पोलीस स्टेशन हिंगणघाट हद्दीतील चार सराईत गुन्हेगार वर्धा जिल्ह्यातून हद्दपार

हिंगणघाट शहरातील कायदा व सुव्यवस्था बिघडू नये आणि शहरात वाढणाऱ्या गुन्हेगारीला आळा बसावा, हा उद्देश मनात बाळगून पोलीस स्टेशन हिंगणघाटचे ठाणेदार अनिल राऊत यांनी काही सराईत गुन्हेगारांविरुद्ध हद्दपारीची कारवाई हाती घेतली होती. हिंगणघाट शहरात संघटितपणे अवैध दारू विक्रीचा धंदा करणारे आणि शरीराविरुद्धचे गुन्हे करणारे तिघे सराईत गुन्हेगार - आकाश उर्फ निंबू अमर तेलतुंबडे (वय 26), जगदीश अमर तेलतुंबडे (वय 29) आणि अजय ज्ञानेश्वर मातकर (वय 47) - हे तिघेही संत चोखोबा वार्ड, हिंगणघाट येथील रहिवासी आहेत. या तिघांविरुद्ध महाराष्ट्र पोलीस कायद्याच्या कलम 55 अन्वये हद्दपारीचा प्रस्ताव तयार करण्यात आला होता.

हा प्रस्ताव उपविभागीय पोलीस अधिकारी हिंगणघाट सुशीलकुमार नायक यांच्यामार्फत मंजुरीसाठी पोलीस अधीक्षक, वर्धा यांच्याकडे पाठवण्यात आला होता. या प्रस्तावावरून पोलीस अधीक्षक, वर्धा सौरभकुमार अग्रवाल यांनी 17 सप्टेंबर 2026 रोजी हा प्रस्ताव मंजूर करत तिन्ही गुन्हेगारांना वर्धा जिल्ह्यातून दोन वर्षांसाठी हद्दपार करण्याचे आदेश दिले.

याशिवाय अमली पदार्थ विक्री, अवैध दारू विक्री आणि महिलांविरुद्ध गुन्हे करणारा आणखी एक सराईत गुन्हेगार सुजित अशोकराव गावंडे, रा. संत कबीर वार्ड, हिंगणघाट, याच्याविरुद्धही महाराष्ट्र पोलीस कायद्याच्या कलम 56 अन्वये स्वतंत्र प्रस्ताव तयार करण्यात आला आणि तो मंजुरीसाठी उपविभागीय अधिकारी, हिंगणघाट यांच्याकडे पाठवण्यात आला होता. उपविभागीय अधिकारी हिंगणघाट यांनी 17 सप्टेंबर 2026 रोजी हा प्रस्तावही मंजूर करत गावंडे याला वर्धा जिल्ह्यातून सात दिवसांसाठी हद्दपार करण्याचे आदेश दिले.

अशा प्रकारे हिंगणघाट शहरातील एकूण चार सराईत गुन्हेगार वर्धा जिल्ह्यातून हद्दपार झाले आहेत. या कारवाईमुळे शहरातील इतर सराईत गुन्हेगारांचे धाबे दणाणले असून, येत्या काळात हिंगणघाट शहरात होणाऱ्या सण-उत्सवांदरम्यान शांतता राखण्यास याची मदत होणार आहे.

ही कारवाई अपर पोलीस अधीक्षक सदाशिव वाघमारे, वर्धा आणि उपविभागीय पोलीस अधिकारी सुशीलकुमार नायक, हिंगणघाट यांच्या मार्गदर्शनाखाली पोलीस स्टेशन हिंगणघाटचे ठाणेदार अनिल राऊत यांनी पार पाडली. या कारवाईत पोलीस स्टेशनचे पो. हवा. प्रवीण देशमुख, पो. अं. संग्राम मुंडे, शिवशंकर यादव आणि संतोष लोहटे यांनीही मदत केली.