IPS बुशरा बानो वादात: 'अस्सलामु अलैकुम' बोलल्यामुळे अडचणीत? गृह सचिवांकडे तक्रार दाखल

पश्चिम बंगाल केडरच्या आयपीएस अधिकारी बुशरा बानो सध्या एका व्हिडीओमुळे चर्चेत आल्या आहेत. त्यांनी स्वतःच्या प्रेरणादायी प्रवासाबद्दल एक व्हिडीओ शेअर केला होता, पण याच व्हिडीओमुळे त्या आता वादात सापडल्या आहेत. व्हिडीओची सुरुवात त्यांनी "अस्सलामु अलैकुम" या शब्दांनी केली होती, मध्ये "इन्शा अल्लाह" असा उल्लेख केला आणि शेवट "जजाकल्लाह" असे म्हणत केला. या शब्दप्रयोगांवरूनच आता त्यांच्याविरोधात पश्चिम बंगालच्या गृह सचिवांकडे थेट तक्रार दाखल करण्यात आली आहे.

तक्रार करणाऱ्या संघटनेच्या म्हणण्यानुसार, एखाद्या सरकारी अधिकाऱ्याने सार्वजनिक संदेशात धार्मिक अभिवादनाऐवजी तटस्थ आणि राष्ट्रीय पद्धतीचे शब्द वापरायला हवेत. सरकारी पदावर असलेल्या व्यक्तीने आपला संदेश कोणत्याही एका धर्माशी जोडलेला वाटू नये, असं संघटनेचं म्हणणं आहे.

ही तक्रार 'हिंदू लीगल फंड' नावाच्या संघटनेने पश्चिम बंगालच्या गृह सचिवांकडे पाठवली आहे. संघटनेचा आरोप असा आहे की, बुशरा बानो यांनी त्यांच्या व्हिडीओमध्ये उर्दू आणि इस्लामिक अभिवादनाचा वापर केला, पण "जय हिंद" किंवा "वंदे मातरम्" यांसारख्या राष्ट्रीय अभिवादनाचे शब्द मात्र वापरले नाहीत. भारतीय राज्याचे प्रतिनिधित्व करणाऱ्या कोणत्याही कार्यरत अधिकाऱ्याने सार्वजनिक संवादात धार्मिक तटस्थता राखायला हवी, असे संघटनेने म्हटले असून याच मुद्द्यावर संघटनेने 'X' (ट्विटर) या सोशल मीडिया प्लॅटफॉर्मवर पोस्ट टाकत या प्रकरणाची चौकशी करण्याची मागणी केली आहे.

तक्रारीचा विषय बाजूला ठेवला तर बुशरा बानो यांचा आत्तापर्यंतचा प्रवास मात्र खूपच प्रेरणादायी राहिला आहे. त्यांचा जन्म उत्तर प्रदेशातील कन्नौज जिल्ह्यात झाला. त्यांनी अलिगढ मुस्लिम युनिव्हर्सिटीमधून (AMU) मॅनेजमेंट स्टडीजमध्ये पीएचडी पूर्ण केली असून UGC NET-JRF ही परीक्षाही त्यांनी उत्तीर्ण केली आहे. लग्न झाल्यानंतर आणि घरची जबाबदारी सांभाळत असतानाही त्यांनी आपलं स्वप्न सोडलं नाही. काही वर्षे त्यांनी सौदी अरेबियामध्ये असिस्टंट प्रोफेसर म्हणून नोकरी केली आणि त्यानंतर भारतात परत येत UPSC परीक्षेची तयारी करण्याचा निर्णय घेतला. नोकरी सोडून पुन्हा एकदा अभ्यासाला सुरुवात करणे आणि कुटुंबाची जबाबदारी सांभाळत परीक्षेची तयारी करणे हा त्यांच्यासाठी मोठा निर्णय होता.

याच व्हिडीओमध्ये बुशरा बानो यांनी सांगितले की, UPSC ची तयारी करत असताना अलिगढ मुस्लिम युनिव्हर्सिटीच्या 'रेजिडेन्शियल कोचिंग अकॅडमी'चा (RCA) त्यांना मोठा आधार मिळाला. तिथे मिळालेले अभ्यासाचे चांगले वातावरण, स्टडी मटेरियल, लायब्ररी आणि टेस्ट सिरीज यामुळे त्यांची तयारी अधिक भक्कम झाली, असे त्यांनी नमूद केले. या साधनांमुळे आपल्याला अभ्यासात सातत्य ठेवता आले आणि परीक्षेसाठी आवश्यक ती तयारी पूर्ण करता आली, असेही त्यांनी सांगितले.