Instagram वापरताय? मग हे लेटेस्ट फीचर नक्की ट्राय करा; प्रोफाइलला मिळणार भन्नाट लूक

इंस्टाग्राम कंपनी सतत काहीतरी नवीन आणत असते. रील्स, स्टोरी आणि नोट्स यानंतर आता एक नवं फीचर आलंय ज्यामुळे युजरचं प्रोफाईल आधीपेक्षा जास्त भारी दिसू शकणार आहे.

आतापर्यंत काय व्हायचं की एखाद्याने तुम्हाला फोटोत टॅग केलं की तो फोटो फक्त Tagged नावाच्या सेक्शनमध्येच दिसायचा. मेन प्रोफाईल ग्रिडवर तो कधी यायचाच नाही. बऱ्याचदा मित्रांनी काढलेला एखादा छान फोटो असायचा, पण तो मेन प्रोफाईलवर लावायला काहीच पर्याय नव्हता. त्यामुळे प्रोफाईल थोडं अर्धवट वाटायचं, असं वाटायचं की काहीतरी राहून गेलंय.

आता ही अडचण दूर झाली आहे. इंस्टाग्रामने दिलेल्या नव्या अपडेटमुळे टॅग केलेला आवडता फोटो थेट मेन ग्रिडवर आणता येतो. यामुळे प्रोफाईल जास्त पर्सनल आणि आकर्षक दिसेल आणि कोणता फोटो दाखवायचा हे ठरवण्याचा कंट्रोल पूर्णपणे युजरच्या हातात राहील.

हे फीचर वापरणं फार सोपं आहे. सगळ्यात आधी मोबाईलमधलं इंस्टाग्राम अॅप उघडून स्वतःच्या प्रोफाईलवर जायचं. तिथे वर तीन टॅब दिसतात, त्यातल्या Tagged टॅबवर क्लिक करायचं, म्हणजे जिथे माणसाचा आयकॉन दिसतो तो टॅब. तिथे दुसऱ्यांनी टॅग केलेले सगळे फोटो आणि व्हिडिओ दिसतात.

त्या लिस्टमधून मेन प्रोफाईलवर हवा असलेला फोटो निवडायचा, म्हणजे एखाद्या लग्नातला, ट्रिपमधला किंवा मित्रांसोबतचा भारी फोटो असेल तर तो उघडायचा. फोटो उघडल्यावर वर तीन डॉट्स किंवा खाली काही ऑप्शन्स दिसतात. तिथे "Add to Profile Grid" किंवा "प्रोफाईल ग्रिडवर दाखवा" असा ऑप्शन दिसतो, त्यावर क्लिक केलं की काम झालं. त्यानंतर तो फोटो मेन प्रोफाईल ग्रिडवर दिसू लागतो आणि कोणीही प्रोफाईल उघडलं की त्याला तो फोटो लगेच दिसेल.

या फीचरचा सगळ्यात मोठा फायदा म्हणजे स्वतःचं प्रोफाईल स्वतःच्या मनाप्रमाणे सजवता येणार आहे. बऱ्याचदा आपले फोटो दुसऱ्याच्या मोबाईलमध्ये जास्त छान आलेले असतात, ते आता स्वतःच्या प्रोफाईलवर आणता येतील. आतापर्यंत असे फोटो फक्त त्या मित्राच्या किंवा नातेवाईकाच्या प्रोफाईलपुरतेच मर्यादित राहायचे, पण आता तेच फोटो स्वतःच्या प्रोफाईलचा भाग बनवता येतील. शिवाय स्वतःचे आणि मित्रांसोबतचे फोटो एकाच ठिकाणी दिसतील, त्यामुळे प्रोफाईल बघतानाही मजा येईल. आधी टॅग केलेले फोटो शोधण्यासाठी वेगळ्या सेक्शनमध्ये जावं लागायचं, आता तेच फोटो एका क्लिकमध्ये मेन प्रोफाईलचा भाग होऊ शकतात.

हे फीचर सगळ्यांना एकाच वेळी मिळणार नाही, हे लक्षात ठेवायला हवं. ज्यांचं अॅप अपडेट असेल त्यांनाच हा ऑप्शन दिसेल, तर काही अकाउंटना थोडं उशिरा मिळू शकतो. त्यामुळे ज्यांना अजून हा ऑप्शन दिसत नाही, त्यांनी थोडी वाट पाहावी. दरम्यान, प्ले स्टोअरमध्ये जाऊन इंस्टाग्राम अपडेट करून बघावं, म्हणजे नवं फीचर वेळेत वापरता येईल.