टी२० क्रिकेटमध्ये बटलरच्या नावावर विक्रम, १५ हजार धावांचा टप्पा गाठणारा पहिला फलंदाज

इंग्लंड आणि श्रीलंका यांच्यातील तीन सामन्यांच्या टी२० मालिकेत इंग्लंडच्या जोस बटलरने एक मोठा विक्रम आपल्या नावावर केला आहे. टी२० क्रिकेटच्या इतिहासात १५ हजार धावा पूर्ण करणारा तो जगातील पहिलाच फलंदाज ठरला आहे. या मालिकेतील दुसऱ्या सामन्यात इंग्लंडने श्रीलंकेवर सहा विकेट्सने दणदणीत विजय मिळवत मालिकेत २-० अशी आघाडी घेतली.

१७ सप्टेंबर रोजी कार्डिफमधील सोफिया मैदानावर हा सामना झाला. नाणेफेक गमावल्यानंतर आधी फलंदाजी करताना श्रीलंकेच्या संघाने ९ विकेट्स गमावत १४५ धावा केल्या. इंग्लंडसमोर १४६ धावांचे लक्ष्य होते, जे यजमान संघाने अवघ्या १२.१ षटकांत फक्त चार विकेट्स गमावून पूर्ण केले.

या लक्ष्याचा पाठलाग करताना इंग्लंडचा स्टार विकेटकीपर-फलंदाज जोस बटलरने १६ चेंडूंत ३० धावांची खेळी केली. या खेळीत त्याने चार चौकार आणि एका षटकाराचा समावेश केला. या ३० धावांमुळे बटलरने टी२० क्रिकेटमध्ये १५ हजार धावांचा टप्पा ओलांडला आणि याच फॉरमॅटमध्ये सर्वाधिक धावा करणारा फलंदाज म्हणूनही तो पुन्हा एकदा अव्वल स्थानावर पोहोचला. यापूर्वी हा विक्रम वेस्ट इंडिजच्या कायरन पोलार्डच्या नावावर होता. पोलार्डने ७५४ टी२० सामन्यांच्या ६७१ डावांत एकूण १४,९९९ धावा केल्या होत्या, म्हणजे बटलरने त्याला अवघ्या एका धावेने मागे टाकले.

३६ वर्षीय बटलरने आपल्या कारकिर्दीतील ५२८ व्या सामन्यात आणि ४९७ व्या डावात हा टप्पा गाठला. त्याच्या नावावर टी२० क्रिकेटमध्ये ९ शतके आणि १०७ अर्धशतके जमा आहेत. या यादीत टी२० आंतरराष्ट्रीय क्रिकेटमधून निवृत्त झालेला भारताचा माजी कर्णधार विराट कोहली १४,२१८ धावांसह सहाव्या क्रमांकावर आहे.

टी२० क्रिकेटमध्ये सर्वाधिक धावा करणाऱ्या फलंदाजांच्या यादीत जोस बटलर (इंग्लंड) १५,००० धावांसह पहिल्या स्थानावर आहे. त्यानंतर किरॉन पोलार्ड (वेस्ट इंडीज) १४,९९९ धावांसह दुसऱ्या, अॅलेक्स हेल्स (इंग्लंड) १४,५८१ धावांसह तिसऱ्या, ख्रिस गेल (वेस्ट इंडीज) १४,५६२ धावांसह चौथ्या, डेव्हिड वॉर्नर (ऑस्ट्रेलिया) १४,२८४ धावांसह पाचव्या आणि विराट कोहली (भारत) १४,२१८ धावांसह सहाव्या क्रमांकावर आहे.

हॅरी ब्रुकच्या नेतृत्वाखालील इंग्लंड संघाने दुसऱ्या टी२० सामन्यात श्रीलंकेला सहा विकेट्स राखून हरवत मालिकेत २-० अशी विजयी आघाडी घेतली. बटलरशिवाय टॉम बँटननेही महत्त्वाची भूमिका बजावली. त्याने २४ चेंडूंत दोन चौकार आणि चार षटकारांसह ५२ धावांची नाबाद खेळी करत संघाच्या विजयावर शिक्कामोर्तब केले. या मालिकेतील तिसरा आणि अंतिम सामना १९ सप्टेंबर रोजी मँचेस्टर येथे खेळवला जाणार आहे.