इराण वॉर : ३ लाख १३ हजार योद्धे मैदानात, इराणचा अमेरिकेला-इस्रायलला थेट इशारा

इराण आणि इस्रायल-अमेरिका यांच्यातलं युद्ध सुरू होऊन आज बरोबर २०३ दिवस झाले आहेत. या काळात इस्रायल आणि अमेरिकेने इराणला नमवण्यासाठी शक्य ते सगळं करून पाहिलं. इराणचे सर्वोच्च नेते, महत्त्वाचे शास्त्रज्ञ, नेते आणि लष्करी अधिकारी यांचा मृत्यू घडवून आणला गेला. इराणच्या महत्त्वाच्या सार्वजनिक बांधकामांवर मिसाईल हल्ले करून ती उध्वस्त करण्यात आली. एवढं होऊनही इराण युद्धातून माघार घ्यायला तयार नाही.

यामुळे जागतिक राजकीय वर्तुळात अशी चर्चा सुरू झाली की आता अमेरिका आणि इस्रायल जमिनीवरून सैन्य पाठवून थेट लढाई सुरू करू शकतात. या शक्यतेची तयारी म्हणून इराणने १८ सप्टेंबर २०२६ रोजी राजधानी तेहरानमध्ये एक मोठा स्वयंसेवक सराव आणि लष्करी मोर्चा काढला. या मोर्चात तब्बल ३ लाख १३ हजार लोक सहभागी झाल्याचा दावा इराणने केला आहे. हा कार्यक्रम Janfadayan-e-Iran म्हणजेच इराणसाठी बलिदान देणारे या मोहिमेअंतर्गत आयोजित करण्यात आला होता.

तेहरानमधल्या या मोर्चात लाखो स्वयंसेवक उतरल्याचे व्हिडीओ सोशल मीडियावर फिरत आहेत. सामान्य नागरिकांना प्राथमिक लष्करी प्रशिक्षण देऊन भविष्यात होऊ शकणाऱ्या हल्ल्यांसाठी तयार करणं हा या मोहिमेचा उद्देश सांगितला जातोय. इराणच्या अधिकाऱ्यांच्या म्हणण्यानुसार सहा लाखांहून जास्त लोकांनी लष्करी प्रशिक्षणासाठी नाव नोंदवलं आहे, मात्र हा आकडा स्वतंत्रपणे तपासून घेता आलेला नाही. या कार्यक्रमात ड्रोन आणि लष्करी उपकरणं तसंच गणवेशातले स्वयंसेवक दाखवण्यात आले.

३ लाख १३ हजार हा आकडा निव्वळ योगायोगाने निवडलेला नाही. शिया धार्मिक परंपरेशी याचा थेट संबंध आहे. शिया परंपरेनुसार इमाम महादींसोबत नेमके एवढेच सहकारी उभे राहतील, अशी मान्यता आहे. त्यामुळे हा आकडा निव्वळ लष्करी आकडा नसून प्रतीकात्मक अर्थानेही वापरला जातो. या आकड्याच्या मागे इराणच्या धार्मिक श्रद्धेचा हा संदर्भ जोडून एक वेगळा संदेश दिला जात असल्याचं दिसतं.

फेब्रुवारीपासून सुरू असलेल्या अमेरिका, इस्रायल आणि इराण यांच्यातल्या युद्धाच्या पार्श्वभूमीवर हा मोर्चा म्हणजे इराण कोणत्याही हल्ल्यासाठी सज्ज असल्याचं शक्तिप्रदर्शन मानलं जातंय. इराणला भविष्यात जमिनीवरून हल्ला होण्याची भीती वाटत असल्याचं त्यांच्या अधिकाऱ्यांच्या वक्तव्यांवरून स्पष्ट दिसतं. सोप्या भाषेत सांगायचं तर सामान्य नागरिकांनाही प्राथमिक लष्करी प्रशिक्षण देऊन इराण एक मोठं रिझर्व्ह फोर्स तयार करतोय, आणि याच्या माध्यमातून आपल्या मोठ्या मनुष्यबळाची ताकद अमेरिका आणि इस्रायलला दाखवून देतोय. तेहरानमधल्या या मोर्चाकडे त्यामुळे केवळ एक सराव म्हणून न पाहता युद्धाच्या पार्श्वभूमीवरचं एक मोठं राजकीय आणि लष्करी संकेत म्हणून पाहिलं जातंय.