गणेशोत्सव विसर्जन काळात नाशिकमध्ये वाहतुकीत बदल, देखावे-विसर्जन मार्गांवर वाहनबंदी
नाशिक पोलिसांनी विसर्जन मिरवणुका आणि देखावे पाहण्यासाठी होणारी गर्दी लक्षात घेऊन शहरातील काही मार्गांवर वाहनांना नो एन्ट्री जाहीर केली आहे.
नाशिक शहरात गणेशोत्सव मोठ्या उत्साहात साजरा होत असताना, गणेशभक्तांना देखावे नीट पाहता यावेत आणि विसर्जन मिरवणुका कोणत्याही अडथळ्याशिवाय पार पडाव्यात यासाठी नाशिक शहर पोलिसांनी वाहतुकीचे खास नियोजन केले आहे. पोलीस उपायुक्त (मुख्यालय व वाहतूक) चंद्रकांत गवळी यांनी मोटार वाहन कायद्यानुसार दोन वेगवेगळ्या अधिसूचना काढून पंचवटी परिसरासह शहराच्या मध्यवर्ती भागातील रस्त्यांवर नो व्हेईकल झोन आणि वाहतुकीत बदल जाहीर केले आहेत.
गणेश विसर्जनाच्या पाचव्या दिवशी म्हणजे शुक्रवार, १८ सप्टेंबर २०२६ आणि सातव्या दिवशी म्हणजे रविवार, २० सप्टेंबर २०२६ रोजी घरगुती आणि सार्वजनिक गणपतींच्या विसर्जनासाठी मोठी गर्दी होणार असल्याने, या दोन्ही दिवशी दुपारी २ ते रात्री १२ वाजेपर्यंत काही मार्गांवर बस आणि अवजड वाहनांना बंदी घालण्यात आली आहे. निमाणी बसस्थानकावरून पंचवटी कारंजा आणि मालेगाव स्टँडमार्गे रविवार कारंजाकडे जाणारा मार्ग, तसेच सीबीएसकडून अशोकस्तंभ आणि रविवार कारंजामार्गे पंचवटी कारंजाकडे जाणारा मार्ग या काळात बंद राहील.
या बंद मार्गांना पर्याय म्हणून, निमाणीहून नाशिक रोड, सिडको आणि सातपूरकडे जाणाऱ्या वाहनांनी निमाणी, काट्या मारुती चौक, संतोष टी पॉइंट किंवा विश्वकर्मा चौक, कन्नमवार पूल आणि द्वारका या मार्गाने जावे, असे पोलिसांनी सुचवले आहे. तर सीबीएसकडून पंचवटी आणि निमाणीकडे जाणाऱ्या वाहनांनी सीबीएस, अशोकस्तंभ, रामवाडी ब्रिज, मखमलाबाद नाका, पेठनाका सिग्नल आणि दिंडोरी नाका या मार्गाने निमाणी स्टँडकडे जावे.
पंचवटी परिसरातील देखावे आणि सजावट पाहण्यासाठी दरवर्षी प्रचंड गर्दी होते, हे लक्षात घेऊन २१ ते २४ सप्टेंबर २०२६ या काळात दररोज सायंकाळी ५ ते रात्री १२ वाजेपर्यंत, किंवा देखावे बंद होईपर्यंत, काही मार्गांवर सर्व प्रकारच्या वाहनांना प्रवेशबंदी असणार आहे. यामध्ये दिंडोरी नाका ते पंचवटी कारंजा व मालेगाव स्टँड, मखमलाबाद नाका ते मालेगाव स्टँड या मार्गांचा समावेश आहे. पंचवटीतील अंतर्गत चौकांमध्येही निर्बंध असतील - मालवीय चौक ते गजानन चौक, गजानन चौक ते नागचौक, नागचौक ते शिवाजी चौक आणि शिवाजी चौक ते मालवीय चौक हे मार्ग तसेच सरदार चौक ते काळाराम मंदिरादरम्यानचे दोन्ही मार्ग बंद राहतील.
या भागातील वाहतुकीसाठी पर्यायी मार्गही जाहीर करण्यात आले आहेत. दिंडोरी नाक्याकडून मालेगाव स्टँडकडे जाण्यासाठी पेठ फाटा, मखमलाबाद नाका, बाथजाबाई छावणी, रामवाडी आणि चोपडा लॉन्स या मार्गाचा वापर करावा, तर दिंडोरी नाक्याकडून निमाणी किंवा इतरत्र जाण्यासाठी दिंडोरी नाका, निमाणी, काट्या मारुती चौक आणि संतोष टी पॉइंट या मार्गाने जावे. मखमलाबाद नाक्याकडून जाणाऱ्यांनी पेठ नाका मार्गे पर्यायी रस्त्याचा वापर करावा, असे पोलिसांनी स्पष्ट केले आहे.
हे सर्व निर्बंध पोलीस वाहने, रुग्णवाहिका, अग्निशमन दलाची वाहने आणि संबंधित परिसरातील स्थानिक रहिवाशांच्या वाहनांना लागू असणार नाहीत, असेही पोलिसांनी नमूद केले आहे. मात्र या अधिसूचनेचे उल्लंघन करणाऱ्या वाहनधारकांवर मोटार वाहन अधिनियम आणि मुंबई पोलीस अधिनियमातील तरतुदींनुसार कडक कायदेशीर कारवाई केली जाईल, असा स्पष्ट इशारा पोलीस प्रशासनाने दिला आहे.
