नागपुरात प्रतिबंधित गुटख्यावर पोलिसांचा वॉच, 62 हजारांचा माल जप्त

नागपुरात प्रतिबंधित गुटखा आणि पान मसाल्याच्या अवैध विक्रीविरोधात नागपूर पोलीस आयुक्तांच्या एस्कॉर्ट पथकाने कारवाई केली. मानकापुर पोलीस ठाण्याच्या हद्दीत असलेल्या दोन पान सेंटरवर या पथकाने छापा टाकला. या कारवाईत महाराष्ट्रात प्रतिबंधित असलेला पान मसाला आणि गुटखा, दोन खर्रा मशीन तसेच रोकड असा एकूण 62,210 रुपयांचा माल जप्त करण्यात आला.

या प्रकरणी मानकापुर पोलीस ठाण्यात तीन आरोपींविरुद्ध गुन्हा दाखल करण्यात आला आहे. यातील एक आरोपी मात्र पोलिसांना पाहून घटनास्थळावरून पळून गेला. पोलिसांनी दिलेल्या माहितीनुसार, ही संपूर्ण कारवाई मंगळवारी रात्री करण्यात आली.

मंगळवारी रात्री पोलीस आयुक्तांचे एस्कॉर्ट पथक शहरात गस्त घालत होते. गस्त घालत असतानाच त्यांना भोकरा रोडवर, गोधनी रेल्वे पुलाजवळ असलेल्या गोलू पान सेंटर आणि कान्हा पान पॅलेस या दोन दुकानांमध्ये लपूनछपून प्रतिबंधित गुटख्याची विक्री होत असल्याची माहिती मिळाली. ही माहिती मिळाल्यानंतर पथकाने त्याची खातरजमा केली आणि त्यानंतर एपीआय भगवान कोळी यांच्या नेतृत्वाखालील पोलीस पथकाने दोन्ही पान सेंटरवर एकाच वेळी कारवाई केली.

गोलू पान सेंटरवर कारवाई करताना दुर्गादास नारायणदास मलवे हा घटनास्थळी पोलिसांच्या हाती लागला. मात्र या दुकानाचा कथित मूळ मालक प्रफुल बाबारावजी भिष्णुकर हा पोलीस पथकाला पाहून तिथून फरार झाला आणि सापडला नाही. यानंतर पंचांच्या उपस्थितीत पोलिसांनी दुकानाची झडती घेतली.

त्याचप्रमाणे कान्हा पान पॅलेसवरील कारवाईत योगेश ज्ञानेश्वर बोंदरे हा पोलिसांच्या हाती लागला. दोन्ही पान सेंटरच्या झडतीत पोलिसांना विमल पान मसाला, राजश्री, रजनीगंधा यांसह प्रतिबंधित गुटखा, दोन खर्रा मशीन आणि रोकड सापडली. पोलिसांच्या माहितीनुसार, या कारवाईत जप्त करण्यात आलेल्या एकूण मालाची किंमत 62,210 रुपये इतकी आहे.

मानकापुर पोलिसांनी या प्रकरणी तिन्ही आरोपींविरुद्ध भारतीय न्याय संहिता (बीएनएस) मधील संबंधित कलमांखाली तसेच अन्न सुरक्षा व मानक कायद्यांतर्गत गुन्हा दाखल केला आहे. पोलीस सध्या फरार झालेल्या आरोपीचा शोध घेत आहेत. याशिवाय, प्रतिबंधित गुटख्याच्या पुरवठा आणि विक्रीशी संबंधित इतर लोकांबाबतही पोलिसांचा तपास सुरू आहे.