क्रिप्टो गुंतवणूकदारांचा ओढा आता मीम कॉईनऐवजी दर्जेदार नाण्यांकडे, CoinDCX चा रिपोर्ट

क्रिप्टोकडे बघण्याचा लोकांचा दृष्टिकोन आता पूर्णपणे बदलल्याचं दिसतंय. आधी लोक क्रिप्टोला जुगारासारखं समजायचे, आज पैसे टाकले आणि उद्या रक्कम दुप्पट झाली तर लगेच विकून टाकायचे, अशी मानसिकता होती. पण आता तसं राहिलेलं नाही. गुंतवणूकदार आता जास्त समजूतदार झाले आहेत. CoinDCX नं दिलेल्या नव्या रिपोर्टनुसार लोक आता मीम टोकनच्या मागे धावत नाहीत, तर जुन्या आणि दर्जेदार क्रिप्टोमध्ये पैसे गुंतवत आहेत, आणि तेही SIP च्या माध्यमातून टप्प्याटप्प्याने.

आंतरराष्ट्रीय साक्षरता दिनाच्या निमित्तानं CoinDCX नं ही आकडेवारी समोर आणली. यातून एक स्पष्ट गोष्ट पुढे येते, की भारतात क्रिप्टो गुंतवणूक आता फक्त मुंबई, दिल्ली किंवा बेंगळुरुपुरती मर्यादित राहिलेली नाही. जयपूर, पाटणा आणि लखनौसारखी शहरं देखील यात पुढे आली आहेत.

CoinDCX चे युजर्स आता 2.2 कोटींच्या पुढे गेले आहेत. 2024 पासून यात 80 लाख नवीन युजर्सची भर पडली आहे. यातला मोठा वाटा जयपूर, पाटणा, लखनौसारख्या शहरांचा आहे. या शहरांतल्या तरुणांना असं वाटतंय की सोनं आणि जमीन याशिवाय डिजिटल ॲसेट देखील एक चांगला पर्याय ठरू शकतो. आणि हे गुंतवणूकदार घाई करत नाहीत, ते SIP च्या माध्यमातून हळूहळू पैसे गुंतवत आहेत. यामुळेच CoinDCX वर SIP करणाऱ्यांची संख्या 600% नं वाढली आहे, जो आकडा खरंच मोठा आहे.

या बदलातला सगळ्यात मोठा पैलू म्हणजे लोकांनी मीम टोकनला रामराम ठोकला आहे. आधी कुत्र्याचा किंवा बेडकाचा फोटो असलेले कॉईन घेतले जायचे, कारण ते स्वस्त असायचे आणि त्यातून झटपट पैसे वाढतील असं वाटायचं. पण रिपोर्टनुसार एकूण ट्रेडिंगमध्ये मीम टोकन्सचा वाटा आता फक्त 12.17% इतकाच उरला आहे. याउलट, ब्लू-चिप म्हणून ओळखल्या जाणाऱ्या मोठ्या आणि दर्जेदार क्रिप्टोचा वाटा 55% आहे. म्हणजे लोक आता बिटकॉईन आणि इथेरियमसारख्या मजबूत कॉईनवर जास्त विश्वास ठेवत आहेत. हे मार्केट प्रगल्भ होत असल्याचं लक्षण मानलं जातंय.

2026 च्या पहिल्या सहा महिन्यांत 26 ते 41 वयोगटातले नोकरदार लोक सगळ्यात जास्त संख्येनं क्रिप्टोकडे आले आहेत. हे लोक विचार न करता पैसे टाकत नाहीत, तर आधी संबंधित कॉईनचा अभ्यास करतात, रिसर्च करतात आणि मगच गुंतवणूक करण्याचा निर्णय घेतात.

यावर CoinDCX चे को-फाउंडर सुमित गुप्ता यांनी म्हणणं मांडलं की, "आज साक्षरता म्हणजे फक्त वाचता-लिहिता येणं इतकंच नाही, तर डिजिटल जगात कसं वागायचं हे समजणं देखील त्यात येतं. क्रिप्टो आता आपल्या आर्थिक चर्चेचा भाग बनला आहे, त्यामुळे क्रिप्टो साक्षरता खूप गरजेची आहे. लोकांना जोखीम समजली पाहिजे."

ते पुढे म्हणाले, "आमच्या प्लॅटफॉर्मवर चांगले बदल दिसत आहेत. लोक मीमपेक्षा दर्जेदार कॉईनला पसंती देत आहेत, SIP करत आहेत आणि नवीन शहरांमधून लोक येत आहेत. 2025 मध्ये SIP धारकांमध्ये 600% वाढ झाली आहे, याचाच अर्थ लोक आता शिस्तीनं गुंतवणूक करत आहेत. आम्हाला लोकांना अजून जास्त शिकवायचं आहे, जेणेकरून ते हुशारीनं निर्णय घेऊ शकतील."

एकंदरीत बघता, क्रिप्टोमध्ये आता जुगारापेक्षा समजूतदार गुंतवणुकीचा ट्रेंड सुरू झाला आहे, आणि यात छोटी शहरं मोठ्या शहरांना टक्कर देत आहेत.