मोबाइल गेमच्या नादात अल्पवयीन विद्यार्थिनीचे लैंगिक शोषण

नागपुरात मोबाइल गेमच्या नादात एका अल्पवयीन विद्यार्थिनीचे लैंगिक शोषण झाल्याची घटना समोर आली आहे. बेलतरोडी पोलिसांनी या विद्यार्थिनीला उत्तर प्रदेशातील सीतापूर येथून सुखरूप नागपुरात आणले आहे.

17 वर्षांच्या या विद्यार्थिनीला मोबाइलवर फ्री फायर हा गेम खेळण्याची सवय होती. हाच गेम खेळत असताना ती सीतापूर येथील सूरज कुमार राजपूत याच्या संपर्कात आली. सुरुवातीला गेममध्ये झालेली ही ओळख हळूहळू दोघांमधील मैत्रीत बदलली. या मैत्रीचे रूपांतर पुढे जवळिकीत झाले आणि सूरज याने तिला प्रेमाचे आमिष दाखवले, असा आरोप आहे. गेमच्या माध्यमातून सुरू झालेली ही ओळख त्या विद्यार्थिनीसाठी पुढे धोकादायक ठरली.

17 सप्टेंबर रोजी ही विद्यार्थिनी घरातून अचानक गायब झाली. मुलगी बेपत्ता झाल्याचे लक्षात येताच तिच्या कुटुंबीयांनी वेळ न दवडता बेलतरोडी पोलीस स्टेशन गाठले आणि तक्रार दाखल केली. कुटुंबीयांच्या या तक्रारीच्या आधारे पोलिसांनी अपहरणाचा गुन्हा दाखल करून तपास सुरू केला.

तपासादरम्यान पोलिसांना ही विद्यार्थिनी उत्तर प्रदेशातील सीतापूर येथे असल्याची माहिती मिळाली. ही माहिती मिळताच पोलिसांनी सीतापूरमध्ये छापा टाकून तिची सुटका केली आणि तिला सुखरूप नागपुरात परत आणले. या विद्यार्थिनीची सुटका केल्यानंतर झालेल्या चौकशीत तिचे लैंगिक शोषण करण्यात आल्याचे उघड झाले. या प्रकरणी आरोपी सूरज याला पोलिसांनी ताब्यात घेतले आहे.