ITC कडून सिगारेटच्या दरात पुन्हा वाढ; गोल्ड फ्लेक आणि क्लासिकचे भाव वाढले, आता किती रुपये मोजावे लागणार?

सिगारेट ओढणाऱ्यांच्या खिशाला आता आणखी एक झटका बसणार आहे. सिगारेट ओढणं ही आता फक्त शरीरावर नाही, तर खिशावरही मोठा परिणाम करणारी गोष्ट ठरणार आहे. ITC कंपनीने आपल्या काही ठराविक सिगारेट ब्रँड्सची MRP वाढवली असून, नव्या किमतीची पाकिटे बाजारात येऊ लागली आहेत. यापुढे सिगारेटवर आधीपेक्षा जास्त पैसे खर्च करावे लागणार आहेत.

कंपनीच्या क्लासिक कनेक्ट या ब्रँडच्या २० सिगारेटच्या पाकिटाची किंमत आता ४२८ रुपये झाली आहे. आधी हेच पाकीट ३९० रुपयांना मिळत होते. म्हणजेच या पाकिटाच्या किमतीत सुमारे ९.७४ टक्क्यांनी वाढ झाली आहे.

गोल्ड फ्लेक सुपर स्टार या ब्रँडच्या १० सिगारेटच्या पॅकच्या किमतीतही वाढ झाली आहे. आधी हे पॅक ७९ रुपयांना मिळत होते, आता त्याची किंमत ८९ रुपये झाली आहे. यात १२.६ टक्के वाढ झाली आहे.

२०२६ या वर्षात ITC च्या या ब्रँड्सच्या किमतीत आधीच अनेकदा बदल झाले आहेत. फेब्रुवारी महिन्यात क्लासिक कनेक्टची किंमत ३०० रुपयांवरून आधी ३६० रुपये आणि नंतर ३९० रुपये अशी वाढवण्यात आली होती. गोल्ड फ्लेक सुपर स्टारची किंमतही सुरुवातीला ५९ रुपयांवरून ७० रुपये आणि नंतर ७९ रुपयांपर्यंत वाढली होती. म्हणजेच एकाच वर्षात या दोन्ही ब्रँड्सचे दर दोनदा वाढवण्यात आले आहेत.

सिगारेटच्या किमतीत सतत होणारी ही वाढ यंदा लागू झालेल्या नव्या कर रचनेशी संबंधित आहे. १ फेब्रुवारी २०२६ पासून सिगारेट आणि इतर तंबाखू उत्पादनांवर ४० टक्के GST आणि त्यावर अतिरिक्त उत्पादन शुल्कही आकारले जाणार आहे. या नव्या कर रचनेमुळे कंपन्यांवरचा भार वाढला असून, वाढलेल्या या कराचा भार कमी करण्यासाठी कंपन्यांनी वेगवेगळ्या श्रेणींमध्ये किमती वाढवल्या आहेत.

नव्या MRP च्या पाकिटांची विक्री आता वेगवेगळ्या ठिकाणी सुरू झाली आहे. जिथे अजून नवी पाकिटे पोहोचलेली नाहीत, तिथे जुना साठा संपल्यानंतर नव्या किमतीची पाकिटे उपलब्ध होणार आहेत. त्यामुळे काही दुकानांमध्ये अजूनही जुन्या दराने विक्री सुरू असली, तरी हळूहळू सगळीकडे नवी किंमत लागू होणार आहे.