Mumbai FDA Action : तुकाराम मुंढेंचा दणका! नायर रुग्णालयाच्या कॅन्टीनसह 7 ठिकाणांचे परवाने निलंबित
नायर रुग्णालयाच्या कॅन्टीनसह मुंबईतील सात अन्न आस्थापनांवर FDA ची कारवाई; ऑलिम्पिया कॉफी हाऊसमध्ये स्वच्छतेबाबत गंभीर त्रुटी आढळल्याचा दावा.
सणासुदीच्या दिवसांत अन्नभेसळीच्या घटनांमध्ये वाढ होण्याची शक्यता लक्षात घेऊन मुंबईतील अन्न व औषध प्रशासनाने (FDA) कारवाईची मोहीम हाती घेतली आहे. अन्न सुरक्षा आणि स्वच्छतेच्या नियमांकडे दुर्लक्ष करणाऱ्या हॉटेल्स आणि अन्न आस्थापनांची FDA कडून तपासणी सुरू आहे. या मोहिमेअंतर्गत मुंबईतील सात मोठ्या अन्न आस्थापनांचे परवाने तातडीने निलंबित करण्यात आले आहेत. अन्न सुरक्षा नियमांचं पालन न करणाऱ्या आस्थापनांवर अशा प्रकारे कठोर कारवाई करण्याचा प्रशासनाचा उद्देश आहे.
FDA आयुक्त तुकाराम मुंढे यांच्या नेतृत्वाखाली ही कारवाई अधिक तीव्र झाल्याचं सांगितलं जात आहे. मुंबई महापालिकेच्या नायर रुग्णालयातील कॅन्टीनमध्ये अन्न सुरक्षा नियमांचं उल्लंघन आढळल्यानंतर प्रशासनाने या कॅन्टीनचा परवाना निलंबित केला. रुग्ण, त्यांचे नातेवाईक आणि इतर नागरिकांच्या आरोग्याचा विचार करून हा निर्णय घेण्यात आला, कारण रुग्णालयातील कॅन्टीनमध्ये अन्नाची गुणवत्ता आणि स्वच्छता राखणं आवश्यक मानलं जातं.
कुलाब्यातील प्रसिद्ध ऑलिम्पिया कॉफी हाऊसमध्येही FDA पथकाने अचानक तपासणी केली. ग्राहकांच्या तक्रारीनंतर ही तपासणी करण्यात आली, ज्यात स्वच्छतेबाबत गंभीर त्रुटी समोर आल्याचं प्रशासनाने सांगितलं. मूत्रालयाजवळ अन्नाची साठवणूक होत असल्याचं तपासणीत आढळलं. तसंच स्वयंपाकघर आणि भांडी धुण्याची जागाही अस्वच्छ असल्याचं दिसून आलं. या त्रुटींमुळे ग्राहकांच्या आरोग्याला धोका निर्माण होऊ शकतो, असं प्रशासनाचं म्हणणं आहे.
रेफ्रिजरेटरमध्ये मांसाहारी पदार्थांच्या रक्ताचे अवशेष आढळल्याचाही दावा FDA ने केला आहे. कच्चे शाकाहारी आणि मांसाहारी पदार्थ वेगवेगळे न ठेवता एकत्र साठवण्यात आल्याचंही तपासणीत निदर्शनास आलं. या कॉफी हाऊसमध्ये अन्न हाताळणाऱ्या एकूण 35 कर्मचाऱ्यांपैकी 34 कर्मचाऱ्यांकडे आवश्यक अन्न सुरक्षा प्रशिक्षण नसल्याचंही उघड झालं. यावरून आस्थापनेत अन्न सुरक्षेबाबत गंभीर हलगर्जीपणा असल्याचं समोर आलं.
याशिवाय चेंबूरमधील ब्लिंक कॉमर्स प्रायव्हेट लिमिटेड या क्विक-कॉमर्स डिलिव्हरी सेंटरवरही FDA ने कारवाई केली. घाटकोपरमधील विश्वास स्वीट्स अँड स्नॅक्स आणि ए-1 जनरल अँड ड्राय फ्रूट्स, वरळीतील मिलन पंजाब तसेच मालाड पूर्वेतील सद्गुरू स्वीट्स या आस्थापनांवरही कारवाई झाली आहे. या सर्व ठिकाणी अन्न सुरक्षा मानकांचं पालन होत नसल्याचं तपासणीत आढळून आलं.
अन्न सुरक्षा मानकांचं उल्लंघन करणाऱ्या या सर्व आस्थापनांचे परवाने निलंबित करण्यात आले असून अन्न सुरक्षा कायद्यानुसार पुढील कायदेशीर प्रक्रिया सुरू करण्यात आली आहे. नियम धाब्यावर बसवून अन्न विक्री करणाऱ्या आस्थापनांवर कठोर कारवाई केली जाईल, असा स्पष्ट संदेश या मोहिमेतून प्रशासनाने दिला आहे.
