विक्रांत मैसीचं नवं पाऊल, हिमाचल-उत्तराखंडमध्ये उभारणार 'मुसाफिर कॅफे'

अभिनयातून प्रेक्षकांच्या मनात स्वतःची वेगळी जागा तयार करणारा अभिनेता विक्रांत मैसी सध्या त्याच्या नव्या प्रोजेक्टमुळे चर्चेत आला आहे. 'मुसाफिर कैफे' या शोला मिळालेल्या यशानंतर आता विक्रांत या शोमधली संकल्पना प्रत्यक्ष आयुष्यात साकारण्याच्या तयारीला लागला आहे. मिळालेल्या माहितीनुसार, अभिनेता हिमाचल प्रदेश आणि उत्तराखंडमध्ये 'मुसाफिर कॅफे' नावाचे दोन कॅफे उभारणार आहे.

हिमाचल प्रदेशमध्ये एक आणि उत्तराखंडमध्ये दुसरं, अशी दोन 'मुसाफिर कॅफे' विक्रांत मैसी सुरू करणार आहे. विशेष म्हणजे या दोन्ही कॅफेच्या बांधकामाचं काम आधीच सुरू झाल्याचं सांगितलं जात आहे. 'मुसाफिर कैफे' या शोमध्ये जे कॅफे दाखवण्यात आलं होतं, अगदी त्याच धर्तीवर या दोन्ही कॅफेची रचना करण्याचा प्रयत्न केला जात आहे.

या कॅफेचं आणखी एक वैशिष्ट्य म्हणजे इथे कलाकारांना राहण्यासाठी जवळपास वीस खोल्या असणार आहेत. त्यामुळे हे ठिकाण फक्त कॅफेपुरतं मर्यादित न राहता कलाकारांसाठी एक रेसिडेन्सी स्पेस म्हणूनही काम करणार आहे. देशातून आणि परदेशातून येणाऱ्या कलाकारांना इथे राहून स्वतःच्या कामावर लक्ष केंद्रित करता यावं, अशी यामागची संकल्पना असल्याचं समजतं.

विक्रांत मैसी 'मुसाफिर कैफे' या प्रोजेक्टशी फक्त अभिनेता म्हणून जोडलेला नाही. तो त्याच्या 'होममेड स्टोरीज' या प्रोडक्शन हाऊसच्या माध्यमातूनही या प्रोजेक्टचा भाग आहे. पडद्यावर दिसलेली ही कॅफेची संकल्पना प्रत्यक्ष जगात आणण्याचा प्रयत्न आता केला जात आहे.

'मुसाफिर कैफे' या सीरिजमध्ये विक्रांत मैसीने चंदर ही महत्त्वाची भूमिका साकारली होती. कॉर्पोरेट जगातल्या धावपळीपासून दूर जाऊन डोंगरांमध्ये शांत आयुष्य जगायचं आणि स्वतःचं कॅफे सुरू करायचं, हे चंदरचं स्वप्न या कथेत दाखवण्यात आलं होतं. त्याच्या आयुष्याच्या प्रवासात 'मुसाफिर कैफे' हा एक महत्त्वाचा भाग होता.

या सीरिजमध्ये वेदिका पिंटो आणि महिमा मकवाना यांच्याही महत्त्वाच्या भूमिका होत्या. वेदिका ही महत्त्वाकांक्षी तरुणी असून मुंबईत मोठी सिव्हिल लॉयर व्हायचं तिचं स्वप्न आहे. तर दुसरीकडे, महिमा मकवानाने साकारलेली व्यक्तिरेखा चंदरसोबत मसुरीमध्ये 'मुसाफिर कैफे' चालवताना दिसते.

'मुसाफिर कैफे'ची कथा, त्यातलं डोंगरांचं वातावरण आणि चंदरचा प्रवास प्रेक्षकांना खूप आवडला होता. आता हीच संकल्पना प्रत्यक्ष आयुष्यात उतरवण्याचा प्रयत्न विक्रांत मैसी करत आहे. हिमाचल प्रदेश आणि उत्तराखंडमध्ये उभारले जाणारे हे दोन्ही कॅफे सुरू झाल्यानंतर कलाकारांना काम आणि राहण्याची सुविधा असलेली एक क्रिएटिव्ह स्पेस म्हणून ते विकसित होतील, अशी अपेक्षा व्यक्त केली जात आहे.