शिंदेंवरील टीकेवरून खासदार ज्योती वाघमारे यांचा जरांगे पाटलांना इशारा

मुंबईतल्या बाळासाहेब भवनमध्ये झालेल्या पत्रकार परिषदेत शिवसेना खासदार डॉ. ज्योती वाघमारे यांनी मनोज जरांगे पाटील यांना स्पष्ट शब्दात इशारा दिला. मराठा समाजाच्या मागण्यांबाबत सरकार संवेदनशील असल्याचं त्यांनी सांगितलं आणि आंदोलन करण्याचा हक्क सगळ्यांना आहे हे मान्य करत, पण त्यातून शिवसेना नेते आणि राज्याचे उपमुख्यमंत्री एकनाथ शिंदे यांच्यावर पुढे टीका झाली तर ती सहन केली जाणार नाही, असं त्यांनी ठणकावलं.

खासदार वाघमारे यांनी शिंदे मुख्यमंत्री असताना घेतलेल्या निर्णयांचा पूर्ण तपशीलच पत्रकारांसमोर मांडला. मराठा समाजाला १० टक्के आरक्षण देण्याचा ऐतिहासिक निर्णय शिंदे साहेबांनी घेतला, हे त्यांनी आधी नमूद केलं. त्यानंतर न्यायमूर्ती शिंदे समिती आणि न्यायमूर्ती शुक्रे आयोग स्थापन करून कुणबी प्रमाणपत्र देण्याची प्रक्रिया सुरू केली गेली. यासाठी लाखो कुणबी नोंदी तपासल्या गेल्या आणि त्यातून कुणबी प्रमाणपत्र मिळण्याचा मार्ग खुला झाला. शिवाय राज्यातल्या ५२०० अधिसंख्य पदांवर मराठा उमेदवारांना नोकऱ्या देण्याचा निर्णय झाला आणि त्याची अंमलबजावणीही झाली, असं वाघमारे म्हणाल्या. त्यामुळे शिंदेंनी काय केलं असा प्रश्न विचारणाऱ्यांनी आधी हे सगळे निर्णय बघावेत, असं त्या म्हणाल्या.

अण्णासाहेब पाटील आर्थिक विकास महामंडळाच्या बिनव्याजी कर्जाची मर्यादा १० लाखांवरून १५ लाख रुपयांपर्यंत वाढवण्यात आली, याचाही उल्लेख त्यांनी केला. या महामंडळाकडून आतापर्यंत १६७० कोटी रुपयांहून जास्त कर्ज वितरित झालं असून १ लाख ७० हजारांहून जास्त मराठा बांधवांना याचा फायदा झाला. मराठा आरक्षण आंदोलनात मृत्यू झालेल्या ३६ जणांच्या वारसांना प्रत्येकी १० लाख रुपये देण्यात आले, तर २० मृत व्यक्तींच्या वारसांना एसटीत नोकरी दिली गेली. ईडब्ल्यूएस, एसईबीसी आणि ओबीसी प्रवर्गातल्या मुलींना वैद्यकीय आणि इंजिनिअरिंगसह ८०० हून जास्त व्यावसायिक कोर्सेससाठी १०० टक्के फी माफ केली गेली, असं त्यांनी सांगितलं.

सारथी संस्थेला राज्य सरकारकडून ३०० कोटी रुपयांचा निधी दिला गेला. सारथीच्या ६ विभागीय ऑफिससाठी आणि दोन उपकेंद्रांसाठी जमीन विनामूल्य उपलब्ध करून दिली गेली, तर पुण्यातल्या ऑफिससाठी ४२ कोटी रुपयांचा निधी दिला गेला. एकनाथ शिंदे हे शेतकऱ्याच्या घरात जन्माला आलेले आणि मुख्यमंत्रीपदापर्यंत पोहोचलेले मराठा समाजातलेच माणूस आहेत, त्यामुळे मराठा बांधवांबद्दल त्यांना खरी तळमळ आहे आणि समाजाला न्याय देण्याची त्यांची भूमिका आहे, असं वाघमारे यांनी सांगितलं.

मराठा समाजाच्या मूक मोर्चाला हिणवणारे लोक एका बाजूला आहेत आणि दुसऱ्या बाजूला समाजाच्या कल्याणासाठी काम करणारे शिंदे साहेब आहेत, याचाही विचार जरांगे यांनी करावा, असं त्या म्हणाल्या. शिंदे साहेबांनी मराठा समाजासाठी घेतलेले निर्णय आणि त्याचे फायदे जरांगे यांनी नीट अभ्यासले तर ते टीका थांबवतील, आणि शिंदे साहेबांवरची टीका मराठा समाजही सहन करणार नाही, असं वाघमारे यांनी स्पष्ट केलं. गणेशोत्सव आणि नवरात्रोत्सवाच्या तोंडावर राज्यातलं वातावरण बिघडू नये आणि महाराष्ट्राची सामाजिक एकी टिकून राहावी, यासाठी सगळ्यांनी काळजी घ्यायला हवी, असं त्या म्हणाल्या. संवादातून प्रश्न सुटतात हे त्यांनी नमूद केलं.

धनुष्यबाण हे केवळ निवडणुकीचं चिन्ह नसून मराठी माणसाचा अभिमान आणि प्रत्येक शिवसैनिकाचा जीव आहे, असं वाघमारे म्हणाल्या. बाळासाहेबांनी देवघरात पुजलेलं हे चिन्ह गोठवण्याची मागणी करताना लाज वाटत नाही का, असा सवाल त्यांनी संजय राऊत यांना उद्देशून केला. काँग्रेसच्या पायाशी गहाण पडलेलं हे चिन्ह एकनाथ शिंदे यांनी सन्मानाने परत मिळवलं आणि त्याची शान टिकवली, असं त्या म्हणाल्या. धनुष्यबाण गोठवण्याची मागणी करणाऱ्यांच्या रक्तातला स्वाभिमान आणि मराठी अस्मिता गोठलीय, म्हणूनच ते अशी मागणी करत आहेत, अशी टीका त्यांनी केली.