जगातील अनेक कोट्यधीश देश सोडून ग्रीसच्या वाटेवर; कर प्रणालीच ठरतेय मुख्य कारण

जगभरातील अनेक श्रीमंत आणि अब्जाधीश करदाते सध्या ग्रीसच्या अथेन्स शहराकडे वळत आहेत. गेल्या दोन-तीन वर्षांत हा कल मोठ्या प्रमाणात वाढला आहे. अलीकडेच ब्रिटिश अब्जाधीश हेज फंड मॅनेजर ख्रिस रोकोस यांनी लंडन सोडल्याची बातमी समोर आल्यानंतर ग्रीस पुन्हा एकदा चर्चेत आला आहे. रोकोस यांनी आपले कर निवासस्थान ग्रीसमध्ये हलवण्याचा निर्णय घेतला आहे. म्हणजेच, कर भरण्यासाठीचा आपला अधिकृत पत्ता त्यांनी लंडनऐवजी आता ग्रीसमध्ये नोंदवला आहे.

रोकोस कॅपिटल मॅनेजमेंटचे संस्थापक असलेल्या रोकोस यांनी गेल्या वर्षी युकेमध्ये सुमारे ३३० कोटी पाउंड, म्हणजे अंदाजे ४२३५ कोटी रुपये इतका कर भरला होता. इतकी मोठी रक्कम कर म्हणून भरणारी व्यक्ती जेव्हा आपला देश सोडून दुसरीकडे राहायला जाते, तेव्हा त्याची चर्चा होणे साहजिकच आहे. त्यांनी ग्रीसमध्ये राहायला सुरुवात केल्यामुळे, ग्रीस श्रीमंतांना इतका का आकर्षित करतोय, याविषयी चर्चा सुरू झाली आहे. रोकोस यांचा हा निर्णय फक्त एका उद्योजकापुरता मर्यादित नाही, तर श्रीमंत युरोपियन लोकांच्या बदलत्या आवडीनिवडींचा तो एक भाग आहे. कमी कर, चांगले हवामान, समुद्रकिनारी राहणीमान आणि युरोपमध्येच राहायची सोय शोधणाऱ्या लोकांना ग्रीस आता आकर्षित करतोय.

पण नेमके किती कोट्यधीश ग्रीसमध्ये स्थलांतरित होत आहेत आणि त्यामागचं खरं कारण काय, हा प्रश्न आहे. संपत्तीच्या स्थलांतरावर काम करणाऱ्या हेन्ली अॅण्ड पार्टनर्स या संस्थेच्या अहवालानुसार, २०२५ पर्यंत सुमारे १२०० कोट्यधीश ग्रीसमध्ये येण्याची शक्यता आहे. या आकड्यामुळे श्रीमंत लोकांना आकर्षित करणाऱ्या जागतिक यादीत ग्रीसचा समावेश झाला आहे. २०२६ च्या हेन्ली अहवालातही आंतरराष्ट्रीय मालमत्ता असणाऱ्या लोकांसाठी सर्वाधिक आकर्षक ठरणाऱ्या देशांमध्ये ग्रीसचा उल्लेख करण्यात आला आहे. म्हणजेच सलग दोन अहवालांमध्ये ग्रीसचं नाव अशा देशांच्या यादीत आलं आहे, जिथे जगातील श्रीमंत लोक स्थलांतर करू इच्छितात.

ग्रीसमध्ये येणाऱ्या श्रीमंत लोकांमध्ये वेगवेगळ्या देशांचे नागरिक आहेत. ग्रीसचं सर्वात मोठं वैशिष्ट्य म्हणजे तिथला नॉन-डोमिसाइल टॅक्स रेसिडेन्सी प्रोग्राम. या योजनेत ठराविक अटी पूर्ण करणारे नवीन परदेशी कर रहिवासी आपल्या परदेशातील उत्पन्नावर दरवर्षी फक्त १ लाख युरो इतका सरसकट कर भरू शकतात. म्हणजे परदेशात कितीही उत्पन्न असलं, तरी त्यावर वेगवेगळा हिशोब न करता एकच ठरलेली रक्कम कर म्हणून भरायची सोय या योजनेत आहे.

फक्त कर नाही, तर ग्रीसमधलं राहणीमानही लोकांना खेचून आणतंय. समुद्र, ऊन, उबदार हवामान, छोट्या शहरासारखं वातावरण आणि इतर युरोपीय देशांशी असलेली कनेक्टिव्हिटी या सगळ्या गोष्टी श्रीमंत लोकांना आवडतात. लंडनसारख्या महागड्या आणि गजबजलेल्या शहरातून थोडी उसंत हवी असणाऱ्यांसाठी ग्रीस हा एक चांगला पर्याय ठरतोय. याशिवाय ग्रीसमध्ये गोल्डन व्हिसा योजनाही आहे, ज्याअंतर्गत काही ठराविक परदेशी गुंतवणूकदार ठराविक अटींनुसार गुंतवणूक करून तिथला रहिवासी दर्जा मिळवू शकतात.