'हनुमान अंश' पाहून 'कैंची धाम'ला जाण्याचा विचार करत आहात? आधी वाचा संपूर्ण Travel Guide

उत्तराखंडमधील कैंची धाम हे नीम कराैली बाबांचे ठिकाण त्याच्या शांततामय वातावरणासाठी ओळखले जाते. अलीकडेच हनुमान अंश या चित्रपटात हे धाम दाखवण्यात आले, आणि त्यानंतर या ठिकाणाची प्रसिद्धी आणखीच वाढली. शिप्रा नदीच्या काठावर वसलेल्या या धामला भेट दिल्यावर भक्तांना एका वेगळ्याच प्रकारच्या शांततेचा अनुभव येतो. शहराच्या गडबडीपासून लांब असे हे ठिकाण अनेकांना खुणावते. तुम्हीही इथे जाण्याचा विचार करत असाल तर रस्ता, योग्य वेळ आणि दर्शनाशी संबंधित नियम माहिती असणे गरजेचे आहे.

कैंची धाम हे नैनीतालपासून अवघे १७ किमी अंतरावर आहे. इथे रेल्वे, रस्ता आणि हवाई अशा तिन्ही मार्गांनी पोहोचता येते. रेल्वेने जायचे असेल तर काठगोदाम हे सर्वात जवळचे स्टेशन असून ते कैंची धामपासून साधारण ३८ किमी लांब आहे. रस्त्याने जायचे असल्यास हल्द्वानी आणि भवाली मार्गे कार किंवा बसने ७ ते ८ तासांत तिथे पोहोचता येते. मुंबईहून थेट कैंची धामला जाणे लांबचे पडत असल्याने बरेच लोक आधी दिल्लीला जातात आणि तिथून पुढचा प्रवास सुरु करतात. विमानाने जायचे असेल तर पंतनगर विमानतळ हे सर्वात जवळचे विमानतळ असून तिथून टॅक्सी करून कैंची धामला पोहोचता येते.

या ठिकाणाला भेट देण्यासाठी सप्टेंबर ते नोव्हेंबर हा काळ सर्वोत्तम मानला जातो. मात्र पावसाळ्याच्या दिवसांत जास्त काळजी घ्यावी लागते, कारण त्यावेळी रस्ते बंद होणे आणि भूस्खलनासारख्या अडचणी येऊ शकतात. धामला भेट देण्याची वेळ सकाळी ६.४५ पासून ते रात्री ८ वाजेपर्यंत आहे. संध्याकाळी ७ वाजता होणाऱ्या आरतीसाठी भक्तांची विशेष गर्दी जमते. दर मंगळवारी इथे खास किर्तनाचे आयोजन केले जाते, जे रात्री ९ वाजेपर्यंत सुरु असते.

राहण्याच्या व्यवस्थेबाबत सांगायचे झाल्यास, आश्रमात राहण्याची सोय फार मर्यादित आहे. त्यामुळे तिथे जाण्यापूर्वी आश्रमात किंवा आजूबाजूच्या हॉटेलमध्ये राहण्यासाठी आधीच अ‍ॅडव्हान्स बुकिंग करून घेणे गरजेचे आहे. आणखी एक महत्त्वाची गोष्ट म्हणजे मंदिराच्या आत मोबाईल फोनचा वापर, सेल्फी काढणे किंवा फोटो-व्हिडिओ शूट करणे यावर सक्त बंदी घातलेली आहे, त्यामुळे दर्शनासाठी जाताना हा नियम लक्षात ठेवावा. उत्तराखंडमधील नैनीतालजवळील या कैंची धामला भेट देणाऱ्यांनी हा प्रवास आखताना वरील सर्व बाबींची आधीच नोंद घेतल्यास प्रवास सुखकर होऊ शकतो. रस्त्याचा मार्ग निवडताना अंतर, वेळ आणि हवामान यांचा विचार करूनच योग्य निर्णय घ्यावा, जेणेकरून दर्शनाचा अनुभव अधिक चांगला मिळू शकेल.