'अडकित्ता': सई ताम्हणकर, सिद्धार्थ चांदेकर यांच्या सिनेमात पालकत्व अन् विश्वासाची कथा

करिअर सांभाळत मूल वाढवणं ही आजच्या तरुण जोडप्यांसमोरची मोठी कसरत असते. नेमक्या याच विषयाला हात घालणारा 'अडकित्ता' हा मराठी सिनेमा सध्या ZEE5 वर बघायला मिळतोय. सिनेमाचं नावच त्याचा गाभा सांगतं, कारण यातली माणसं नाती, जबाबदाऱ्या, विश्वास आणि भावनांच्या एका अशा पेचात अडकतात, ज्यातून सुटका सोपी नाही.

'मुलाला जन्म देणारी आई मोठी की त्याला वाढवणारी?' हा प्रश्न या कथेच्या केंद्रस्थानी आहे. सोबतच आईच्या मनात दडलेली अपराधीपणाची भावना आणि मूल गमावल्यावरचं दुःख, हे विषयही कथेत गुंफलेले आहेत. गौतम ही भूमिका सिद्धार्थ चांदेकरने, कस्तुरी ही भूमिका सखी गोखलेने, तर मंगल ही भूमिका सई ताम्हणकरने साकारली आहे.

कस्तुरी आणि गौतम हे दोघेही स्वतंत्र विचारांचे, करिअरला प्राधान्य देणारे आणि आपल्या मूळ गावापासून दूर राहणारे जोडपं आहे. एका पार्टीत कस्तुरीला ती आई होणार असल्याचं कळतं आणि इथून त्यांच्या आयुष्याला वेगळं वळण मिळतं. गरोदरपणाच्या आठव्या महिन्यात मात्र मोठं संकट उभं राहतं, कस्तुरीला जुळी मुलं होणार असतात पण त्यातल्या एका बाळाचा जन्माआधीच मृत्यू होतो. कस्तुरी आणि दुसऱ्या बाळाचाही जीव धोक्यात येतो, पण डॉक्टरांच्या प्रयत्नांमुळे दोघांचे प्राण वाचतात आणि कस्तुरी एका मुलाला जन्म देते. या मुलाचं नाव ओंकार.

ओंकारच्या जन्मानंतर मात्र कस्तुरी आणि गौतमची खरी परीक्षा सुरू होते. काम आणि बाळाची जबाबदारी यात समतोल राखणं कठीण होऊन बसतं, त्यामुळे बाळाची काळजी घेण्यासाठी त्यांना बाहेरची मदत घ्यावी लागते. इथेच मंगल त्यांच्या घरात येते. सुरुवातीला ती दोघांसाठी मोठा आधार ठरते, पण हळूहळू तिच्यावरचं अवलंबित्व वाढत जातं आणि ओंकार व मंगल यांच्यातही एक वेगळी जवळीक तयार होते.

यानंतर कथा फक्त पालकत्वापुरती मर्यादित राहत नाही, तर घरात एका बाहेरच्या माणसावर किती विश्वास ठेवायचा, या विश्वासाला काही सीमा असते का, आणि ती सीमा ओलांडली गेली तर नात्यांचं काय होतं, असे प्रश्न पुढे येतात. मंगलच्या आयुष्यात दिसण्यापलीकडचं बरंच काही दडलेलं आहे. तिनेही आधी आपलं मूल गमावलेलं असतं आणि त्यानंतर तिचा नवराही तिला सोडून जातो, तरी ती स्वतःला सावरून पुन्हा उभी राहण्याचा प्रयत्न करते.

मंगल आणि कस्तुरी या दोघींची परिस्थिती वेगळी असली तरी दोघीही आईपणाच्या भावनेने जोडलेल्या आहेत, आणि त्यामुळेच ओंकारशी वाढणारी मंगलची जवळीक कस्तुरीला अस्वस्थ करते. दिग्दर्शक आशुतोष निखिल परंधकर यांचा हा पहिलाच सिनेमा असून, यात मोठे नाट्यमय चढउतार नाहीत, तरीही कथा हळूहळू पुढे सरकत प्रेक्षकाला बांधून ठेवते. सई ताम्हणकरने साकारलेली मंगल ही पैशाची गरज असलेली, पण मनाने संवेदनशील आणि दयाळू व्यक्तिरेखा आहे, जी इतकं दुःख सोसूनही आपली माणुसकी सोडत नाही. सिद्धार्थ चांदेकरने साकारलेला गौतम पत्नीला साथ देणारा आणि घरात समतोल राखू पाहणारा आहे, तर सखी गोखलेने कस्तुरीच्या भूमिकेतून नव्याने आई झालेल्या स्त्रीच्या मनातील तणाव उभा केला आहे. सिनेमातलं संगीतही शांत, भावपूर्ण असून कथेतला काळ आणि भावना अधोरेखित करतं.

एका बातमीनंतर कस्तुरी आणि गौतम मंगलवर लक्ष ठेवण्यासाठी घरात सीसीटीव्ही लावण्याचा निर्णय घेतात, आणि गौतम जवळपास महिनाभर तिच्यावर लक्ष ठेवतो. इथून एक प्रश्न समोर येतो, ज्या व्यक्तीवर मुलाची जबाबदारी सोपवली, तिच्यावरचा विश्वासच आता उरला आहे का? शेवटाकडे जाताना नात्यांची ही गुंतागुंत आणखी वाढते आणि कथा अनपेक्षित वळण घेते. मोठे ट्विस्ट किंवा अतिनाट्य टाळून मातृत्व, विश्वास आणि नात्यांमधील असुरक्षितता या भावना प्रामाणिकपणे मांडणारा सिनेमा बघायचा असेल, तर 'अडकित्ता'ला एक संधी नक्की देता येईल.