गणपतीसाठी गावी जायचंय, पण बॉस सुट्टी देईना; चाकरमान्यांच्या धडपडीवर मीम्सचा पाऊस

गणेशोत्सव देशभर मोठ्या उत्साहात साजरा होतो, पण कोकणातला गणपती हा एकदम वेगळाच अनुभव असतो. त्यामुळे मुंबई-पुण्यात नोकरी करणाऱ्या सगळ्या चाकरमान्यांना यंदाही एकच ओढ लागलीये, ती म्हणजे गावी कोकणात जायची. त्यासाठी सध्या सगळीकडे एकच धावपळ सुरू आहे, ती म्हणजे ऑफिसमधून सुट्टी मिळवण्याची. बॉस कधी हो म्हणतोय आणि आपण गावी निघतोय, अशी अवस्था सध्या प्रत्येक कोकणकराची झाली आहे. याच धावपळीवर बेतलेले काही मीम्स सध्या इन्स्टाग्रामवर जोरदार व्हायरल होत आहेत आणि ते बघून हसू आवरणं कठीण आहे.

यातला पहिला मीम आहे तो एका कोकणी माणसाचा, जो एकदम स्टाईलमध्ये उभा आहे. त्याने तिकीट आधीच बुक करून कन्फर्मही करून टाकलंय. बॉसने नाही म्हटलं तरी मी गावी जाणारच, असा त्याचा एकंदरीत अ‍ॅटिट्यूड या मीममध्ये दाखवलाय. हा मीम बघून प्रत्येक कोकणी माणसाला ती आपलीच गोष्ट वाटल्याशिवाय राहणार नाही.

दुसरा मीम आहे बॉसने सुट्टी नाकारली त्या क्षणाचा. बॉस सांगतो, "काम खूप आहे, सुट्टी मिळणार नाही." हे ऐकल्यावर त्या कोकणी माणसाच्या डोक्यात नेमकं काय चालू असेल, हे या मीममध्ये टिपलंय. मीममध्ये तो सरळ राजीनामा द्यायच्या विचारात असल्याचं दाखवलंय. आणि हे केवळ मीममध्येच नाही, तर प्रत्यक्षातही घडतं. गणपतीसाठी अनेक जण नोकरी सोडायलाही मागेपुढे बघत नाहीत, कारण गणपतीसाठी काहीही, हीच त्यांची भावना असते.

तिसरा मीम आहे सुट्टीचा अर्ज देऊन बॉसच्या उत्तराची वाट बघणाऱ्या माणसाचा. अर्ज करून चार दिवस उलटले तरी बॉस काहीच बोलत नाही, ना हो म्हणतोय ना नाही. अशा वेळी त्या माणसाची जी घालमेल होते, ती या मीममध्ये अगदी बरोबर पकडलीये. काम असो वा घर, त्याचं कशातच धड लक्ष लागत नाही, फक्त टेन्शन तेवढं असतं.

सुट्टी अखेर मिळाल्यावरचा आनंदही एका वेगळ्याच मीममध्ये दाखवलाय. अनेकदा बॉसच्या मागे लागून, विनवण्या करून शेवटी सुट्टी हातात पडते आणि त्यानंतर त्या माणसाच्या चेहऱ्यावरचा आनंद बघण्यासारखा असतो. तो जणू स्वप्नातच गावी पोहोचलेला असतो, एसटीत बसलेला, गावची वाट, घरचा गणपती सगळं त्याच्या डोळ्यासमोर येत असतं. याउलट, बॉसने सुट्टी नाकारल्यावर मनात येणारे विचारही एका मीममध्ये दाखवलेत. गावी जाऊन धमाल करायचे सगळे बेत आधीच आखलेले असतात, पण बॉसच्या नकाराने त्यावर पाणी फिरतं. त्या वेळी येणारी उदासी आणि राग, दोन्ही भावना या मीममध्ये स्पष्ट दिसतात.

शेवटच्या क्षणी बॉस "जा बाबा, तू पण गावी जा" असं म्हणतो, तेव्हा होणारा आनंद शब्दांत मांडणं अवघड असतं, आणि नेमका तोच आनंद एका मीममध्ये टिपलाय. हे मीम्स गमतीत बनवलेले असले, तरी प्रत्येक चाकरमान्याची हीच खरी कहाणी आहे. गणपतीसाठी गावी जाणं म्हणजे केवळ सुट्टी नाही, तर ती आपल्या मातीशी असलेली ओढ आहे.