केकेआरने डाव टाकला, अभिषेक नायरने थेट ऑफर दिली, रोहित शर्माने एका शब्दात गेम ओव्हर केला

भारतीय संघाचा स्टार फलंदाज रोहित शर्मा लवकरच टेलिव्हिजनवर पदार्पण करणार आहे. तो स्वतःचा 'फॅमिली फुल हाऊस विथ रोहित शर्मा' नावाचा शो घेऊन येत आहे. या शोच्या पहिल्या भागातच रोहितने त्याच्या आयपीएल भविष्याबाबत मोठे संकेत दिले असून, त्याच्याशी संबंधित एक व्हिडिओ सध्या सोशल मीडियावर प्रचंड व्हायरल होत आहे.

या व्हिडिओत केकेआरचा मुख्य प्रशिक्षक अभिषेक नायर याने रोहितला अप्रत्यक्षपणे आपल्या संघात येण्याची ऑफर दिल्याचे दिसते. यावर रोहितने दिलेली प्रतिक्रियाच सध्या चर्चेचा विषय बनली आहे.

शोच्या या भागात अभिषेक नायरसोबत श्रेयस अय्यर आणि शार्दुल ठाकूर हेदेखील पाहुणे म्हणून सहभागी झाले होते. सोशल मीडियावर व्हायरल झालेल्या प्रोमोमध्ये रोहितने पिवळ्या रंगाचे कपडे घातलेले दिसतात. यावेळी केकेआरचा मुख्य प्रशिक्षक आणि भारताचा माजी सहाय्यक प्रशिक्षक अभिषेक नायर याने "सीएसके, सीएसके" असा जयघोष करत रोहितची गमतीने थट्टा केली. त्यानंतर नायरने रोहितला सुचवले की जांभळ्या आणि सोनेरी रंगाच्या कपड्यांमध्ये तो जास्त उठून दिसेल, कारण हाच केकेआरचा रंग आहे. या बोलण्यातून नायरने एकप्रकारे रोहितला नाईट रायडर्समध्ये येण्याची ऑफरच देऊन टाकली.

मात्र अभिषेक नायरच्या या प्रस्तावानंतर लगेचच उपस्थितांनी "मुंबई, मुंबई" असा जयघोष सुरू केला. यावर रोहितने अवघ्या एका शब्दात उत्तर देत सगळ्यांची मने जिंकली. रोहित म्हणाला, "नेहमीच (फॉरेव्हर)." या एका शब्दातून रोहितने स्पष्ट केले की तो मुंबई इंडियन्सशी एकनिष्ठ असून याच संघाकडून आयपीएलमध्ये खेळत राहणार आहे. सध्या त्याचा संघ बदलण्याचा कोणताही विचार नसल्याचेही यातून स्पष्ट होते.

रोहित शर्मा २०११ सालापासून मुंबई इंडियन्स संघाचा भाग आहे. तो या संघाशी गेल्या सोळा वर्षांपासून जोडलेला आहे आणि याच काळात त्याने संघाचे नेतृत्वही केले आहे. २०१३ ते २०२० या काळात त्याच्या नेतृत्वाखाली मुंबई इंडियन्सने पाच वेळा आयपीएल विजेतेपद पटकावले, जो एक मोठा विक्रम मानला जातो. गेल्या १६ वर्षांपासून रोहित इंडियन प्रीमियर लीगमध्ये सातत्याने मुंबई इंडियन्सकडूनच खेळत आला असून, त्याने कधीही दुसऱ्या कोणत्याही संघाचे जर्सी घातलेले नाही. सध्या तो आपल्या कारकिर्दीच्या अखेरच्या टप्प्यात असून, त्याच्या याच वक्तव्यावरून स्पष्ट होते की तो आपला शेवटचा आयपीएल सामनाही मुंबई इंडियन्सकडूनच खेळेल. यामुळे त्याचे चाहते आणि मुंबई इंडियन्स संघाचे समर्थक दोघेही समाधानी झाले आहेत.

दुसरीकडे, अजिंक्य रहाणेच्या निवृत्तीनंतर केकेआर संघाला नव्या कर्णधाराची गरज भासत आहे. संघाचे नेतृत्व कोण करणार, याबाबत सध्या चर्चा सुरू आहे. मात्र सध्या रोहित मुंबई इंडियन्स संघासोबतच आहे आणि त्याने केकेआरमध्ये जाण्याचा कोणताही इरादा नसल्याचे या व्हिडिओतून स्पष्ट केले आहे. यातच हार्दिक पंड्या ट्रेडद्वारे केकेआरमध्ये सामील होण्याची शक्यता वर्तवली जात आहे, त्यामुळे केकेआरच्या भविष्यातील संघरचनेकडे सर्वांचे लक्ष लागले आहे.