते म्हणाले. त्यांच्या या वक्तव्यातून त्यांचा संताप स्पष्टपणे दिसून आला.
दरम्यान, आदित्य ठाकरे यांनीही या प्रकरणावर X वरून आपली भूमिका मांडली आहे. आपण दिशा सालियन यांना कधीही भेटलेलो नाही आणि त्यांच्याशी आपली कोणतीही ओळख नाही, असं आदित्य ठाकरे यांनी स्पष्ट केलं. गेल्या काही वर्षांपासून राजकीय हेतूने आणि चारित्र्यहननाच्या उद्देशाने आपलं नाव या प्रकरणाशी जोडण्याचा प्रयत्न सुरू असल्याचा आरोपही त्यांनी केला.
तसंच, अधिकृत यंत्रणांनी कोणत्याही राजकीय हस्तक्षेपाशिवाय आणि निःपक्षपातीपणे या प्रकरणाची चौकशी करावी, अशी मागणी आदित्य ठाकरे यांनी केली आहे. या प्रकरणातील पुढील तपास आणि CBI च्या कारवाईकडे राजकीय वर्तुळासह सर्वांचं लक्ष लागलं आहे. पुढील काही दिवसांत या प्रकरणात आणखी काय घडामोडी घडतात, याकडे सर्वांचं लक्ष असणार आहे.
