१२ वर्षांचा अनुभव, आता स्वतःचं क्लिनिक! अभिनेत्याची गणेशोत्सवात नवी सुरुवात

सिनेसृष्टीत असे बरेच कलाकार आहेत जे मूळ पेशाने डॉक्टर किंवा इंजिनिअर असून, आवडीखातर अभिनय करतात. अशाच कलाकारांपैकी एक नाव म्हणजे अमोल कांगणे. तो पेशाने ऑडिओलॉजिस्ट आहे, म्हणजेच कानाचा डॉक्टर. नुकतंच त्याने मुंबईत स्वतःचं क्लिनिक सुरू केलं असून, सोशल मीडियावर पोस्ट टाकत त्याने ही आनंदाची बातमी चाहत्यांसोबत शेअर केली.

गणेशोत्सवाच्या मुहूर्तावर अमोलने गोरेगावमध्ये आपलं नवीन क्लिनिक ओपन केलं. याबद्दल पोस्ट करताना तो म्हणाला, "12 वर्ष मेडिकल लाईनमध्ये काम केल्यावर आणि माझ्या वडिलांच्या हॉस्पिटलच्या प्रवासात सोबत राहिल्यावर आता मी आयुष्यात नवीन सुरुवात करतोय, हे सांगताना मला खूप अभिमान आणि आनंद वाटतोय. एक श्रवणतज्ञ म्हणून मी सांगू इच्छितो की मी माझं नवीन क्लिनिक मुंबईत गोरेगाव इथे सुरु केलं आहे. हा माझ्यासाठी खूप खास आणि भावनिक क्षण आहे. गणपती बाप्पा मोरया!" म्हणजेच, मेडिकल क्षेत्रातला बारा वर्षांचा अनुभव आणि वडिलांच्या हॉस्पिटलच्या प्रवासात त्यांच्यासोबत राहिल्याचा अनुभव गाठीशी घेऊन तो आता स्वतःच्या क्लिनिकच्या रूपाने नवा टप्पा सुरू करतोय, असं त्याने या पोस्टमध्ये स्पष्ट केलं. या पोस्टवर इंडस्ट्रीतल्या अनेकांनी त्याला शुभेच्छा दिल्या.

अमोल कांगणे हा सिनेसृष्टीतला ओळखीचा चेहरा आहे. आत्तापर्यंत त्याने जवळपास 22 सिनेमे बनवले असून त्यातूनच निर्माता म्हणून त्याने आपलं नाव कमावलं आहे. काही सिनेमांमध्ये तो निर्माता म्हणून नाही, तर अभिनेता म्हणून समोर आला. त्याची बहीण प्रीतम कांगणे हीदेखील अभिनेत्री असून तिने अनेक मराठी सिनेमांत महत्त्वाच्या भूमिका साकारल्या आहेत. संपूर्ण कुटुंबच कलाक्षेत्रात असूनही अमोलने डॉक्टरकीचं शिक्षण मात्र सोडलं नाही. या क्षेत्रात त्याने तब्बल 12 वर्ष काम केलं आहे. त्याच्या वडिलांचंही स्वतःचं हॉस्पिटल असून, वडिलांना बघूनच त्याला ही प्रेरणा मिळाली असावी. म्हणजेच घरातलं वैद्यकीय वातावरण आणि वडिलांचा आदर्श यामुळेच त्याने सिनेसृष्टीतल्या यशानंतरही डॉक्टरकीचं क्षेत्र सोडलं नाही, हे यातून स्पष्ट होतं.

एकीकडे सिनेमाचं शूटिंग आणि निर्मिती, तर दुसरीकडे पेशंट तपासणं, ही दोन्ही कामं एकत्र सांभाळणं सोपं नाही. आजकाल एकच काम धड सांभाळणं अनेकांना जमत नाही, पण अमोल मात्र दोन वेगळ्या क्षेत्रांत यशस्वीपणे काम करतोय. एकीकडे ग्लॅमरची दुनिया, तर दुसरीकडे डॉक्टरकीची सेवा, अशा दोन्ही आघाड्यांवर तो यशस्वी ठरला आहे. गोरेगावमधलं हे नवीन क्लिनिक ऐकण्याची समस्या असलेल्या रुग्णांसाठी असणार आहे, म्हणजे ज्यांना कानाशी संबंधित त्रास आहे अशा रुग्णांची तपासणी आणि उपचार तो इथे करणार आहे. एक कलाकार जेव्हा डॉक्टर बनून सेवा देतो, तेव्हा त्याचं कौतुक व्हायलाच हवं. अमोलच्या या नव्या प्रवासासाठी त्याला खूप खूप शुभेच्छा.