इंडिगोचा प्रवाशांना धक्का, लहान बाळांच्या तिकिटात थेट 1,000 रुपयांची वाढ
इंडिगोने देशांतर्गत उड्डाणांसाठी 2 वर्षांखालील बाळांचे भाडे 2,000 वरून 3,000 रुपये केले असून, विमान सतत उशिराने धावत असतानाच हा निर्णय आला आहे.
विमानात बाळासाठी वेगळी सीट मिळत नाही की कुठली जास्तीची सोय मिळत नाही, तरीही आईवडिलांच्या मांडीवर बसणाऱ्या बाळाचं तिकीट आता पूर्ण 3,000 रुपये मोजावं लागणार आहे. देशातील सर्वात मोठी एअरलाइन इंडिगोने घरगुती उड्डाणांसाठी इन्फंट म्हणजे 2 वर्षांपर्यंतच्या बाळांचं भाडं वाढवून पालकांना मोठा झटका दिला आहे.
इंडिगोच्या अधिकृत फी लिस्टमध्ये सध्या घरगुती इन्फंट फी 3,000 रुपये नोंदवली गेली आहे. इंडिगोच्या नियमांनुसार इन्फंटसाठी वेगळी सीट बुक करता येत नाही, ते प्रौढ प्रवाशाच्या मांडीवरच प्रवास करतं. एका प्रौढ प्रवाशासोबत एकाच इन्फंटला परवानगी आहे.
इंडिगोने घरगुती उड्डाणांमध्ये 2 वर्षांखालील बाळांचं म्हणजे इन्फंट्सचं शुल्क 1,000 रुपयांनी वाढवलं आहे. आधी 2,000 रुपये द्यावे लागायचे, आता 3,000 रुपये द्यावे लागतील, म्हणजे प्रत्येक प्रवासात पालकांच्या खिशातून थेट 1,000 रुपये जास्त जाणार. विशेष म्हणजे बाळाला विमानात वेगळी सीट मिळत नाही, ते पालकांच्या मांडीवरच प्रवास करतं.
फ्लाइटमध्ये 2 वर्षांखालील बाळाला साधारणपणे वेगळी सीट दिली जात नाही. तरीही तिकीट बुक करताना इन्फंटची माहिती देणं गरजेचं असतं आणि त्यासाठी ठरलेलं शुल्क भरावं लागतं. प्रवासादरम्यान बाळाच्या वयाचा पुरावाही सोबत ठेवावा लागतो.
इंडिगोच्या नियमांनुसार 3 दिवसांपेक्षा जास्त आणि 2 वर्षांपर्यंत वय असलेल्या बाळांना इन्फंट मानलं जातं. या भाडेवाढीनंतर इंडिगोला वर्षाला जवळपास 90 कोटी रुपयांचं जास्तीचं उत्पन्न मिळू शकतं, असा दावा केला जात आहे.
एकट्याने प्रवास करणाऱ्या अल्पवयीन मुलांसाठीही इंडिगोने फ्लाइंग सोलो अनअकम्पनीड मायनर सर्व्हिसची घरगुती फी 5,999 रुपये ठेवली आहे. 5 ते 12 वर्षे वयाची मुलं या सेवेचा वापर करू शकतात, तर 5 वर्षांखालील मुलं एकटी प्रवास करू शकत नाहीत. म्हणजेच लहान मुलांसोबत प्रवास करणाऱ्या कुटुंबांसाठी फक्त तिकिटाची किंमतच नाही, तर इन्फंट फी आणि इतर अॅन्सिलरी सर्व्हिसेसही एकूण प्रवास खर्च वाढवू शकतात.
एअरलाइनच्या वेबसाइटवर इन्फंट फी शिवाय बॅगेज आणि इतर अॅड-ऑन सर्व्हिसेससाठीही वेगवेगळं शुल्क ठरवलेलं आहे. अतिरिक्त बॅगेज आणि इतर सेवांची फी प्रवास व सेवेच्या प्रकारानुसार वेगळी असते. त्यामुळेच प्रवाशांसाठी नुसती बेस तिकीट किंमत बघणं पुरेसं नाही, तिकिटासोबत जोडलेल्या अतिरिक्त सेवांचा खर्चही एकूण भाड्यावर परिणाम करू शकतो.
सध्या विमानं उशिरा धावण्यासोबतच रद्द होण्याचंही प्रमाण वाढलं आहे. गुरुवारी नागपूरहून कोलकात्याला रात्री 11.40 वाजता उड्डाण घेणारी एअर इंडिया एक्स्प्रेसची फ्लाइट क्रमांक आयएक्स 5003 तांत्रिक कारणांमुळे रद्द करण्यात आली. यासोबतच 17 आणि 18 सप्टेंबरला बेंगळुरू व हैदराबादसाठी जाहीर केलेल्या 3 अतिरिक्त उड्डाणांचं वेळापत्रकही रद्द करण्यात आलं.
