दिशा सालियान प्रकरण: उद्धव ठाकरेंचा बदनामी थांबवण्याचा इशारा, कायदेशीर कारवाईची तयारी

दिशा सालियान मृत्यू प्रकरणात ठाकरे कुटुंबाला सतत लक्ष्य केले जात असल्याबद्दल शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी तीव्र नाराजी व्यक्त केली आहे. ही बदनामीची मोहीम अशीच सुरू राहिली तर थेट कायदेशीर मार्ग अवलंबू, असा स्पष्ट इशारा त्यांनी गुरुवारी, 17 सप्टेंबर रोजी पत्रकारांशी बोलताना दिला. या दुर्दैवी घटनेशी आपला किंवा आदित्य ठाकरे यांचा काडीमात्र संबंध नसल्याचे त्यांनी ठामपणे सांगितले आणि केवळ राजकीय सूड उगवण्यासाठी आपले चारित्र्यहनन केले जात असल्याचा आरोप केला.

मुंबई हायकोर्टाने दिशा सालियान प्रकरणाचा तपास सीबीआयकडे सोपवल्यानंतर सीबीआयने कोणत्याही व्यक्तीचे नाव गुन्ह्यात न नोंदवता एफआयआर दाखल केला आहे. याच पार्श्वभूमीवर छत्रपती संभाजीनगर येथे प्रसारमाध्यमांशी संवाद साधताना उद्धव ठाकरे म्हणाले की, दिशा सालियान यांचा मृत्यू ही अत्यंत क्लेशदायक घटना होती, मात्र त्यांच्या कुटुंबाचा त्याच्याशी काहीही संबंध नाही. आदित्य ठाकरे यांनीही याबाबत स्वतःची भूमिका आधीच स्पष्ट केली आहे, असेही त्यांनी नमूद केले. वारंवार निराधार आरोप केले जात असतील तर किती काळ सहन करायचे, असा प्रश्न उपस्थित करत, आता या प्रकरणात फक्त नरेंद्र मोदी आणि डोनाल्ड ट्रम्प यांचे नाव जोडणे बाकी राहिले आहे, अशी उपरोधिक टिप्पणीही त्यांनी केली.

विशेष तपास पथक (एसआयटी) या प्रकरणाचा तपास करत असल्यामुळे आतापर्यंत आपण शांत राहिलो, असे उद्धव ठाकरे यांनी सांगितले. ज्यांना तपास करायचा आहे त्यांनी तो जरूर करावा, मात्र विनाकारण सुरू असलेला बदनामीचा हा खेळ थांबला नाही, तर कायदेशीर पावले उचलली जातील, असे त्यांनी स्पष्ट केले.

आमदार आदित्य ठाकरे यांनीही सोशल मीडिया प्लॅटफॉर्म एक्सवर पोस्ट टाकून आपली बाजू मांडली होती. आपण दिशा सालियान यांना कधीही भेटलेलो नाही किंवा त्यांना ओळखतही नाही, आणि गेल्या सहा वर्षांपासून कोणताही पुरावा नसताना निव्वळ राजकीय व वैयक्तिक हेतूने आपली बदनामी केली जात असल्याचे त्यांनी नमूद केले होते.

दिशा सालियान या बॉलिवूड अभिनेता सुशांत सिंह राजपूत यांच्या माजी मॅनेजर होत्या. 8 जून 2020 रोजी मुंबईतील मालाड भागातील एका इमारतीच्या बाराव्या मजल्यावरून पडून त्यांचा मृत्यू झाला होता. मुंबई हायकोर्टाच्या आदेशानंतर आता सीबीआयने या प्रकरणाचा तपास सुरू केला असून, त्यामुळे राज्यातील राजकीय वातावरण पुन्हा एकदा तापले आहे.