सुसाट... कालच्या क्रॅशनंतर आज बाजारात तुफान तेजी, उघडताच शेअर्सनी मारली मोठी उसळी
शेअर मार्केटमध्ये सध्या नुसती घालमेलच सुरू आहे. मंगळवारी शेअर बाजाराला मोठा धक्का बसला होता आणि गुंतवणूकदारांचं टेन्शन वाढलं होतं, पण त्याच वेगाने बुधवारी व्यवहार सुरू होताच बाजारात अगदी उलट चित्र दिसलं. सेन्सेक्स आणि निफ्टी या दोन्ही प्रमुख निर्देशांकांमध्ये सुरुवातीलाच जोरदार खळबळ उडाली आणि गुंतवणूकदारांच्या चेहऱ्यावर पुन्हा हसू फुललं.
बॉम्बे स्टॉक एक्सचेंजचा ३०-शेअर सेन्सेक्स आदल्या दिवसाच्या बंद भावापेक्षा ५०० हून अधिक अंकांनी वधारला. नॅशनल स्टॉक एक्सचेंजच्या निफ्टीनेही तशीच जोरदार झेप घेत २३,२०० चा टप्पा पार केला. या तेजीत आयटीसी, एचसीएल आणि बीईएल यांसारख्या अनेक मोठ्या कंपन्यांच्या शेअर्समध्ये लक्षणीय वाढ नोंदवली गेली, आणि हे स्टॉक्स सुरुवातीलाच रॉकेटसारखे धावले.
बुधवारी बाजार उघडताच बीएसई सेन्सेक्स मागील बंद भावापेक्षा वाढून ७४,२४९ अंकांवर उघडला. यानंतर त्याने आणखी वेग पकडला आणि ५०० हून अधिक अंकांची उसळी घेत ७५,५०५ अंकांपर्यंत पोहोचला. निफ्टीबाबत बोलायचं झालं तर, एनएसई निर्देशांक देखील मागील बंद भावापेक्षा वाढून २३,२०१ अंकांवर उघडला आणि त्यानंतर अचानक २३,२८१ अंकांपर्यंत पोहोचला.
गेल्या काही दिवसांपासून बाजारात सुरू असलेल्या घसरणीमुळे गुंतवणूकदारांचं आधीच मोठं नुकसान झालं होतं आणि मंगळवारी त्याचा जणू कहरच झाला. त्या दिवशी सेन्सेक्स आणि निफ्टी या दोन्ही निर्देशांकांनी सुरुवात तर दमदार केली होती, पण थोड्याच वेळात व्यवहार सुरू झाल्यावर काही क्षणांतच दोन्ही निर्देशांक कोसळले. व्यवहार संपताना बीएसई सेन्सेक्स ७७७ अंकांनी घसरून ७४,००३ अंकांवर बंद झाला, जो त्या दिवसाच्या उच्चांकापेक्षा १,४३३ अंकांनी कमी होता. एनएसई निफ्टी २७९ अंकांनी घसरून २३,११८ वर बंद झाला, जो त्या दिवसाच्या उच्चांकापेक्षा ४७४ अंकांनी कमी होता.
आठवड्याच्या तिसऱ्या ट्रेडिंग दिवशी बाजारात झालेल्या या प्रचंड तेजीदरम्यान, बीएसईच्या लार्ज-कॅप श्रेणीतील M&M, ITC, Reliance, HUL यांचे शेअर्स सुमारे २% वाढीसह व्यवहार करत होते. मिड-कॅप स्टॉक्समध्ये Yes Bank चा शेअर ३.२०% आणि Colpal चा शेअर १.५०% वाढला होता. स्मॉल-कॅप श्रेणीत Appolo Tyre, MSUMI आणि HSCL यांचे शेअर्सही तेजीत व्यवहार करत होते.
शेअर बाजारात कोणतीही गुंतवणूक करण्यापूर्वी आपल्या बाजार तज्ज्ञांचा सल्ला जरूर घ्यावा, असं सांगण्यात आलं आहे.
