हमजा बिन लादेनचा नवा व्हिडिओ आला, 9/11 च्या 25 व्या वर्षपूर्तीला अल-कायदाकडून प्रसिद्ध
9/11 हल्ल्याला 25 वर्षे पूर्ण झाल्याच्या निमित्ताने अल-कायदाने 50 मिनिटांचा व्हिडिओ काढला असून त्यात ओसामा बिन लादेनचा मुलगा हमजा बिन लादेन दिसल्याचा दावा केला जातोय.
11 सप्टेंबर 2001 रोजी अमेरिकेत झालेल्या भीषण दहशतवादी हल्ल्याला आता 25 वर्षे झाली आहेत. न्यू यॉर्कमधील ट्विन टॉवर्स, पेंटागॉन आणि पेनसिल्व्हेनिया इथे झालेल्या या हल्ल्यांमध्ये 2,977 निष्पाप नागरिकांचा जीव गेला होता. याच काळ्या दिवसाची 25 वी वर्षपूर्ती साजरी होत असतानाच दहशतवादी संघटना अल-कायदाच्या अधिकृत माध्यम शाखेने, म्हणजे अस-सहाबने, तब्बल 50 मिनिटांचा एक खास व्हिडिओ बाहेर काढला आहे.
"11 सप्टेंबरच्या हल्ल्यांची पंचवीस वर्षे" असं नाव दिलेल्या या व्हिडिओत ओसामा बिन लादेनचा मुलगा आणि त्याचा संभाव्य वारसदार मानला जाणारा हमजा बिन लादेन प्रत्यक्ष दिसतो. यामुळे आंतरराष्ट्रीय गुप्तचर यंत्रणांमध्ये खळबळ उडाली आहे.
हमजा बिन लादेन हा अल-कायदामध्ये ओसामा बिन लादेनचा नैसर्गिक वारसदार म्हणून पुढे येत होता. पण 2019 मध्ये तत्कालीन अमेरिकन अध्यक्ष डोनाल्ड ट्रम्प यांच्या प्रशासनाने एका खास दहशतवादविरोधी कारवाईत अफगाणिस्तान-पाकिस्तान सीमेवर हमजा मारला गेल्याचा दावा केला होता. अमेरिकेने त्याच्यावर 10 लाख डॉलर्सचं बक्षीस लावलं होतं. मात्र अल-कायदाने त्याच्या मृत्यूची अधिकृत कबुली कधीच दिली नव्हती, ना त्याच्यासाठी नेहमीसारखा शोकसंदेश जारी केला होता. आता तब्बल 7 वर्षांनंतर आलेल्या या व्हिडिओमुळे हमजा खरंच मारला गेला होता की तो जिवंत आहे, यावरून पुन्हा एकदा वाद आणि शंका निर्माण झाल्या आहेत.
या नव्या व्हिडिओत हमजा बिन लादेन पारंपरिक पांढरी पगडी घालून एका तुटलेल्या मातीच्या भिंतीला टेकून बसलेला दिसतो आणि त्याच्या शेजारी असॉल्ट रायफल ठेवलेली आहे. त्याच्या प्रत्यक्ष वावराचं हे पहिलंच फुटेज मानलं जातंय. या व्हिडिओत अल-कायदाचा माजी प्रमुख आयमान अल-जवाहिरीचे आधी कधीही न पाहिलेले फोटोही दाखवण्यात आले आहेत. गुप्तचर विश्लेषकांच्या मते, अल-कायदाचा सध्याचा प्रमुख सैफ अल-अदल हा 'बिन लादेन' या नावाचा आणि कौटुंबिक प्रतिमेचा वापर करून आपला विचार पसरवण्याचा आणि तरुण दहशतवाद्यांची नवी भरती करण्याचा प्रयत्न करतोय.
व्हिडिओची सुरुवात सप्टेंबर 2014 मध्ये अल-कायदा इन द इंडियन सबकॉन्टिनेंट (AQIS) यांनी कराची नौदल तळावर केलेल्या हल्ल्याच्या फुटेजने होते. यावरून अल-कायदाच्या मध्यवर्ती नेतृत्वावर पाकिस्तानी दहशतवादी गटांचा किती प्रभाव आहे, हे स्पष्ट होतं असं तज्ज्ञांचं म्हणणं आहे. 9/11 च्या 25 व्या स्मृतिदिनानिमित्त अमेरिकेत सुरक्षा यंत्रणा पूर्ण सतर्क असतानाच हा प्रोपोगंडा व्हिडिओ समोर आल्यामुळे अमेरिकन गुप्तचर संस्था सीआयए आणि पेंटागॉन याची सखोल तांत्रिक तपासणी करत आहेत. हा व्हिडिओ जुना आहे की अलीकडचा, याचा तपास सध्या सुरू आहे.
