हंटर 350 आणि स्पीड 400 मध्ये किंमत, पॉवर आणि मायलेजमध्ये मोठा फरक

भारतातल्या रोडस्टर सेगमेंटमध्ये सध्या रॉयल एनफिल्ड हंटर 350 आणि ट्रायम्फ स्पीड 400 या दोन बाईकमध्ये जोरदार टक्कर बघायला मिळतेय. हंटर 350 मध्ये असिस्ट-अँड-स्लिप क्लच आणि सुधारलेलं सस्पेंशन दिल्यामुळे एंट्री-लेव्हल रोडस्टर म्हणून तिचं स्थान आणखी पक्कं झालंय, तर ट्रायम्फ स्पीड 400 वरच्या सेगमेंटमध्ये आपलं वर्चस्व टिकवून आहे.

या दोन्ही बाईकच्या किमतीत जवळपास 96,500 रुपयांचा फरक आहे. हा फरक फक्त ब्रँड किंवा नावापुरता मर्यादित नाही, तर दोन्ही गाड्यांच्या इंजिन, परफॉर्मन्स, चेसिस आणि तंत्रज्ञानातला खरा फरक यातून दिसतो. ब्रेकिंग आणि सस्पेंशन सिस्टीममध्येही दोन्हींमध्ये मोठा फरक आहे. या दोन्ही मूळ रोडस्टर बाईक असल्यानं क्रूझर किंवा टूररशी तुलना न करता, खरेदी करणाऱ्यांनी हा फरक नीट समजून घेणं गरजेचं आहे.

इंजिन आणि परफॉर्मन्सबद्दल बोलायचं झालं तर हंटर 350 मध्ये 349cc चं एअर-ऑइल-कूल्ड सिंगल-सिलेंडर इंजिन दिलंय, जे 20.2hp पॉवर आणि 27Nm टॉर्क देतं. यासोबत 5-स्पीड गिअरबॉक्स मिळतो. दुसरीकडे ट्रायम्फ स्पीड 400 मध्ये 398.15cc चं हाय रिव्हिंग लिक्विड-कूल्ड इंजिन असून ते 39.5hp पॉवर आणि 37.5Nm टॉर्क जनरेट करतं. यात 6-स्पीड गिअरबॉक्ससह स्लिप अँड असिस्ट क्लच दिलेला आहे.

इंजिन तंत्रज्ञानाबद्दल सांगायचं तर हंटर 350 मध्ये एअर-ऑइल कूल्ड, SOHC, 2-व्हॉल्व्ह इंजिन आहे; तर स्पीड 400 मध्ये लिक्विड-कूल्ड, DOHC, 4-व्हॉल्व्ह इंजिन दिलंय. कमाल पॉवरच्या बाबतीत हंटर 350 ही 6,100 rpm वर 20.2 bhp पॉवर देते, तर स्पीड 400 ही 8,000 rpm वर 39.5 bhp पॉवर जनरेट करते. कमाल टॉर्कच्या बाबतीत हंटर 350 ही 4,000 rpm वर 27 Nm टॉर्क देते, तर स्पीड 400 ही 6,500 rpm वर 37.5 Nm टॉर्क जनरेट करते.

इंजिन पॉवरमध्ये एवढा फरक असूनही दोन्ही बाईकच्या वजनात फार फरक नाही. हंटर 350 चं वजन 181kg आहे, तर स्पीड 400 चं वजन 179kg आहे. यामुळे स्पीड 400 ला पॉवर-टू-वेट रेशिओचा मोठा फायदा मिळतो आणि ती जास्त वेगानं पिकअप घेते. मायलेजच्या बाबतीत मात्र हंटर 350 पुढे आहे, जी 36.2kmpl मायलेज देते; तर स्पीड 400 चा मायलेज साधारण 27kmpl इतका आहे.

ब्रेकिंग सिस्टीमबद्दल बोलायचं झालं तर स्पीड 400 च्या 300mm फ्रंट डिस्क ब्रेकसोबत 4-पिस्टन रेडियल कॅलिपर मिळतो, ज्यामुळे स्पोर्टियर ब्रेकिंग अनुभव मिळतो. हंटर 350 च्या 300mm फ्रंट डिस्क ब्रेकसोबत साधा ट्विन-पिस्टन फ्लोटिंग कॅलिपर दिलेला आहे. सस्पेंशनच्या बाबतीत स्पीड 400 च्या मागच्या बाजूला एक्स्टर्नल रिझर्व्हायर आणि प्रीलोड अ‍ॅडजस्टमेंटसह मोनोशॉक सस्पेंशन आहे, जे जास्त वेगानं किंवा खडबडीत रस्त्यांवर चांगला अनुभव देतं. हंटर 350 मध्ये 6-स्टेप प्रीलोड अ‍ॅडजस्टमेंटसह ट्विन शॉक अ‍ॅब्जॉर्बर्स आहेत, जे मेंटेनन्स आणि सर्व्हिसिंगसाठी खूप सोपे आहेत. सीटच्या उंचीबद्दल सांगायचं तर हंटर 350 च्या सीटची उंची 790mm आहे, तर स्पीड 400 च्या सीटची उंची 803mm आहे. त्यामुळे दोन्ही बाईक चालवायला आणि हाताळायला सोप्या आहेत.

रोजच्या शहरातल्या प्रवासासाठी आणि कमी खर्चात चांगल्या रायडिंगसाठी हंटर 350 हा परवडणारा पर्याय आहे. दुसरीकडे, ज्यांना जास्त परफॉर्मन्स, दमदार वेग आणि आधुनिक फीचर्स हवेत, त्यांच्यासाठी स्पीड 400 हा सर्वोत्तम पर्याय ठरतो. त्यामुळे जास्त पैसे खर्च करून जास्त पॉवर हवी की महिन्याचा ईएमआय कमी ठेवायचा, यावरच खरेदीचा निर्णय अवलंबून असेल.